ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អ្នកជំនាញជំរុញឱ្យ ឪពុកម្ដាយមានប្រុងប្រយ័ត្នខ្ពស់ ចំពោះការកំណត់ម៉ោងសម្រាប់កុមារមើលអេក្រង់ បន្ទាប់ពីការសិក្សាបានរកឃើញថា ការចំណាយពេលជាមួយអេក្រង់ច្រើន អាចនាំឱ្យទំហំខួរក្បាលកុមារតូចជាងមុន និងបន្ថយភាពឆ្លាតវៃ។
អ្នកវិទ្យាសាស្ត្របានរកឃើញថា កុមារដែលមើលទូរទស្សន៍ និងប្រើស្មាតហ្វូន ថេប្លេត និងកុំព្យូទ័រ ក្នុងកម្រិតមធ្យម មានកម្រិត IQ ទាប និងកម្រិតសម្លេងក្នុងខួរក្បាលតិច (ICV) ។ ផ្ទុយទៅវិញ កុមារដែលហាត់ប្រាណនៅពេលទំនេរ ទំនងជាមានភាពវៃឆ្លាត និងមានបរិមាណខួរក្បាលធំជាងកុមារ ដែលអសកម្ម។
ការសិក្សានេះ បានប្រើមូលដ្ឋានទិន្នន័យមកពីទូទាំងទ្វីបអឺរ៉ុប ដែលមានព័ត៌មានអំពីកុមាររាប់ពាន់នាក់ ទាក់ទងនឹង IQ , ការប្រើប្រាស់អេក្រង់ និងការធ្វើលំហាត់ប្រាណ។
បញ្ហានេះ ត្រូវបានវិភាគ ដើម្បីកំណត់អំពីទំនាក់ទំនង នៃការប្រើប្រាស់ទម្លាប់ពេលទំនេរ ភាពវៃឆ្លាត និងកម្រិតសំឡេងក្នុងខួរក្បាល (ICV)។
ក្រុមអ្នកស្រាវជ្រាវ ដែលមានមូលដ្ឋាននៅក្នុងប្រទេសចិន បាននិយាយថា លទ្ធផលរបស់ពួកគេបានផ្ដល់នូវភស្ដុតាងបន្ថែមទៀត ដែលថា ការចំណាយពេលច្រើនម៉ោងសម្លឹងមើលអេក្រង់ មានឥទ្ធិពលលើការអភិវឌ្ឍខួរក្បាលកុមារពេញមួយជីវិត។
លទ្ធផល នៃការស្រាវជ្រាវ បានសរសេរនៅក្នុងទស្សនាវដ្តី Developmental Cognitive Neuroscience ថា «ការរកឃើញទាំងនេះ បង្ហាញពីតម្រូវការដ៏ចាំបាច់ក្នុងការគ្រប់គ្រង និងតាមដាន ការប្រើប្រាស់ប្រព័ន្ធផ្សព្វផ្សាយរបស់កុមារ ហើយក៏ត្រូវជំរុញឱ្យកុមារមានសកម្មភាពរាងកាយសកម្មផងដែរ។»
ការសិក្សានេះ កើតឡើងខណៈពេលដែលការប្រើប្រាស់អេក្រង់របស់កុមារ បានកើនឡើងក្នុងរយៈពេលប៉ុន្មានឆ្នាំចុងក្រោយនេះ។
បើតាម BBC បានបង្ហាញថា នៅឆ្នាំ២០១៥ ការចំណាយពេលជាមធ្យម ដែលកុមារ អាយុចន្លោះពី ៥ ទៅ ១៥ឆ្នាំ ទូទាំងពិភពលោកចំណាយលើអេក្រង់ គឺស្ថិតនៅចន្លោះពី ៦ ទៅ ៩ម៉ោង ក្នុងមួយថ្ងៃ ខណៈក្មេងប្រុស ចំណាយពេលជាមួយអេក្រង់ ច្រើនជាងក្មេងស្រី។
ខណៈការចំណាយពេលជាមួយអេក្រង់ ផ្ដល់នូវអត្ថប្រយោជន៍ជាច្រើនដូចជា ងាយស្រួលបង្កើតមិត្តភាព និងពង្រឹងការសិក្សា។ ការនៅជាមួយអេក្រង់ ក៏បង្កផលប៉ះពាល់ច្រើនផងដែរ ដូចជា ការប៊ូលីតាមអ៊ីនធឺណិត ការមើលវីដេអូអំពើហិង្សា វីដេអូអាសអាភាស ការធ្វើឱ្យសកម្មភាពរាងកាយធ្លាក់ចុះ និងភាពតានតឹងកែវភ្នែក។
លោក Sir Cary Cooper សាស្ត្រាចារ្យចិត្តវិទ្យានៅសាកលវិទ្យាល័យ Manchester បាននិយាយថា កុមារកំពុងតែប្រើឧបករណ៍ទាំងនេះ ហើយពួកគេមិនបានរៀនជំនាញសង្គម និងរបៀបប្រើប្រាស់ភាសា និងពាក្យពេចន៍ឱ្យបានត្រឹមត្រូវ ដែលនាំឱ្យប៉ះពាល់ដល់អន្តរកម្មក្នុងសង្គមជាក់ស្ដែង និងការទំនាក់ទំនងផ្ទាល់។
បើតាម All About Vision បានណែនាំអំពីការប្រើប្រាស់ពេលវេលា ជាមួយអេក្រង់ ដូចខាងក្រោម ៖
– កុមារអាយុចាប់ពី ១៨ខែ ទៅ ៥ឆ្នាំ អាចមើលអេក្រង់ក្រោម ១ម៉ោង ក្នុងមួយថ្ងៃ
– កុមារអាយុចាប់ពី ៦ ទៅ ១០ឆ្នាំ អាចមើលអេក្រង់ក្រោម ២ម៉ោង ក្នុងមួយថ្ងៃ
– សម្រាប់មនុស្សពេញវ័យ អាចមើលអេក្រង់ចន្លោះពី ២ ទៅ ៤ម៉ោងក្នុងមួយថ្ងៃ។ ប្រសិនបើការងាររបស់អ្នកជាក់ទាក់ទងនឹងការមើលអេក្រង់ អាចមើលអេក្រង់ ប្រមាណ ៨ម៉ោង ក្នុងមួយថ្ងៃ៕
