ក្នុងកិច្ចប្រជុំស្តីពីការអនុវត្តកម្មវិធីសាលារៀនគំរូ កាលពីថ្ងៃទី១០ ខែតុលា ឆ្នាំ២០២៣កន្លងទៅ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ក្នុងឆ្នាំ២០២៣នេះ ក្រសួងអប់រំនឹងជំរុញសាលាធនធានចំនួន៥០ ឱ្យប្រែក្លាយជាសាលាគំរូក្នុងរយៈពេល២ឆ្នាំទៀត។
ឯកឧត្តមបណ្ឌិតសភាចារ្យ ហង់ជួន ណារ៉ុន បញ្ជាក់បន្ថែមថា ក្រសួងអប់រំ យុវជន និងកីឡា បាននឹងកំពុងអនុវត្តកំណែទម្រង់វិស័យអប់រំនៅគ្រប់កម្រិតសាលារៀន ដើម្បីលើកកម្ពស់ការគ្រប់គ្រងដឹកនាំសាលារៀន និងលទ្ធផលការសិក្សារបស់សិស្ស ស្របតាមចក្ខុវិស័យរបស់រាជរដ្ឋាភិបាលកម្ពុជា នៅក្នុងនីតិកាលទី៧ នៃរដ្ឋសភាដែលបានកំណត់នូវកំណែទម្រង់ក្នុងវិស័យអប់រំជាអាទិភាព។
ឧបនាយករដ្ឋមន្រ្តី រដ្ឋមន្ត្រីក្រសួងអប់រំ បន្ថែមថា សាលាគំរូ គឺជាសាលាដែលសម្រេចបាននូវស្តង់ដាគុណភាពទាំង៥រួមមាន ទី១.លទ្ធផលសិក្សារបស់សិស្ស ទី២.វិធីសាស្ត្របង្រៀនតាមបែបទំនើប ទី៣.ការចូលរួមរបស់សហគមន៍ ទី៤.ដំណើរប្រតិបត្តិការ និងរដ្ឋបាលសាលារៀន និងទី៥.គណនេយ្យភាពរបស់សាលារៀន។ ឯកឧត្តមបណ្ឌិតសភាចារ្យ បន្តថា ការវាយតម្លៃសាលាគំរូ ជាក់ស្តែងនឹងចាប់ផ្តើមក្នុងឆ្នាំសិក្សា២០២៣-២០២៤ ។
ដើម្បីសម្រេចបានសាលាគំរូ ឯកឧត្តមបណ្ឌិតសភាចារ្យឧបនាយករដ្ឋមន្ត្រី បានផ្តល់អនុសាសន៍សំខាន់ៗរួមមាន កំណត់ផែនការសកម្មភាព ពិនិត្យតាមដាន និងផ្តល់ការគាំទ្រ បន្តកែលម្អ បង្កើតឱ្យមានក្លឹបសិក្សា និងពិព័រណ៍ស្នាដៃសិស្ស។ លើសពីនេះ សិក្សាពីសាលាដែលជោគជ័យ លើកកម្ពស់គុណភាពការគ្រប់គ្រងសាលារៀន និងបង្កើតឱ្យមានតេស្ដស្តង់ដាតាមសាលា។
ជាមួយគ្នានេះ ក្រុមការងារថ្នាក់តំបន់ ថ្នាក់ខេត្ត និងបង្គោលនឹងចុះបង្វឹកផ្ទាល់នៅកម្រិតសាលារៀន តាមយន្តការតំបន់ ក្នុងការរៀបចំ និងអនុវត្តកម្មវិធីសាលារៀនគំរូឱ្យសម្រេចបាននូវលទ្ធផលការងារប្រកបដោយប្រសិទ្ធភាពខ្ពស់ សំដៅកសាងប្រព័ន្ធអប់រំឱ្យរឹងមាំ និងមាននិរន្តរភាពនៅគ្រប់កម្រិត ពិសេសកម្រិតសាលារៀន។
គួរជម្រាបជូនថា មកដល់បច្ចុប្បន្ននេះ គម្រោងអនុវត្តកម្មវិធីសាលារៀនគំរូបានឈានដល់ដំណាក់កាលនៃការចុះគាំទ្រសាលាគោលដៅចំនួន ១៣៧៕