រដ្ឋមន្រ្តីក្រសួងអប់រំ យុវជន និងកីឡា បានបង្ហាញពីការគាំទ្រ​ដល់កម្មវិធីស្បៀងអាហារពិភពលោក (WFP) ក្នុងការបន្ត​អនុវត្ត​កម្មវិធីផ្តល់អាហារតាមសាលារៀន រយៈពេល​៥ឆ្នាំបន្តទៀត ពោល​គឺពីឆ្នាំ២០២៤ ដល់ឆ្នាំ​២០២៨ ដើម្បីជួយ​អភិវឌ្ឍ​កុមារ​កម្ពុជា​ឱ្យ​មានកាយសម្បទារឹងមាំ បញ្ញាស្មារតី​ឆ្លាតវៃ។

កាលពីដើមសប្តាហ៍នេះ (៤ កុម្ភៈ) ប្រតិភូកម្មវិធីស្បៀងអាហារពិភពលោក ដឹកនាំដោយលោកស្រី ឃ្លែរ ខូណាន់ បានជួបពិភាក្សាជាមួយ​ថ្នាក់ដឹកនាំក្រសួងអប់រំ យុវជន និងកីឡា, ក្នុងកិច្ចពិភាក្សានោះ WFP បានស្នើ​ឱ្យ​មានការ​បន្ត​ការ​គាំទ្រ​ផ្គត់ផ្គង់អង្ករ និង​ថវិកាពីរាជរដ្ឋាភិបាលកម្ពុជា ដល់កម្មវិធីស្បៀងអាហារពិភពលោក សម្រាប់​គម្រោង​កម្មវិធីផ្តល់អាហារតាមសាលារៀន ពីឆ្នាំ​២០២៤ ដល់ឆ្នាំ២០២៨ ដោយ​ប្រើប្រាស់​កសិផល​ក្នុងសហគមន៍ ជាមួយចក្ខុវិស័យ​អភិវឌ្ឍកុមារ​កម្ពុជា​ឱ្យ​មានកាយសម្បទារឹងមាំ បញ្ញាស្មារតីឆ្លាតវៃ លើក​កម្ពស់​កំណើន​សេដ្ឋកិច្ច​នៅ​ក្នុងសហគមន៍ និង​រួមចំណែកដល់ការ​កសាងសង្គមមួយ​មានវិបុលភាព ចីរភាព និង​បរិយាបន្ន។

ជាការឆ្លើយតប ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានគូសបញ្ជាក់ថា រាជរដ្ឋាភិបាលកម្ពុជា បាននិងកំពុងយកចិត្តទុកដាក់យ៉ាងខ្លាំងលើការកាត់បន្ថយភាពក្រីក្រ និងផ្តល់អាទិភាពដល់ការវិនិយោគលើមូលធនមនុស្សដែលជាមូលដ្ឋានគ្រឹះ ឈានទៅសម្រេចគោលដៅចក្ខុវិស័យកម្ពុជាឆ្នាំ២០៣០ និង២០៥០ និងរួមចំណែកដល់ការសម្រេចគោលដៅអភិវឌ្ឍន៍សេដ្ឋកិច្ចសង្គមជាតិប្រកបដោយចីរភាព។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ បានបង្ហាញនូវការគាំទ្រ និងចូលរួមសម្របសម្រួលនូវរាល់ដំណើរការក្នុងការអនុវត្តកម្មវិធីផ្តល់អាហារតាមសាលារៀនឱ្យទទួលបានជោគជ័យកាន់តែត្រចះត្រចង់ ដោយបានគូសបញ្ជាក់ឡើងវិញពីការប្តេជ្ញាចិត្តក្នុងការបន្តពង្រឹងពង្រីកកិច្ចសហប្រតិបត្តការឱ្យកាន់តែល្អប្រសើរឡើង ក្នុងគោលដៅធានាឱ្យបានថា កុមារគ្រប់រូបមានឱកាសទទួលបានសុខភាព និងអាហារប្រកបដោយជីវជាតិតាមសាលារៀន។

គួរបញ្ជាក់ថា ក្រសួងអប់រំ យុវជន និងកីឡា ក្រោម​កិច្ច​សហការ​ជាមួយ​កម្មវិធី​ស្បៀងអាហារពិភពលោក របស់អង្គការ​សហប្រជាជាតិ បានចាប់ផ្តើម​អនុវត្ត​កម្មវិធីផ្តល់​អាហារតាមសាលារៀន​តាំងពីឆ្នាំ​១៩៩៩ នៅសាលា​បឋមសិក្សា​ចំនួន៦៤ ដែលមានអ្នកទទួលផល ៣៧ ៥០០នាក់ និងបន្តពង្រីកជាបន្តបន្ទាប់​ដោយប្រើប្រាស់​ស្បៀង​ដែលផ្គត់ផ្គង់​ទាំងស្រុង​ដោយកម្មវិធីស្បៀង​អាហារពិភពលោក ក្នុងគោលបំណង​ផ្តល់លទ្ធភាព​ដល់​កុមារ​មក​ពី​គ្រួសារក្រីក្រ​បានចូលរៀន។ នៅ​ឆ្នាំ​២០១៤ ក្រសួងអប់រំ ក្រោមជំនួយ​ពីកម្មវិធីស្បៀងអាហារពិភពលោក បានចាប់ផ្តើម​អនុវត្ត​សាកល្បង​កម្មវិធីផ្តល់​អាហារតាម​សាលារៀន​ដោយប្រើប្រាស់កសិផល​ក្នុងសហគមន៍ ដែលជា​គំរូថ្មីមួយ​ក្នុងការ​ផ្តល់អាហារ​តាមសាលារៀន សំដៅ​ធានាបាន​នូវ​អាហារ​មានសុវត្ថិភាព និង​អាហារូបត្ថម្ភ គាំទ្រ​ការអភិវឌ្ឍសេដ្ឋកិច្ចមូលដ្ឋាន និង​អាច​អនុវត្ត​បាន។

គិត​ចាប់ពី​ឆ្នាំ​២០១៩ រហូតមកដល់​ឆ្នាំ២០២៤ កម្មវិធីផ្តល់អាហារតាមសាលារៀន នៅកម្ពុជា មានសាលារៀនគោលដៅសរុបចំនួន ១ ១១៤សាលា ក្នុងខេត្តចំនួន ១០ទូទាំងប្រទេស និងមានសិស្សទទួលផលប្រមាណ ៣០០,០០០នាក់៕