ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កាលពីថ្ងៃទី២៩ ខែមេសា ឆ្នាំ២០២៤ ក្រសួងអប់រំ យុវជន និងកីឡា បានចេញសេចក្តីណែនាំមួយទៅដល់គ្រឹះស្ថានសិក្សាទាំងអស់ ពីការថែរក្សាសុខភាព និងការបង្ការជំងឺនានា ដែលបណ្តាលមកពីអាកាសធាតុក្តៅខ្លាំងនាពេលបច្ចុប្បន្ន។
បើតាមក្រសួងអប់រំ ការឡើងកម្តៅខ្លាំង អាចបង្កហានិភ័យដល់សុខភាពដូចជា ជំងឺបេះដូង ជំងឺសួត រលាកស្បែកឡើងក្រហម និងអាចបង្កជាជំងឺផ្សេងៗដូចជា ជំងឺរាក ជំងឺកង្វះអាហារូបត្ថម្ភ ឬក៏អាចមានបញ្ហាសុខភាពផ្លូវចិត្តជាដើម ។ ដើម្បីថែរក្សាសុខភាព និងបង្ការជំងឺនានាអំឡុងពេលអាកាសធាតុក្តៅខ្លាំងនេះ ក្រសួងអប់រំ បានណែនាំដល់បុគ្គលិកអប់រំ និងអ្នកសិក្សានៅគ្រប់គ្រឹះស្ថានសិក្សាសាធារណៈ និងឯកជន អនុវត្តនូវវិធានការដូចជា ៖ ត្រូវទទួលទានទឹកដាំពុះដោយទុកឱ្យត្រជាក់ (ចៀសវាងញ៉ាំទឹកក្តៅ) ទឹកបរិសុទ្ធ ទឹកចម្រោះ ទឹកស្អាត ឱ្យបានច្រើន និងញឹកញាប់ លើសពី២លីត្រក្នុងមួយថ្ងៃចំពោះមនុស្សពេញវ័យ ទោះបីអ្នកមិនមានអារម្មណ៍ស្រេកទឹកក៏ដោយ ពិសេសត្រូវតាមដានទឹកនោមដោយមិនត្រូវបណ្តោយឱ្យទឹកនោមឡើងពណ៌លឿងចាស់នោះទេ។
ជាមួយគ្នានេះ ត្រូវទទួលទានបន្លែ ផ្លែឈើ ដែលសម្បូរជាតិសរសៃ និងជាតិទឹកឱ្យបានញឹកញាប់, ត្រូវស្លៀកសម្លៀកបំពាក់ការពារកម្តៅ និងការពារការរលាកស្បែកដោយពន្លឺព្រះអាទិត្យ ដូចជាសម្លៀកបំពាក់រលុង ស្រាល មានពណ៌ស្រាល ពាក់វ៉ែនតាការពារពន្លឺថ្ងៃ ពាក់មួកដែលមានគែមធំទូលាយ ឬប្រើឆ័ត្រជារបាំងការពារកម្តៅថ្ងៃពេលចេញក្រៅ ឬពេលធ្វើដំណើរ និងផ្លាស់ប្តូរសម្លៀកបំពាក់ប្រសិនបើវាសើមខ្លាំង។
ត្រូវប្រកាន់ខ្ជាប់នូវក្បួនអនាម័យល្អ ហូបស្អាត ផឹកស្អាត រស់នៅស្អាតជាប់ជាប្រចាំ, ប្រើកន្សែងសើមជូតមុខ ដាក់ព័ន្ធជុំវិញក ប្រសិនបើមានអារម្មណ៍ថាក្តៅខ្លាំងពេក ហើយអំឡុងពេលមានកម្តៅខ្លាំង ត្រូវប្រើមធ្យោបាយផ្សេងៗដើម្បីបន្ថយកម្តៅដូចជាផ្លិតជាដើម, ត្រូវតាមដានព័ត៌មានអំពីអាកាសធាតុ ដើម្បីរៀបចំសកម្មភាពប្រចាំថ្ងៃឱ្យបានត្រឹមត្រូវសម្របទៅនឹងការប្រែប្រួលអាកាសធាតុ, ត្រូវរក្សាទឹកទុកសម្រាប់ប្រើប្រាស់ប្រចាំថ្ងៃ និងគ្របឱ្យជិត ដើម្បីបង្ការមូសខ្លាពងដាក់ដែលអាចបង្កជំងឺគ្រុនឈាម។
តាមដានសុខភាពផ្ទាល់ខ្លួនជាប្រចាំ ប្រសិនបើមានរោគសញ្ញាដូចជាវិលមុខ ចង្អោរ ឬក្អួត ឈឺក្បាល មាត់ស្ងួត រមួលសាច់ដុំ ជារោគសញ្ញាដំបូងនៃផលប៉ះពាល់នៃកម្តៅ ត្រូវផ្លាស់ទីទៅកាន់កន្លែងត្រជាក់ ត្រូវសម្រាកពី២ ទៅ៥នាទី ហើយពិសាទឹកត្រជាក់យឺតៗកុំបន្តសកម្មភាព ព្រោះអាចមានហានិភ័យខ្ពស់។ ប្រសិនបើអ្នកមិនមានអារម្មណ៍ធូរស្រាល និងមានអាកាសរៈដូចជា ក្តៅខ្លួនខ្លាំង វិលមុខ ដកដង្ហើមញាប់ រាក រលាត់ស្បែក ក្អក រលាកឈឺបំពង់ក ត្រូវស្វែងរកការព្យាបាលភ្លាមនៅមណ្ឌលសុខភាព ឬមន្ទីរពេទ្យដែលនៅជិត ។
