ក្នុង​ឱកាសចូលរួម​ ទិវាមច្ឆជាតិ លើកទី១៩ នៅ​ទីតាំងបឹងធំ ក្នុងភូមិ​កំពង់សំណាញ់ ឃុំមៀន ស្រុកព្រៃឈរ ខេត្តកំពង់ចាម សម្តេចបរវធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា បានធ្វើ​ការ​អំពាវនាវ​ និង​លើកទឹកចិត្ត​ដល់ប្រជាពលរដ្ឋ​គ្រប់រូប សូម​ចូលរួម​ក្នុង​វារី​វប្បកម្ម ទាំងការចិញ្ចឹមត្រី អណ្តើក កង្កែប ។ល។ ដើម្បីធានា​នូវ​សន្តិសុខស្បៀង ក៏​ដូចជាដោះស្រាយ​នូវ​បញ្ហា​កង្ខះ​ប្រូតេអ៊ីន។

សម្តេចធិបតី​មានប្រសាសន៍ថា បច្ចុប្បន្ននេះ ការផ្គង់ផ្គង់ត្រី​ជាលក្ខណៈធម្មជាតិ គឺមិន​អាច​ធានា​បានដូចកាលពី៣០ ឬ៤០ឆ្នាំមុននោះទេ ដោយ​សារ​តែការកើនឡើង​នៃចំនួន​ប្រជាពលរដ្ឋ ការគោករាក់​នៃទន្លេបឹងបួរមួយចំនួន, ដូច្នេះ គឺទាមទារ​ឱ្យ​មានការ​បំពេញ​បន្ថែម​តាមរយៈការ​ជំរុញ​ឱ្យ​មានការ​ចិញ្ចឹមត្រីបន្ថែម។

តាមប្រសាសន៍របស់សម្តេចនាយករដ្ឋមន្រ្តី ទិវាមច្ឆជាតិ ១ កក្កដា ប្រារព្ធឡើងដើម្បីផ្សព្វផ្សាយ និងបំផុសស្មារតីឱ្យប្រជាពលរដ្ឋនៅទូទាំងប្រទេសចូលរួមអភិរក្ស និងអភិវឌ្ឍធនធានជលផល ប្រកបដោយនិរន្តរភាព សំដៅបង្កើនផលស្តុកមច្ឆជាតិ បំពេញសេចក្តីត្រូវការអាហារមូលដ្ឋានប្រចាំថ្ងៃ ធានាសន្តិសុខស្បៀង និងជួយទ្រទ្រង់ជីវភាពប្រជាពលរដ្ឋ ខណៈជារៀងរាល់ឆ្នាំ ត្រីមេពូជ កូនត្រី និងវារីសត្វពូជក្នុងស្រុកប្រមាណ ៥លានក្បាល ត្រូវបានលែងចូលទៅក្នុងដែនទឹកធម្មជាតិ។

សម្តេចនាយករដ្ឋមន្រ្តីក៏បានលើកឡើងដែរថា ផ្អែកលើយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ជាពិសេស កម្មវិធី គោលនយោបាយអាទិភាពទី៥ និងទី៦ សំដៅជំរុញការអភិវឌ្ឍវិស័យកសិកម្ម ដែលរួមមានការលើកស្ទួយផលិតកម្ម ការរកទីផ្សារ និងរក្សាលំនឹងថ្លៃកសិផល, ការដាក់ពង្រាយមន្ត្រីកសិកម្មឃុំ និងការអភិវឌ្ឍសហគមន៍កសិកម្មទំនើប។ ជាលទ្ធផល ក្នុងឆ្នាំ២០២៣កន្លងទៅ កម្ពុជាមិនត្រឹមតែអាចធានាបាននូវសន្តិសុខស្បៀងពេញលេញសម្រាប់ប្រជាជននៅទូទាំងប្រទេសប៉ុណ្ណោះទេ ប៉ុន្តែថែមទាំងផលិតបានលើសពីតម្រូវការ និងបាននាំចេញផលិតផល កសិកម្មជាង ៨លានតោន ដោយបាននាំមកវិញនូវចំណូលជារូបិយបណ្ណអន្តរជាតិជិត ៥ពាន់លានដុល្លារ ទៀតផង។

ការ​ស្រាវជ្រាវ​ជាច្រើន​បាន​បង្ហាញថា ត្រី​ស្ថិត​ក្នុង​ចំណោម​អាហារ​ដែលផ្តល់នូវ​សុខភាពល្អបំផុត ​​​ដោយសារត្រី​ជា​ប្រភេទអាហារ​ដែល​មាន​ប្រូតេអ៊ីន​ខ្ពស់ ជាមួយ​នឹង​កំហាប់​ខ្ពស់នៃ​វីតាមីន A វីតាមីន B12 វីតាមីន C និង វីតាមីន D កាល់ស្យូម ជាតិដែក ស័ង្កសី អាស៊ីត​ខ្លាញ់ សេលេញ៉ូម និង​ប្រូតេអ៊ីន។ បើ​តាម​របាយការណ៍​របស់​ជល​ផល​កម្ពុជា ប្រជាជន​កម្ពុជា​ជាទូទៅម្នាក់ៗ​ហូបត្រីជា​មធ្យម​ក្នុង​បរិមាណ ៣៧,៥ គីឡូក្រាម​ក្នុង​រយៈពេល​មួយ​ឆ្នាំ៕