ជាធម្មជាតិមនុស្សគឺធ្លាប់ឆ្លងកាត់បទពិសោធន៍នៃការមានកំហឹងក្នុងខ្លួន។ កាលដែលមិនបានគ្រប់គ្រងកំហឹង បានជះឥទ្ធិពលមិនល្អជាច្រើនទៅកាន់ទំនាក់ទំនង និងសុខភាពផ្លូវចិត្ត។ ការបន្តរក្សាកំហឹងក្នុងខ្លួនយូរទៅៗ អាការស្រ្តេសផ្ទុកធ្ងន់ឡើងៗ ចំណែកឯបញ្ហាក៏កាន់តែកើនពីមួយពេល ទៅមួយពេល! ក៏ដូចជាជួបប្រទះបញ្ហាក្នុងការរស់នៅប្រចាំថ្ងៃកាន់តែច្រើនចំពោះរឿងដដែលៗ និងរារាំងខ្លួនឯងពីការពង្រឹងសមត្ថភាពឱ្យល្អជាងមុន។ ដោយសារតែកំហឹងបង្កបាននូវហានិភ័យជាច្រើនបែបនេះហើយ ទើបការស្រាវជ្រាវមួយ ដែលត្រូវ​បានចុះផ្សាយ​ក្នុងគេហទំព័រ verywellmind បានឱ្យដឹងថា ការកាត់បន្ថយកំហឹងជាផ្នែកមួយនៃការពង្រឹងសមត្ថភាពខ្លួន ដែលជាមូលហេតុមួយបញ្ជាក់បានថា ការរៀនពីវិធីសាស្រ្តគ្រប់គ្រងកំហឹង និងអនុញ្ញាតឱ្យកំហឹងត្រូវបានរំសាយចោលពីខួរក្បាលមានសារៈសំខាន់យ៉ាងខ្លាំង ក្នុងការជួយឱ្យវិថី នៃការអភិវឌ្ឍខ្លួនឱ្យក្លាយជាបុគ្គលម្នាក់ប្រសើរជាងមុន។

ការដោះលែងកំហឹង មិនមែនជារឿងងាយស្រួលគ្រប់ពេលនោះទេ។ ប៉ុន្តែជំហានដំបូងគឺរៀនសូត្របន្ថែមជានិច្ច និងព្យាយាមកត់ចំណាំអំពីកម្រិត និងប្រភេទនៃកំហឹង រួមទាំងស្វែងរកឱ្យឃើញថា សកម្មភាពអ្វីដែលអ្នកធ្វើរៀងរាល់ពេលមានកំហឹងដោយមិនជះផលអវិជ្ជមាននៅពេលបន្ទាប់ ឬថា តើសកម្មភាពអ្វីដែលជាការឆ្លើយតបបែបវីធីសាស្រ្តវិជ្ជមានពេលខឹងសម្បា។

ការកត់សម្គាល់អំពីកំហឹងជារឿយៗ គឺជាការប្រឹងប្រែងមួយដែលស្តែងឱ្យឃើញថា អ្នកមានអារម្មណ៍យ៉ាងម៉េចពេលមានកំហឹងផ្ទុះម្តងៗ និងរបៀបដែលអ្នកសម្រេចចិត្តក្នុងការគ្រប់គ្រងស្ថានភាពបែបនេះបានយ៉ាងដូចម្តេច? ជំនួសឱ្យការបដិសេធ ក៏ដូចជា ការប្រើប្រាស់ហិង្សា ដោយប្រការអចេតនាណាមួយទៅកាន់អ្នកដទៃដើម្បីជាដំណោះស្រាយ។ បន្ថែមពីនោះ ការផ្តោតទៅលើការសង្កេតពេលដែលអ្នកមានអារម្មណ៍ខឹង និងព្យាយាមរកឱ្យឃើញថា វាបណ្តាលមកពីកត្តាអ្វីខ្លះ? ហើយក៏ត្រូវសង្កេតអំពីភាពខុសគ្នារវាង អារម្មណ៍ដែលខឹង និងការធ្វើសកម្មភាពនៅពេលមានកំហឹង កំណត់ឱ្យដឹងថា តើការឆ្លើយតបបែបណាទើបជាជម្រើសល្អ។

ផ្លាស់ប្តូរវិធីសាស្រ្ត នៃការមើលទៅកំហឹង និងពង្រឹងខ្លួនឱ្យទប់ទល់ជាមួយខ្លួនឯងនឹងអារម្មណ៍តានតឹងតាមរយៈការស្វែងយល់ពីស្ថានភាពនីមួយៗដែលបានកើតឡើង និងព្យាយាមយល់ថា តើមានព័ត៌មានអ្វីខ្លះនៅពីក្រោយស្ថានការណ៍ ឬពីក្រោយមនុស្សដែលធ្វើឱ្យអ្នកខឹង។ ឧទាហរណ៍ រំលឹកខ្លួនឯងថា ប្រហែលជាបុគ្គលម្នាក់នេះកំពុងចាកចេញពីផ្លូវដែលស្ទះចរាចរណ៍ខ្លាំង ឬក៏មានរឿងមិនល្អជាច្រើនកើតមានចំពោះជីវិតរបស់គេ។ ឬក៏ ប្រសិនបើអ្នកសង្កេតឃើញថា មិត្តរបស់អ្នកហាក់មានអកប្បកិរិយាមិនសមរម្យ ឈ្លើយ ឬការប្រើប្រាស់ពាក្យសម្តីមិនមានការគោរពណាមួយកើតមាន អ្នកគួរគិតថា ប្រហែលថ្ងៃនេះមានអ្វីមិនល្អកើតមានចំពោះគេទេដឹង ឬក៏ស្ថានភាពមិនល្អណាមួយដែលយើងមិនបានដឹង។ ការព្យាយាមយល់ពីស្ថានការណ៍ និងសួរនាំអំពីសុខទុក្ខ សុទ្ធសឹងតែជាចំណែកមួយជួយរក្សាទឹកចិត្តរបស់មនុស្សបានធូរស្រាលពីកំហឹង និងរៀនដោះលែងអារម្មណ៍មិនល្អលើសពីអ្វីដែលអាចគ្រប់គ្រងបាន៕