ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅឆ្នាំ២០២៥ ករណីគ្រោះថ្នាក់ចរាចរណ៍ទូទាំងប្រទេស បានកើតឡើងចំនួន ២៣៤៥លើក ថយចុះ ៤៩៩លើក ឬស្មើនឹង១៨ភាគរយ បើធៀបនឹងឆ្នាំ២០២៤ បើទោះជានគរបាលបានផ្អាកជាបណ្ដោះអាសន្នចាប់ពីយប់ថ្ងៃទី២៥ ខែកក្កដា ឆ្នាំ២០២៥ រហូតដល់ពេលនេះ នូវការអនុវត្តច្បាប់ស្ដីពីចរាចរណ៍ផ្លូវគោកក៏ដោយ។
បើតាមរបាយការណ៍ នៅឆ្នាំ២០២៥ គ្រោះថ្នាក់ចរាចរណ៍បានបណ្តាលឱ្យស្លាប់មនុស្សចំនួន ១៤៦៧ ថយចុះ៤២នាក់ ស្មើនឹង ៣% ធៀបនឹងឆ្នាំ២០២៤ , របួសធ្ងន់ ១៨៦៩ ថយ ៤០៤នាក់ ស្មើនឹង ១៨%, របួសស្រាល ១៣៤៤ ថយ ១០៣នាក់ ស្មើនឹង ៧%, មិនពាក់មួកសុវត្ថិភាពពេលមានគ្រោះថ្នាក់ ២០៦៨ ថយ ៤០៩នាក់ ស្មើនឹង ១៧%។
ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានលើកឡើងថា ករណីថយចុះនៃគ្រោះថ្នាក់ចរាចរណ៍នេះ ជាផ្នែកមួយដ៏ធំ នៃកិច្ចខិតខំប្រឹងប្រែងរបស់រាជរដ្ឋាភិបាល ក្នុងការកាត់បន្ថយអត្រាគ្រោះថ្នាក់ចរាចរណ៍ឱ្យមានចំនួនកាន់តែតិច។
យ៉ាងណាក៏ដោយ មូលហេតុចម្បងដែលបណ្តាលឱ្យកើតមានគ្រោះថ្នាក់ចរាចរណ៍ ត្រូវគេកត់សម្គាល់ក្នុងឆ្នាំ២០២៥រួមមាន ៖ ល្បឿន ១១៤៩លើក, មិនគោរពសិទ្ធិ ៤៩១លើក, មិនប្រកាន់ស្តាំ ២៥៨លើក, ប្រជែងគ្រោះថ្នាក់ ១៥៤លើក, បត់គ្រោះថ្នាក់ ១០១លើក, ស្រវឹង ៨៥លើក, ងងុយ ១៩លើក, កត្តាយាន ៣៣លើក, មិនគោរពភ្លើងសញ្ញា ៤០លើក, កត្តាផ្លូវ ៦លើក និងអាកាសធាតុ ៩/៣៥លើក ថយ ២៦លើក ស្មើនឹង ៧៤%។
ឯកឧត្តម ស សុខា រដ្ឋមន្ត្រីក្រសូងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានដាក់ចេញនូវទិសដៅការងារដើម្បីកាត់បន្ថយគ្រោះថ្នាក់ចរាចរណ៍ និងជនរងគ្រោះ ចំនួន៥%តាមផែនការប្រចាំឆ្នាំឆ្លើយតបនឹងកំណើនយានយន្ត និងប្រជាពលរដ្ឋ។
ទិសដៅទាំងនោះរួមមាន ការជំរុញបញ្ចប់នីតិវិធីឆ្លងសេចក្តីព្រាងច្បាប់ស្តីពីចរាចរណ៍ផ្លូវគោកថ្មី ការធ្វើយុទ្ធនាការអប់រំផ្សព្វផ្សាយស្តីពីសុវត្ថិភាពចរាចរណ៍តាមរាជធានីខេត្តដែលផ្តោតលើសិស្សានុសិស្ស អ្នកបើកបរម៉ូតូរថយន្ត អ្នកបើកបរដឹកកម្មករនិយោជិត ផែនការពង្រីក ជួសជុលកែលម្អផ្លូវថ្នល់ បង្កើតចំណតឱ្យបានគ្រប់គ្រាន់ និងការសាងសង់សួនសុវត្ថិភាពចរាចរណ៍នៅតាមសាលារៀន៕
