បន្ទាប់ពីឆ្លងកាត់វគ្គបណ្តុះបណ្តាលយ៉ាងតឹងរ៉ឹង និងមានរយៈពេលជាច្រើនសប្តាហ៍ ប្រតិភូយុវជនកម្ពុជា នៃកម្មវិធីនាវាយុវជនអាស៊ីអាគ្នេយ៍ និងជប៉ុន (SSEAYP) លើកទី៤៩ ឆ្នាំ២០២៦ បានត្រៀមខ្លួនរួចជាស្រេចក្នុងការបង្ហាញសមត្ថភាព និងស្មារតីតំណាងជាតិ ក្នុងពិធីបិទវគ្គបណ្តុះបណ្តាលមុនចេញដំណើរ ដែលប្រារព្ធឡើងនាថ្ងៃទី១០ ខែមករា ឆ្នាំ២០២៦ ក្នុងរាជធានីភ្នំពេញ។

ពិធីនេះត្រូវបានរៀបចំឡើងដើម្បីកត់សម្គាល់សមិទ្ធផលសំខាន់មួយ ក្នុងដំណើរត្រៀមខ្លួនរបស់ប្រតិភូយុវជនកម្ពុជា មុនចូលរួមកម្មវិធីអន្តរជាតិដ៏មានកិត្តិយស ដែលមានគោលបំណងលើកកម្ពស់មិត្តភាព ការយល់ដឹងពីគ្នាទៅវិញទៅមក និងកិច្ចសហប្រតិបត្តិការរវាងយុវជនអាស៊ីអាគ្នេយ៍ និងជប៉ុន។

ចំណុចលេចធ្លោនៃពិធីបិទវគ្គនេះ គឺការសម្តែងទង់ជាតិ និងការសម្តែងទស្សនីយភាពវប្បធម៌ ដែលបង្ហាញពីបេតិកភណ្ឌដ៏សម្បូរបែប ភាពរឹងមាំ និងចក្ខុវិស័យនាពេលអនាគតរបស់ប្រទេសកម្ពុជា។ ការសម្តែងទាំងនេះ មិនត្រឹមតែជាការបង្ហាញសិល្បៈប៉ុណ្ណោះទេ ប៉ុន្តែថែមទាំងជាការអនុវត្តជាក់ស្តែងនៃការទូតវប្បធម៌ ដែលប្រតិភូយុវជនកម្ពុជា នឹងយកទៅបង្ហាញជូនប្រតិភូយុវជនមកពីបណ្តាប្រទេសផ្សេងៗ ក្នុងអំឡុងពេលកម្មវិធី SSEAYP ទាំងមូល។

ពិធីនេះរួមមានការសម្តែង និងបទបង្ហាញដោយប្រតិភូយុវជនកម្ពុជាទាំង ១៦ រូប រួមមាន ៖ កញ្ញា ចំរើន អមរា, លោក វិនឡាយ អនុសារ, កញ្ញា រិទ្ធ ច័ន្ទចរណៃ, លោក ទ្រី កូប៉ង់, លោក សៅ ឡៃហេង, លោក លីម គាសេង, លោក លាង លេវីត, កញ្ញា សុភក្តិ ណាល់រីតី, លោក ហន ភក្តីបញ្ញាបុត្រ, កញ្ញា រិន រូស្សា, លោក ដារ៉ា រ៉ូសុីលី, កញ្ញា ហ៊ឺ សុីវខេង, កញ្ញា គី សុរដារីយ៉ា, លោក ធាម សុពិសាល, កញ្ញា ហេង សុវណ្ណមុនីនាថ និងលោក ឆាយ សុវណ្ណបញ្ញា។

ជាផ្នែកមួយនៃការត្រៀមលក្ខណៈ ប្រតិភូយុវជនកម្ពុជាឆ្នាំ២០២៦ បានចូលរួមវគ្គបណ្តុះបណ្តាលដែលផ្តោតលើការអភិវឌ្ឍភាពជាអ្នកដឹកនាំ ការងារជាក្រុម ការយល់ដឹងពីវប្បធម៌ និងតួនាទីជាតំណាងជាតិលើឆាកអន្តរជាតិ។ ប្រតិភូយុវជនឆ្នាំនេះ បានរួបរួមគ្នាក្រោមប្រធានបទ “Woven as One” ដែលជានិមិត្តរូបនៃសាមគ្គីភាព និងភាពរួមបញ្ចូល ដោយយកអត្ថន័យនៃ ក្រមាខ្មែរ មកធ្វើជាសញ្ញានៃការត្បាញសរសៃផ្សេងៗឲ្យក្លាយជាផ្នែកតែមួយដ៏រឹងមាំ។

ពិធីបិទវគ្គបណ្តុះបណ្តាលមុនចេញដំណើរ មិនមែនជាការបញ្ចប់នៃការហ្វឹកហ្វឺនប៉ុណ្ណោះទេ ប៉ុន្តែជាចំណុចចាប់ផ្តើមនៃដំណើរថ្មីមួយ ដែលពោរពេញដោយការផ្លាស់ប្តូរវប្បធម៌ ភាពជាអ្នកដឹកនាំ និងកិច្ចសហប្រតិបត្តិការក្នុងតំបន់។ នៅពេលត្រៀមចេញដំណើរ ប្រតិភូយុវជនកម្ពុជាបាននាំយកទៅជាមួយនូវក្តីសង្ឃឹមរបស់ជាតិ ការប្តេជ្ញាចិត្ត និងមោទនភាព ក្នុងការរួមចំណែកយ៉ាងវិជ្ជមានដល់សហគមន៍យុវជនអាស៊ីអាគ្នេយ៍–ជប៉ុន៕