បន្ថែមទៅលើការ​បកស្រាយ​របស់​រដ្ឋមន្រ្តីក្រសួងអប់រំ យុវជន និងកីឡា ពាក់ព័ន្ធទៅនឹង​សៀវភៅ​ប្រវត្តិវិទ្យាដែលទើបបោះពុម្ពថ្មី សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា បានបញ្ជាក់ម្តងទៀតថា សៀវភៅ​ប្រវត្តិវិទ្យាដែលបោះពុម្ពថ្មីចំនួន៣ក្បាលនេះ គឺជា​សៀវភៅ​បំពេញបន្ថែម របស់ក្រសួងអប់រំ ទៅលើសៀវភៅប្រវត្តិវិទ្យា​សម្រាប់ថ្នាក់បឋមសិក្សា ដែល​និយាយអំពីប្រវត្តិសាស្រ្ត​ខ្មែរ តាម​ដំណាក់កាល នៃប្រវត្តិសាស្រ្ត​ដែលបាន​កកើត។

ក្នុងពិធីប្រគល់សញ្ញាបត្រ​ដល់និស្សិតសាកលវិទ្យាល័យ​អាស៊ីអឺរ៉ុប នាព្រឹក​ថ្ងៃទី១៩ កុម្ភៈ សម្តេចធិបតី​មានប្រសាសន៍​ដោយ​ធ្វើការពន្យល់ថា សៀវភៅប្រវត្តិវិទ្យាទាំង៣ក្បាល គឺ សៀវភៅថ្នាក់ទី ៤ និយាយពីដំណាក់កាលសម័យ​បុរេប្រវត្តិសាស្ត្រ​កម្ពុជា, សៀវភៅថ្នាក់ទី៥ និយាយពីសម័យចតុមុខឆ្ពោះមកសម័យអាណានិគមនិយមបារាំង និង សៀវភៅថ្នាក់ទី៦ និយាយពីសម័យសង្គមរាស្ត្រនិយម មកសម័យព្រះរាជាណាចក្របច្ចុប្បន្ន។ សម្តេចបញ្ជាក់ថា ការដែលក្រសួងអប់រំ​រៀបចំ​បោះ​ពុម្ពសៀវភៅបំពេញបន្ថែមនេះ គឺជា​ទំនើបកម្មនៃរបៀបបង្រៀន ពោល​គឺនៅ​ក្នុងសៀវភៅ​មានរៀបជារូបភាពច្រើន ដើម្បី​ឱ្យសិស្សានុសិស្ស​សិក្សា​ងាយយល់។

យ៉ាងណាក៏ដោយ ដើម្បីបញ្ចៀស​ការយល់ច្រឡំ និង​ការ​បកស្រាយខុស សម្តេចធិបតី​បាន​ណែនាំ​ដល់​ក្រសួងអប់រំ យុវជន និងកីឡា យកសៀវភៅ​ប្រវត្តិវិទ្យាថ្មីនេះ ធ្វើជាទម្រង់ឌីជីថល ហើយ​បង្ហោះនៅ​លើប្រព័ន្ធអ៊ីនធឺណេត ដើម្បី​ឱ្យ​មនុស្ស​គ្រប់គ្នា​បានអាន។

ស្របគ្នានេះដែរ សម្តេចធិបតី នាយករដ្ឋមន្រ្តី ក៏​បានធ្វើការ​បង្ហាញពី​ខ្លឹមសារសំខាន់ខ្លះៗ នៅ​ក្នុងសៀវភៅ​ប្រវត្តិសាស្រ្ត​ថ្នាក់ទី៦ ដែលជា​ដើមចមសំខាន់​ដែលធ្វើ​ឱ្យ​មានប្រតិកម្ម​នៅ​លើ​បណ្តាញ​សង្គម ដោយថា សៀវភៅនេះ មាន៥ជំពូក រួមមាន ៖ ជំពូក ១ និយាយពីស្នាដៃអតីតព្រះមហាក្សត្រ ដឹងគុណព្រះបរមរតនកោដ្ឋ, ជំពូក ២ ជំនាន់សាធារណរដ្ឋខ្មែរ និយាយពីការបែកបាក់ និងធ្វើរដ្ឋ​ប្រហារ, ជំពូក ៣ កម្ពុជាប្រជាធិបតេយ្យ និងវាលពិឃាត ១៩៧៥-១៩៧៩, ជំពូក ៤ ការបង្កើតរបប​ថ្មីក្រោយពីផ្តួលរំលំប្រល័យពូជសាសន៍, ជំពូក ៥ ព្រះរាជាណាចក្រកម្ពុជាថ្មី និងយុទ្ធសាស្ត្ររបស់​រាជរដ្ឋាភិបាល។

ជាមួយគ្នានេះ សម្តេចធិបតី ក៏​បាន​បង្ហាញពីអត្ថន័យនៃស្តូបវិមានឈ្នះ ឈ្នះ គឺជាសមិទ្ធផលរបស់ខ្មែរ ដែល​បង្កើតឡើងឈរលើបរិបទ និងអត្ថន័យច្បាស់លាស់របស់ខ្មែរ ដូចជា ៖ ៧ជ្រុង គឺកត្តាជ័យជំនះទាំង៧ នៃ​នយោបាយឈ្នះ ឈ្នះ រួមមាន ទី១ សម្ដេចតេជោ ហ៊ុន សែន ជាមហាស្ថាបនិក និងជា​អ្នកដឹកនាំបញ្ចប់សង្គ្រាម, ទី២ តួនាទីរដ្ឋបាល​កណ្ដាល រដ្ឋអំណាច នៅនឹងកន្លែង អតីត​រដ្ឋកម្ពុជា គឺជាកម្លាំងស្នូល, ទី៣ តួអង្គដែលចូលរួម​ចំណែក​សកម្មភាព​ជាប្រតិបត្តិករ​ស្នូល, ទី៤ ការកសាងនូវជំនឿទុកចិត្ត និងការដែលមិនសងសឹកគ្នា, ទី៥ កត្តាមនោ​គមន៍វិជ្ជា ភាពត្រឹមត្រូវខាងនយោបាយសេដ្ឋកិច្ច សង្គម និងពាណិជ្ជកម្ម, ទី៦ កត្តាការបរទេស និងការគាំទ្រពីសហគមន៍អន្តរជាតិ និងទី៧ ការបែកបាក់របស់ខ្មែរក្រហម៕