ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការអានជាប្រចាំអាចជួយពង្រីកចំណេះដឹង និងជំនាញផ្សេងៗ ប៉ុន្តែដើម្បីបណ្តុះទម្លាប់នេះ យើងត្រូវចាប់ផ្តើមពីការបង្កើតវិន័យផ្ទាល់ខ្លួន ដើម្បីធ្វើឱ្យការអានកាន់តែងាយស្រួល និងរីករាយ។ កញ្ញា សៀង សុខចេង អ្នកផលិតមាតិកាអំពីការអភិវឌ្ឍខ្លួន បានចែករំលែកវិធីសាស្រ្តមួយចំនួនក្នុងការជួយពង្រឹងទម្លាប់អាន។
១. ដាក់សៀវភៅនៅកន្លែងងាយយក ៖ កញ្ញា សៀង សុខចេង និយាយថា ដើម្បីមានភាពងាយស្រួល និងជំរុញឱ្យយើងអានសៀវភៅ គួរតែមានទម្លាប់យកសៀវភៅតាមខ្លួន ឬឧបករណ៍អានអេឡិចត្រូនិចដែលមានទំហំតូចល្មមដែលផ្ទុកសៀវភៅអានបានច្រើនក្បាល។ ដោយឡែកសម្រាប់ការរៀបចំនៅក្នុងផ្ទះវិញ គួរមានការតាំងសៀវភៅនៅស្ទើរតែគ្រប់ទីកន្លែង តួយ៉ាងសូម្បីបន្ទប់ទឹកក៏គួរមានសៀវភៅផងដែរ។
២. ចែកការអានជាផ្នែកតូចៗ ៖ កុំដាក់សម្ពាធខ្លួនឯងពេក បើតាមបទពិសោធន៍ដែល សុខចេង បានអនុវត្តន៍ គឺយើងត្រូវការបំបែកសកម្មភាព ពីរូបភាពធំឱ្យទៅតូច ឬក៏ការធ្វើឱ្យមានភាពសាមញ្ញៗដូចជា ការបំបែកជាជំពូកអានតូចៗ ការចាប់ផ្តើមអានដំបូងដោយកុំដាក់សម្ពាធ។
៣. ធ្វើឱ្យការអានមានភាពសប្បាយ ៖ ជ្រើសរើសសៀវភៅដែលស្របជាមួយចំណូលចិត្ត តាមរយៈការសាកល្បងអានច្រើនប្រភេទ (រឿងខ្លី, កំណាព្យ, ទស្សនវិជ្ជា ឬសៀវភៅវិចិត្រសាល) ដើម្បីរកឱ្យឃើញស្ទាយដែលអ្នកចូលចិត្ត។ បន្ទាប់មកជ្រើសរើសកន្លែងដែលស្របទៅនឹងស្ថានភាពផ្ទាល់ខ្លួន ដូចជារកកន្លែងស្ងប់ស្ងាត់ ដែលមានពន្លឺល្អ និងមានអារម្មណ៍ស្រួល (ដូចជាកៅអីទន់ៗ ឬជាមួយភ្លេងស្ងាត់ៗ)។ ប្រសិនបើអ្នកចូលចិត្ត អាចដាក់ភេសជ្ជៈឬអាហារសម្រន់ជាមួយ (ដូចជាកាហ្វេ, តែ ឬគ្រាប់អាល់ម៉ុង) ដើម្បីធ្វើឱ្យពេលអានកាន់តែមានអារម្មណ៍សប្បាយ។
ដូច្នេះ ការរៀបចំបរិស្ថាន ការកំណត់គោលដៅសាមញ្ញៗ និងការជ្រើសរើសវិធីសាស្រ្តដែលស័ក្តិសម អ្នកនឹងអាចបង្កើតទម្លាប់អានដ៏មានប្រសិទ្ធភាពមួយ៕
