ក្នុងវេទិកាពិភាក្សា ពី គំនិតផ្ដួចផ្ដើមឱ្យមានសាលារៀនឌីជីថលសម្រាប់សាលារៀន ក្នុង​សន្និសីទ និងពិព័រណ៍បច្ចេកវិទ្យាអប់រំកម្ពុជាលើកទី១ កាលពីដើមសប្តាហ៍នេះ ឯកឧត្តម ទេព ភិយ្យោរិទ្ធ អគ្គលេខាធិការដ្ឋាន ក្រសួងអប់រំ យុវជន និងកីឡា បានបញ្ជាក់ពីសាលារៀនឌីជីថល ដោយថា វាគឺជាការផ្សារភ្ជាប់សាលារៀនជំនាន់ថ្មី សាលារៀនគំរូ ទៅនឹងវិទ្យាស្ថានជាតិអប់រំ គ្រឹះស្ថានបណ្ដុះបណ្ដាលគ្រូ ដោយប្រើប្រាស់បច្ចេកវិទ្យា និងបញ្ញាសិប្បនិម្មិត (AI) ដើម្បីអនាគតកម្ពុជា។

បើតាម ឯកឧត្តម ទេព ភិយ្យោរិទ្ធ បញ្ញាសប្បនិម្មិត (AI) បានដើរតួនាទីសំខាន់ក្នុងការចូលរួមជាជំនួយការយ៉ាងល្អក្នុងការពង្រឹង មិនត្រឹមតែការងារអភិបាលកិច្ចល្អនោះទេ ប៉ុន្តែទាក់ទងនឹងការងារបណ្ដុះបណ្ដាលគ្រូ កិច្ចតែងការ ការគ្រប់គ្រងកម្រិតសាលារៀន ការរៀននិងបង្រៀន ។ល។

ឯកឧត្តម ទេព ភិយ្យោរិទ្ធ បញ្ជាក់ថា ជាគោលដៅយុទ្ធសាស្រ្ត ក្រសួងអប់រំ​បានគិតគូរ៧ជំហាន ក្នុង​ការជំរុញឱ្យមានសាលាឌីជីថលនៅកម្ពុជា ដែល​រួមមាន ៖ ទី១. ការបង្កើតប្រព័ន្ធអេកូស៊ីស្ទែមនៃការរៀន និងការបង្រៀនតាមបែបឌីជីថល, ទី២. ការបណ្ដុះបណ្ដាលគ្រូ បញ្ចូលកម្មវិធីសិក្សាថ្មីដោយបញ្ជ្រាបបមុខវិជ្ជាស្ទែម និងបញ្ញាសិប្បនិម្មិត (AI) ទៅក្នុងការរៀន និងង្រៀន, ទី៣. ការផ្ដល់មាតិកាសម្បូរបែបទៅដល់គ្រូបង្រៀន និងសិស្សានុសិស្ស, ទី៤. រចនាប្រព័ន្ធសិក្សាផ្ទាល់ខ្លួន, ទី៥. ការលើកកម្ពស់ការសិក្សាដែលផ្ដោតលើសិស្ស, ទី៦. ការជំរុញកិច្ចសហប្រតិបត្តិការរវាងភាគីពាក់ព័ន្ធ និងទី៧. ការពិនិត្យតាមដាន និងវាយតម្លៃជាប្រចាំ។

ដោយឡែកភាគីពាក់ព័ន្ធដែលចូលរួមជំរុញសាលាឌិជីថលនៅកម្ពុជាវិញ បើតាម ឯកឧត្តម ទេព ភិយ្យោរិទ្ធ គឺមាន៤ រួមមាន ទី១. ក្រសួងអប់រំ យុវជន និងកីឡា ទី២. គ្រឹស្ថានបណ្ដុះបណ្ដាលគ្រូ រួមមាន វិទ្យាស្ថានជាតិអប់រំ, វិទ្យាស្ថានគរុកោសល្យរាជធានីភ្នំពេញ, វិទ្យាស្ថានគរុកោសល្យបាត់ដំបង, សាលារៀនជំនាន់ថ្មី, សាលារៀនគំរូ ទី៣. គ្រូបង្រៀន គណៈគ្រប់គ្រងសាលា សិស្ស និងមាតាបិតាសិស្ស និងទី៤. អ្នកជំនាញ AI អ្នកបច្ចេកទេសអប់រំផ្នែកបច្ចេកវិទ្យា វិស័យឯកជន អង្គការក្រៅរដ្ឋាភិបាល និងដៃគូអភិវឌ្ឍអន្តរជាតិ។

