គ្រួសារគឺជា​ចំណែក​ដ៏​ធំ​មួយ​នៅ​ក្នុងជីវិត មិនថាមានសុខ ឬទុក្ខ គ្រួសារជាកន្លែងផ្តល់កម្លាំងចិត្ត អបអរ និងជំរុញស្មារតី។ នៅក្នុងអត្ថបទនេះ យើង​នឹងបង្ហាញពីវិធីចំនួន១០ ដើម្បីរក្សា និងពង្រឹងភាពស្និទ្ធស្នាលក្នុងគ្រួសារ ឱ្យ​កាន់តែមានសុភមង្គល ៖

១. ចែករំលែកពេលវេលាជាមួយគ្នា ៖ កំណត់ពេលមុនគេងដើម្បីនិយាយគ្នាលេង ប្រាប់រឿងកំប្លែងៗ ឬដេកមើលទូរទស្សន៍ជាមួយគ្រួសារ។ ការសន្ទនា​បែបនេះជួយ​ពង្រឹងទំនាក់ទំនង និងធ្វើឱ្យ​អារម្មណ៍ជិតស្និទ្ធបំផុត។

២. ញ៉ាំអាហារ​ជាមួយគ្នា ៖ សមាជិកគ្រួសារភាគច្រើន គឺមិន​សូវ​បាន​នៅផ្ទះទេ ដោយសារ​មានកិច្ចការ​រៀងៗខ្លួន ដូច្នេះ សូមព្យាយាម​រៀបចំពេល​បាយ​ណាមួយ ដូចជា​បាយពេល​ល្ងាចជាមួយ​គ្រួសារ។ ពេល​អាហារ​ជាឱកាស​ល្អដើម្បីដឹងពីរឿងរ៉ាវ​របស់គ្នាទៅវិញទៅមក។

៣. ជូនអំណោយ ៖ ការជូន​អំណោយ​គឺបង្ហាញពីការ​យកចិត្តទុកដាក់ និង​ខ្វល់ខ្វាយ​ពីអ្នក​នៅ​ក្នុងផ្ទះ, អំណោយមិនចាំបាច់ថ្លៃពេកនោះទេ តែសំខាន់​លើការ​គិតដល់តម្រូវការ​របស់គ្នា។ ឧទាហរណ៍ ទិញនំមក​ផ្ទះ​សម្រាប់ម្តាយ ឬជួយ​ឪពុកក្នុង​ការងារ​ផ្ទះ​ជាដើម។

៤. ធ្វើដំណើរ​កម្សាន្ត​ជាមួយគ្រួសារ ៖ មិនចាំបាច់​ទៅឆ្ងាយ ដែលត្រូវចំណាយ​ប្រាក់ច្រើន​ក៏​បាន ដោយ​គ្រាន់តែ​ដើរ​លេងជិតផ្ទះ ឬទៅផ្សារ​ជាមួយគ្នា​ក៏អាចផ្តល់​ភាពសប្បាយ​រីករាយ​បាន​ហើយ។

៥. ជាអ្នកស្តាប់ល្អ​សម្រាប់សមាជិកគ្រួសារ ៖ មិនថាចំពោះឪពុកម្តាយ​ជាមួយកូន កូនជាមួយ​ឪពុកម្តាយ ឬក៏​ដៃគូ​ប្ដីប្រពន្ធក៏ដោយ ការ​ស្តាប់ហេតុផល និងអារម្មណ៍គ្នាគឺសំខាន់ណាស់។ ក្រៅពីជីវិត​ជាក្រុមគ្រួសារ គឺត្រូវធ្វើជា​មិត្តដ៏ល្អសម្រាប់គ្នាផងដែរ។

៦. បង្រៀនកូនឱ្យ​ចូលរួមការងារផ្ទះ ៖ ការជួយ​ធ្វើការងារផ្ទះ ធ្វើឱ្យកូនមានអារម្មណ៍ថាមានតម្លៃ និង​ពង្រឹងទំនាក់ទំនង​ជាមួយឪពុកម្តាយ។ កុំភ្លេចសរសើរ និងអរគុណ​ពួកគេរាល់​ពេល​ដែល​ពួកគេ​ធ្វើការងារ​ល្អ។

៧. អបអរ​នៅពេលជោគជ័យ ៖ ទទួលស្គាល់ និងអបអរសមិទ្ធផល​របស់សមាជិកគ្រួសារ។ ការលើកទឹកចិត្ត​បែបនេះ​ធ្វើឱ្យគ្រួសារមានកម្លាំងចិត្តកាន់តែខ្លាំង។

៨. ការពារ និងគាំទ្រគ្នា ៖ ធ្វើឱ្យគ្រួសារ​មានអារម្មណ៍​សុវត្ថិភាព ទាំងផ្លូវកាយ​និងផ្លូវចិត្ត។ ធ្វើជា​គំរូរឹងមាំ ប៉ុន្តែ​មិនមែន​ជាការបង្ខំ ឬ​ធ្វើឱ្យគេខ្លាចទេ។

៩. ចែករំលែក​រឿងរ៉ាវ​ប្រចាំថ្ងៃ ៖ រៀបរាប់​ពីអារម្មណ៍ និងបទពិសោធន៍​របស់ខ្លួន​ជាមួយគ្រួសារ។ វាជួយ​ឱ្យ​គ្រួសារ​យល់ពី​ជីវិតរបស់អ្នក និងពង្រឹង​ភាព​ជិតស្និទ្ធ។

១០. យល់ដឹង​ពីអារម្មណ៍គ្នានៅ​ពេល​លំបាក ៖ ពេលមាន​ជម្លោះ ឬស្ត្រេស ព្យាយាម​ស្តាប់ និង​យល់ដឹង​អារម្មណ៍គ្នា។ ប្រាប់ពួក​គេថា “អ្នកមិន​ដែលឯកោទេ ខ្ញុំ/យើងតែង​នៅជាមួយ​អ្នក!”។

គ្រួសារ​ដែលមានសុភមង្គល មិនមែនកើតឡើងដោយសារសំភារៈ ឬភាពសម្បូរ​បែបនោះ​ទេ គឺកើតឡើង​ពីការយកចិត្តទុកដាក់ ការ​គោរព និងការចែករំលែក៕