តាមរយៈវីដេអូឃ្លីបចេញផ្សាយ​នៅលើ​បណ្តាញ​សង្គម​របស់ក្រសួងអប់រំ នាព្រឹក​ថ្ងៃទី៦ កុម្ភៈ នេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានធ្វើការបំភ្លឺ​ទៅ​ដល់សាធារណជនថា សៀវភៅប្រវត្តិវិទ្យាចេញពីថ្មីថ្នាក់ទី៤ដល់ថ្នាក់ទី៦ គឺជាសៀវភៅសិក្សាបន្ថែមលើសៀវភៅសិក្សាគោលរបស់ក្រសួងអប់រំ យុវជន និងកីឡា ប៉ុណ្ណោះ។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ថ្មីៗនេះ មានអ្នកនិពន្ធមួយក្រុម បានរៀបរៀងសៀវភៅប្រវត្តិសាស្រ្តសម្រាប់ការអានបន្ថែមទៅលើសៀវភៅសិក្សាគោល ដោយឈរលើគោលការណ៍ រួមមាន ៖ ១. បង្រៀនសិស្សឱ្យចេះគិត មិនទន្ទេញចាំមាត់, ទី២. ចេះវិភាគរកហេតុផល ដឹងពីមូលហេតុ នៃព្រឹត្តិការណ៍ប្រវត្តិសាស្រ្តនីមួយៗ ដឹងពីផលលំបាក នៃព្រឹត្តិការណ៍ប្រវត្តិសាស្រ្តនីមួយៗ, ទី៣. មានរូបភាពងាយស្រួលក្នុងការចងចាំ និង ទី៤. ការបង្រៀនតាមវិធិសាស្រ្តថ្មី ដើម្បីឱ្យសិស្សមានបំណិនសតវត្សទី២១ គឺបំណិននៅក្នុងការត្រិះរិះពិចារណា បំណិនក្នុងការស្រាវជ្រាវ ការធ្វើបទបង្ហាញ និងការធ្វើការងារជាក្រុម។

រដ្ឋមន្រ្តីក្រសួងអប់រំបន្ថែមថា នៅក្នុងការសរសេរសៀវភៅថ្មីនេះ គឺបានរក្សាខ្លឹមសារ នៃសៀវភៅប្រវត្តិសាស្រ្តចាប់តាំងពីទសវត្សទី៧០ រហូតមកដល់ពេលបច្ចុប្បន្ននៅដដែល ពោលគឺគោរពទៅតាមក្រមសីលធម៌វិជ្ជាជីវៈ មិនឱ្យមានការក្រឡៃប្រវត្តិសាស្រ្ត ពោលគឺនិយាយទៅលើការពិតជាក់ស្ដែង។

ឯកឧត្តមបណ្ឌិតសភាចារ្យ ក៏​បានបញ្ជាក់ដែរថា នៅក្នុងសៀវភៅថ្មីនេះ មានបន្ថែមចំណុចថ្មីមួយចំនួន រួមមាន ទី១. ចំណុចរណសិរ្សសាមគ្គីសង្គ្រោះជាតិកម្ពុជា ក្នុងការប្រយុទ្ធប្រឆាំងនឹងរបបប៉ុលពត, ទី២. បន្ថែមនូវការទប់ស្កាត់ពីការវិលត្រឡប់វិញរបស់ខ្មែរក្រហម បន្ទាប់ពីត្រូវបណ្ដេញចេញពីទីក្រុងភ្នំពេញ, ទី៣. តួនាទីរបស់ សម្ដេចអគ្គមហាសេនាបតីតេជោ ហ៊ុន សែន ក្នុងការតស៊ូប្រយុទ្ធប្រឆាំងនឹងពួកខ្មែរក្រហម រួមទាំងការបង្កើតរណសិរ្សសាមគ្គីសង្គ្រោះជាតិកម្ពុជា, ទី៤. ការអនុវត្តនយោបាយឈ្នះ-ឈ្នះ នាំមកនូវសុខសន្តិភាពពេញលេញ និង ទី៥. ការផ្ដោតទៅលើការអភិវឌ្ឍសេដ្ឋកិច្ចសង្គមនៅកម្ពុជា ការអនុ​វត្តយុទ្ធសាស្រ្តត្រីកោណ យុទ្ធសាស្រ្តចតុកោណ ដើម្បីសម្រេចបានការអភិវឌ្ឍសេដ្ឋកិច្ច និងសង្គម។

បើតាម​ការ​បញ្ជាក់របស់​រដ្ឋមន្រ្តីក្រសួងអប់រំ នៅក្នុងការរៀន និងបង្រៀនតាមបែបថ្មីនេះ គឺសិស្សត្រូវតែធ្វើការស្រាវជ្រាវដោយខ្លួនឯង ជាពិសេស រៀនពីប្រភពផ្សេងៗ ពីសៀវភៅគោលសិក្សាដែលមានស្រាប់ និងពីសៀវភៅដែលត្រូវអានបន្ថែម រួមទាំងសៀវភៅខេមរយានកម្មដែលរៀបឡើងនៅទសវត្សរ៍ទី៧០ ក៏ដូចជាសៀវភៅផ្សេងៗទៀត និងឯកសារដែលសិស្សអាចរកបានតាមអ៊ីនធើណិត។ ឯកឧត្តមរដ្ឋមន្រ្តី ក៏បានអំពាវនាវឱ្យសាធារណៈជន ត្រូវអានសៀវភៅទាំងស្រុង ជាពិសេសយុវជនខ្មែរ ដើម្បីទទួលបាននូវចំណេះដឹងកម្រិតខ្ពស់ ឱ្យមានចំណេះដឹងទូលំទូលាយ ពោលគឺ ត្រូវអានទាំងស្រុង អានពីប្រភពផ្សេងៗ ជាពិសេសគឺប្រភពច្បាស់លាស់ដែលផ្ដោតលើការស្រាវជ្រាវបែបវិទ្យាសាស្រ្ត។

គួរជម្រាបជូនថា សៀវភៅប្រវត្តិវិទ្យាចេញថ្មីពីថ្នាក់ទី៤ដល់ថ្នាក់ទី៦ មានចំនួន៣ចំណងជើង រួមមាន «ខ្មែរ និងដំណើរឆ្ពោះទៅសម័យអង្គរដ៏រុងរឿង» ថ្នាក់ទី៤, «ខ្មែរ និងដំណើរឆ្ពោះទៅក្រោមអាណាព្យាបាលបារាំង» ថ្នាក់ទី៥ និង «ខែ្មរ និងដំណើរឆ្ពោះទៅកាន់វិបុលភាព» ថ្នាក់ទី៦៕