“គ្រឹះស្ថានបណ្ដុះបណ្ដាលគ្រូ មានតួនាទីជាមជ្ឈមណ្ឌលកណ្ដាលសម្រាប់ការបណ្ដុះបណ្ដាលវិធីសាស្រ្តបង្រៀនដល់គ្រូនាយក លើការអនុវត្តការអប់រំឌីជីថល និងបញ្ញាសិប្បនិម្មិត (AI)។ សាលារៀនជំនាន់ថ្មី យកអ្វីដែលបានរៀបចំដោយគ្រឹះស្ថានបណ្ដុះបណ្ដាលគ្រូ មកបន្ថែមការរកឃើញថ្មីៗដែលល្អប្រសើរសម្រាប់យកទៅប្រើប្រាស់នៅសាលារៀនគំរូ”

ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង មានប្រសាសន៍ថា បច្ចុប្បន្ននេះ វិទ្យាស្ថានគរុកោសល្យបាត់ដំបង បាននឹងកំពុងធ្វើបញ្រ្ជាបនូវបច្ចេកវិទ្យាអប់រំ ក៏ដូចជាបញ្ញាសិប្បនិម្មិត (AI) ក្នុងការរៀន និងបង្រៀន។ ទន្ទឹមគ្នានេះ ក៏លើកទឹកចិត្តដល់គ្រូប្រៀនដែលធ្វើបានល្អ តាមរយៈការផ្ដល់ជាពានរង្វាន់ និងមានការទទួលស្គាល់ពីវិទ្យាស្ថាន។

នាយកវិទ្យាស្ថានគរុកោសល្យបាត់ដំបង បញ្ជាក់បន្ថែមថា ដើម្បីឱ្យគ្រូមានបំណិនសតវត្សទី២១ គឺគ្រូបង្រៀនចេញថ្មីត្រូវតែមាននូវវិជ្ជាសម្បទា ចរិយាសម្បទា និងបំណិនសម្បទាពេញលេញ មានន័យថា ត្រូវចេះច្បាស់បំណិនភាសាបរទេស និងបំណិនបបច្ចេកវិទ្យាឌីជីថល។

លោក ហួត ស៊ាងហៃ នាយករងនៃវិទ្យាល័យព្រះស៊ីសុវត្ថិ សាលារៀនជំនាន់ថ្មី មានប្រសាសន៍ថា ឆ្នាំសិក្សានេះ សាលាបានបណ្ដុះបណ្ដាលគ្រូរួចហើយ ដោយឱ្យគ្រូរៀបចំសំណួរប្រឡងដោយប្រើ AI ដាក់ឱ្យកូនសិស្ស ក្នុងនោះ មួយផ្នែកគ្រូជាអ្នកចេញវិញ្ញាសា ហើយមួយផ្នែកទៀត គ្រូជាអ្នកបង្កើតដោយ AI។ លើសពីនេះ បណ្ដុះបណ្ដាលគ្រូ អំពីការរៀបចំកិច្ចតែងការក្នុងការបង្រៀន រៀបចំជាស្លាយ (Slide) សម្រាប់បង្រៀនដោយប្រើប្រាស់ AI ជាដើម។

នាយករងនៃវិទ្យាល័យព្រះស៊ីសុវត្ថិ បញ្ជាក់បន្ថែមថា ដោយមានអនុសារណៈយោគយល់គ្នារវាងក្រសួងអប់រំ និងក្រសួងប្រៃសណីយ៍ វិទ្យាល័យព្រះស៊ីសុវត្ថិ សាលារៀនជំនាន់ថ្មី នឹងត្រូវទៅជួយបណ្ដុះបណ្ដាលគ្រូផ្នែកព័ត៌មានវិទ្យា នៅតាមសាលាចំនួន១៨ ក្នុងខេត្តតាកែវ នាចុងខែកុម្ភៈនេះ៕