ប្រការគួរចៀសវាងអំឡុងពេលអាកាសធាតុក្តៅខ្លាំង ៖ ត្រូវចៀសវាងពិសាភេសជ្ជៈដែលបណ្តាលឱ្យជាតិទឹកនៅក្នុងរាងកាយថយចុះមានដូចជា ពិសាគ្រឿងស្រវឹង ជាតិអាល់កុល កាហ្វេ តែ ភេសជ្ជៈដែលមានជាតិកាហ្វេអ៊ីន និងជាតិស្ករច្រើន ជាតិអំបិលច្រើន, ត្រូវចៀសវាងនៅក្រោមពន្លឺថ្ងៃដោយផ្ទាល់យូរពេក ត្រូវស្វែងរកម្លប់ជ្រក ឬប្រើរបាំងការពារកម្តៅព្រះអាទិត្យ និងកាត់បន្ថយការឱ្យពន្លឺព្រះអាទិត្យចូលក្នុងថ្នាក់រៀនច្រើនពេក និងយូរពេក, ចៀសវាងការធ្វើសកម្មភាពហាត់ប្រាណ ឬការលេងកីឡានៅក្រោមកម្តៅថ្ងៃខ្លាំង, ត្រូវកាត់បន្ថយការទទួលទានម្ហូបអាហារដែលប្រៃពេក ផ្អែមពេក និងខ្លាញ់ច្រើនពេក ផ្ទុយមកវិញត្រូវទទួលទានម្ហូបអាហារណាដែលមានអំបិលតិច ផ្អែមតិច និងខ្លាញ់តិច។
វិធានការអនុវត្តនៅតាមគ្រឹះស្ថានសិក្សា ៖ ត្រូវបើកទ្វារ បង្អួចនៃបន្ទប់រៀនឱ្យបានស្រឡះល្អ, ត្រូវណែនាំសិស្សឱ្យលេងក្នុងម្លប់ ឬនៅក្នុងបន្ទប់រៀន នៅពេលចេញលេង, ត្រូវណែនាំសិស្សឱ្យយកទឹកមកពីផ្ទះ ដូចជាទឹកដាំពុះ ទឹកសុទ្ធ ទឹកចម្រោះ និងទឹកស្អាតសម្រាប់ប្រើប្រាស់ផ្ទាល់ខ្លួននៅគ្រឹះស្ថានសិក្សា, ត្រូវបាញ់ទឹកដាក់ទីធ្លាគ្រឹះស្ថានសិក្សា ឬដំបូលអគារសិក្សា តាមលទ្ធភាព និងស្ថានភាពជាក់ស្តែង ដើម្បីបន្ថយកម្តៅ ឬអាចពិភាក្សាជាមួយអ្នកអាណាព្យាបាលសិស្សដើម្បីរកលទ្ធភាពបំពាក់កង្ហារនៅតាមបន្ទប់រៀនជាដើម, ត្រូវសហការជាមួយអ្នកពាក់ព័ន្ធក្នុងការផ្គត់ផ្គង់ទឹកសម្រាប់ទទួលទាន និងទឹកសម្រាប់ប្រើប្រាស់នៅតាមគ្រឹះស្ថានសិក្សាឱ្យបានសមស្របតាមតម្រូវការ, ត្រូវបន្តដាំ និងថែរក្សាដើមឈើដែលមានស្រាប់នៅ ក្នុងបរិវេណគ្រឹះស្ថានសិក្សា ដើម្បីយកម្លប់ និងកាត់បន្ថយកម្តៅ, ត្រូវពិនិត្យតាមដានឱ្យបានញឹកញាប់ និងជាប្រចាំលើសុខភាពរបស់សិស្សានុសិស្ស ដែលបង្កដោយអាកាសធាតុក្តៅខ្លាំង ជាពិសេសកុមារតូចៗ, ត្រូវអនុវត្តឱ្យបានខ្ជាប់ខ្ជួននូវសេចក្តីណែនាំស្តីពីការពង្រឹងវិធានការអនុវត្តការលើកកម្ពស់សុវត្ថិភាព និងសុខុមាលភាពចំណីអាហារ នៅតាមគ្រឹះស្ថានសិក្សាសាធារណៈ និងឯកជន។
យោងតាមសេចក្តីជូនដំណឹងស្តីពីស្ថានភាពអាកាសធាតុ របស់ក្រសួងធនធានទឹក និងឧតុនិយម ចេញផ្សាយនៅថ្ងៃទី៣០ ខែមេសា ឆ្នាំ២០២៤ បានធ្វើការព្យាករណ៍ថា ចាប់ពីថ្ងៃទី៣០ មេសា ដល់ថ្ងៃទី០២ ឧសភា តំបន់វាលទំនាប អាចមានសីតុណ្ហភាពអប្បបរមា២៦អង្សា និងសីតុណ្ហភាពអតិបរមា ៣៩អង្សាសេ, ខណៈតំបន់ខ្ពង់រាប សីតុណ្ហភាពអប្បបរមា ២៦អង្សា និងសីតុណ្ហភាពអតិបរមា ៣៩អង្សា ។ ចំណែកតំបន់មាត់សមុទ្រ សីតុណ្ហភាពអប្បបរមា ២៥អង្សា និងសីតុណ្ហភាពអតិបរមា ៣៦អង្សាសេ៕
