រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា គោលដៅនៃការអប់រំ គឺដើម្បីកសាងពលរដ្ឋល្អប្រកបដោយសក្តានុពលសម្រាប់កម្ពុជា។ ទន្ទឹមគ្នានេះ ជាពលរដ្ឋដែលមានទាំងវិជ្ជាសម្បទា ចំណេះដឹងជ្រៅជ្រះ មានជំនាញច្បាស់លាស់ មានបំណិន ទាំងផ្នែកបច្ចេកទេស ក៏ដូចជាបំណិនទន់ បំណិនសតវត្សទី២១។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ដោយបញ្ជាក់ថា បំណិនសតវត្សទី២១ ជាបំណិនត្រិះរិះពិចារណា ដោះស្រាយបញ្ហា ធ្វើការងារជាក្រុម មានភាពច្នៃប្រឌិត និងនវានុវត្តន៍ សហគ្រិនភាព មានបំណិនបច្ចេកទេសឌីជីថល ជាពិសេសមានការយល់ដឹងជាពលរដ្ឋសកលល្អ ដែលមានការទទួលខុសត្រូវខ្ពស់ចំពោះទង្វើរបស់ខ្លួន យល់ដឹងពីបញ្ហាសកលលោក និងចូលរួមធ្វើឱ្យពិភពលោកកាន់តែស្រស់បំព្រង។

រដ្ឋមន្ត្រីក្រសួងអប់រំ បន្ថែមថា ឆ្លើយតបនឹងយុគសម័យសាកលភាវូបនីយកម្ម ដែលពោរពេញដោយការប្រកួតប្រជែង ការប្រែប្រួលអាកាសធាតុ តម្រូវឱ្យមនុស្សជាតិត្រូវធ្វើការឆ្លើយតបយុគសម័យនៃបច្ចេកវិទ្យាឌីជីថល បញ្ញាសប្បនិមិត្ត ដែលអាចចូលរួមចំណែកបង្កើនប្រសិទ្ធភាពការងារ ហើយក៏កំពុងប្រណាំងប្រជែងជាមួយបញ្ញារបស់មនុស្សផងដែរ។ ឯកឧត្តមបណ្ឌិតសភាចារ្យ ហង់ជួន ណារ៉ុន បន្តថា ដើម្បីគ្រប់គ្រង់បច្ចេកវិទ្យាដែលកំពុងរីកចម្រើនយ៉ាងឆាប់រហ័សនេះ មនុស្សត្រូវមានមូលដ្ឋានគ្រឹះចំណេះដឹងរឹងមាំ ទាំងផ្នែកវិទ្យាសាស្ត្រ និងវិទ្យាសាស្ត្រសង្គម ត្រូវពង្រឹងសមត្ថភាពផ្ទាល់ខ្លួនក្នុងការវិនិច្ឆ័យ ត្រិះរិះពិចារណាដោះស្រាយបញ្ហា និងទាមទារចាំបាច់ត្រូវចេះប្រើប្រាស់បច្ចេកវិទ្យាប្រកបដោយភាពឆ្លាតវៃ។

បើតាម ឯកឧត្តមបណ្ឌិតសភាចារ្យ ហង់ជួន ណារ៉ុន គុណភាពនៃការអប់រំចរិយាធម៌ ដើរតួនាទីយ៉ាងសំខាន់ដើម្បីធានាបាននូវជោគជ័យក្នុងជីវិត។ ក្នុងន័យនេះ រាជរដ្ឋាភិបាលកម្ពុជា បានបញ្ចូលនូវការអប់រំចរិយាធម៌ ការអប់រំវប្បធម៌បន្ថែមទៅលើការអប់រំចំណេះទូទៅ ពិសេសក្មួយៗត្រូវមានភាពតស៊ូអំណត់អត់ធន ប្រឹងប្រែងជម្នះឧបសគ្គដោយភាពអង់អាចក្លាហាន ឆ្ពោះទៅរកគោលដៅជាក់លាក់ ដែលខ្លួនឯងបានកំណត់ពេលឈានចូលដល់កម្រិតឧត្តមសិក្សា និងឆ្ពោះទៅសម្រេចសុបិនរបស់ខ្លួនដើម្បីប្រែក្លាយជាកម្លាំងចលករ ក្នុងការចូលរួមអភិវឌ្ឍសង្គមជាតិ និងក្លាយជាមោទនភាពរបស់ក្រុមគ្រួសារ៕