ការគោរពចំពោះខ្លួនឯង (Self-esteem ) គឺជាទ្រីស្ដីផ្នែកតូចមួយក្នុងមេរៀនចិត្តវិទ្យា ដែលបង្ហាញថា មនុស្សគ្រប់គ្នាសុទ្ធតែមានការគោរពចំពោះខ្លួនឯង។ ប៉ុន្តែមនុស្សមួយចំនួនមានការគោរពក្នុងភាគរយតិច (Low self-esteem) ដែលបណ្តាលឱ្យពួកគាត់មិនសូវមានទំនុកចិត្តលើខ្លួនឯង និងប្រៀបធៀបខ្លួនឯងជាមួយអ្នកដទៃ ឬមជ្ឈដ្ឋានខាងក្រៅជារឿយៗ ។ ចំណែកបុគ្គលដែលចេះគោរពខ្លួនឯងស្ថិតនៅក្នុងភាគរយខ្ពស់ (High Self-esteem) វាអាចជំរុញឱ្យពួកគេមានទំនុកចិត្តខ្ពស់ និងផ្តោតទៅកាន់ខ្លួនឯងជានិច្ច។
យោងតាមគេហទំព័រ psychologytoday បានរកឃើញថា អ្នកដែលចុះថយ ចំពោះការគោរពខ្លួនឯង(Low Self-esteem) អាចបណ្តាលឱ្យមានបញ្ហាផ្នែកសុខុមាលភាព ដូចជា ការថប់បារម្ភ និងបាក់ទឹកចិត្តជាដើម។ បន្ថែមពីនោះវាក៏បង្កឱ្យពិបាកក្នុងការកំណត់គោលដៅ និងនាំឱ្យប៉ះពាល់ដល់ទំនាក់ទំនងផ្ទាល់ខ្លួនទៀតផង។ ដូច្នេះការអនុវត្តន៍ទម្លាប់៥ចំណុចខាងក្រោម គឺអាចពន្លឿនសមត្ថភាព និងបង្កើនទំនុកចិត្តចំពោះខ្លួនឯង ៖
១. បង្កើនក្ដីមេត្តាចំពោះខ្លួនឯង ៖ ការផ្តល់មេត្តាចំពោះខ្លួនឯង ដែលនៅក្នុងភាសាចិត្តវិទ្យាគេហៅថា (Self-compassion) មានន័យថាការអនុញ្ញាតឱ្យខ្លួនឯងបានគិតសកម្មភាពល្អៗ ហើយថែមទាំងប្រតិបត្តិល្អ ជាមួយអ្នកដទៃផងដែរ ។ នៅពេលដែលបានជួបរឿងមិនសមបំណង ក៏ដូចជាការបាត់បង់អ្វីមួយ ឬមួយក៏ត្រូវប្រឈម នឹងបញ្ហាជាច្រើនទៀត ក្នុងជីវិត អ្នកដែលមានក្ដីម្តេតាចំពោះខ្លួនឯង តែងខិតខំ រិះរកវិធីសាស្រ្តលើកទឹកចិត្តខ្លួនឯង ជំនួសឱ្យការសោកស្ដាយនូវអ្វីដែលធ្វើមិនបានល្អពេលកន្លងមក។
២. នៅក្បែរមនុស្សវិជ្ជមាន ៖ នៅពេលដែលអ្នកមានអារម្មណ៍ថា ហាក់បាត់បង់ ការគោរពទៅកាន់ខ្លួនឯង ហើយចង់ពង្រឹងខ្លួនឱ្យល្អជាងមុន អ្នកត្រូវរក្សាខ្លួនរបស់អ្នកទៅនៅក្បែរបុគ្គលដែលមានផ្នត់គំនិតសុទិដ្ឋិនិយម ព្រោះពួកគេទាំងនោះ ចេះលើកទឹកចិត្តអ្នក និងផ្តល់នូវអធ្យាស្រ័យខ្ពស់ ។ តាមការសិក្សាក៏បានបង្ហាញដែរថា នៅពេលដែលអ្នកចេះទទួលយកស្ថានភាពពិត និងទទួលបានការយោគយល់ ពីសំណាក់អ្នកដទៃ អ្នកក៏អាចពង្រីកនូវការគោរពខ្លួនឯងបន្ថែមមួយកម្រិតទៀតដែរ ។ ដូច្នេះចូរផ្តោតទៅលើទំនាក់ទំនងដែលតែងតែទុកចន្លោះឱ្យអ្នក, គាំទ្រអ្នក និងលើកទឹកចិត្តអ្នកឱ្យក្លាយជាមនុស្សប្រសើជាងមុន ពីមួយពេលទៅមួយពេល។ សូមកុំបារម្ភអំពីភាពបែបបាក់ នៅពេលដែលអ្នកចាប់ផ្តើមកាត់ចោលនូវទំនាក់ទំនង ឬប្រភេទបុគ្គល ដែលតែងតែរិះគន់ បន្ទោសបង្អាប់ និងធ្វើឱ្យអ្នករង់នូវភាពអាម៉ាស់ជាដើម ។ ជារួមក្នុងដំណើរការរស់នៅប្រចាំថ្ងៃ ត្រូវគិតគូរឱ្យបានល្អិតល្អន់ នូវប្រភេទមនុស្សដែលត្រូវធ្វើទំនាក់ទំនងជាមួយ។
៣. សាទរជ័យជំនះតូចៗ ៖ ជាទូទៅមនុស្សយើងមួយចំនួនតែងតែដេញតាមសមិទ្ធផលធំៗ ដោយមិនបានប្រើប្រាស់ពេលវេលាខ្លះដើម្បីសម្ដែងសេចក្ដីពេញចិត្ត ចំពោះសកម្មភាពដែលសម្រេចបានមុននឹងឈានដល់គោលដៅនោះទេ។ នៅពេលដែលអបអរ និងផ្តោតសំខាន់តែទៅលើជ័យជំនះធំៗនៅក្នុងជីវិត វាអាចបណ្តាលឱ្យបាត់បង់នូវភាពរីករាយជាមួយសកម្មភាពតូចៗ ដែលសុទ្ធសឹងតែជាបំណែកនាំទៅរកភាពជោគជ័យធំបាន។ ឆ្លើយតបទៅនឹងចំណុចនេះ អ្នកត្រូវតែរំឮកខ្លួនឯងឱ្យបានញឹកញាប់ថា ការបំបែកគោលដៅធំៗឱ្យទៅជាសកម្មភាពតូចៗ និងចេះផ្តល់រង្វាន់ឱ្យខ្លួនឯង ដូចជាប្រឡងជាប់ សម្រាកលំហែ និងសកម្មភាពនានាទៀត។ ធ្វើសកម្មភាពបែបនេះ ជាកត្តាជំរុញឱ្យមានការផ្ទៀងផ្ទាត់នូវដំណើការការងារ និងលើកទឹកចិត្តឱ្យឈានទៅរកការសម្រេចភារកិច្ចក្នុងរូបភាពធំ។
៤. ប្រើប្រាស់ប្រយោគថាមពល ជំនួសឱ្យពាក្យរិះគន់ ៖ ប្រយោគមានថាមពល គេអាចទាញវាមកប្រើបានគ្រប់ពេល បើទោះជាស្ថិតក្នុងស្ថានការណ៍មិនប្រក្រតីក៏ដោយ។ ដែលមានន័យ ផ្តោតទៅលើការរីកចម្រើន ប្រសើរជាងផ្តោតទៅលើអ្វី ដែលមិនអាចទៅរួច។
៥. រក្សាគម្លាតពីបណ្តាញសង្គម ៖ យោងតាម European Scientific Journal បានសិក្សាឃើញថា ការចំណាយពេល១ម៉ោងនៅលើបណ្តាញសង្គមរៀងរាល់ថ្ងៃ វាអាចជំរុញការចុះថយនៃការគោរពចំពោះខ្លួនឯង(Low Self-steam) ។ ការរក្សាគម្លាតពីបណ្តាញសង្គម អ្នកនឹងរកឃើញថា វាជួយឱ្យអ្នកកាត់បន្ថយការប្រៀបធៀបខ្លួនឯង ជាមួយនឹងអ្នកដទៃ និងផ្តល់ឱកាសឱ្យខ្លួនឯងក្នុងការផ្តោត នៅអ្វីដែលអ្នកពេញចិត្តពិតប្រាកដ៕