ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ជំងឺថ្លើមប្រភេទ B និង C គឺជាជំងឺដែលបណ្តាលមកពីវីរុសប៉ះពាល់ដល់ថ្លើម។ ដូច្នេះវាមានសារៈសំខាន់សម្រាប់ប្រជាពលរដ្ឋទូទៅ ក៏ដូចជាស្រ្តីមានផ្ទៃពោះ គួរតែធ្វើតេស្តពិនិត្យរកជំងឺទាំងនេះ ដើម្បីការពារពីការរាលដាល ដែលបង្កឱ្យមានបញ្ហាធ្ងន់ធ្ងរដល់សុខភាពដូចជាកើតជំងឺថ្លើមរឹង (Cirrhosis) ឬមហារីកថ្លើម (Liver Cancer) ជាដើម។
នៅក្នុងជំនួបវេជ្ជបណ្ឌិត “ការគ្រប់គ្រងជំងឺរលាកថ្លើម និងការពិនិត្យ រកជំងឺមហារីកថ្លើម បង្កដោយវីរុស” រៀបចំដោយ សម្ព័ន្ធលុបបំបាត់ជំងឺរលាកថ្លើមប្រចាំប្រទេសកម្ពុជា កាលពីពេលថ្មីៗនេះ លោកវេជ្ជបណ្ឌិត កែវ សំឡី ប្រធានកម្មវិធីលុបបំបាត់ជំងឺរលាកថ្លើមដោយវីរុស នៃក្រសួងសុខាភិបាល មានប្រសាសន៍ថា បច្ចុប្បន្នពិភពលោកមានវ៉ាក់សាំងបង្កា និងថ្នាំព្យាបាលជំងឺរលាកថ្លើមប្រភេទបេ និងសេ ហើយ ដូចនេះបុគ្គលគ្រប់រូបគួរតែទទួលបានការចាក់វ៉ាក់សាំងបង្កាជំងឺរលាកថ្លើមប្រភេទបេ និង សេ ឱ្យបានគ្រប់ៗគ្នា ដោយនេះគឺជាដំណោះស្រាយតែមួយគត់អាចជួយកាត់បន្ថយ និងលុបបំបាត់ជំងឺរលាកថ្លើមនៅកម្ពុជា និងនៅលើពិភពលោក។
“…ជាក់ស្ដែង សម្រាប់ទារកដែលទើបនឹងកើតត្រូវទទួលថ្នាំបង្ការលាកថ្លើមប្រភេទបេ និងសេ ឱ្យបានក្នុងអំឡុងរយៈពេល២៤ម៉ោងក្រោយសម្រាល។ នេះជាការទប់ស្កាត់ការចម្លងជំងឺរលាកថ្លើមប្រភេទបេ និងសេ ពីម្ដាយទៅកូន និងជាការទប់ស្កាត់ការចម្លងជំងឺរបស់កូនពីមិត្តភក្តិនៅពេលធំឡើងក្នុងករណីមានរបួសក្នុងពេលលេងជាមួយមិត្តភក្តិ ឬវៃគ្នាលេងជាដើម”
លោកវេជ្ជបណ្ឌិតបន្តថា នៅពេលដែលកុមារទទួលបានការបង្ការតាំងពីវ័យកុមារ គឺអាចមានប្រសិទ្ធភាពខ្ពស់ ប៉ុន្តែក៏ស្ថិតទៅតាមលទ្ធភាព នៃសារពាង្គកាយរបស់កុមារផងដែរ។ លោកវេជ្ជបណ្ឌិតសង្កត់ធ្ងន់ថា ប្រសិនក្នុងករណីស្ត្រីមានផ្ទៃពោះជាម្ដាយមានផ្ទុកជំងឺរលាកថ្លើមប្រភេទបេ និងសេ ហើយទារកមិនទទួលបានថ្នាំបង្ការត្រឹមត្រូវទេ នោះទារកអាចនឹងមានភាគរយខ្ពស់ដែលអាចបង្កឱ្យកើតជាជំងឺមហារីកថ្លើមចំពោះកូន ដូចនេះការបង្ការជារឿងដ៏សំខាន់បំផុត ដែលឪពុកម្ដាយគ្រប់រូបត្រូវយកកូនទៅទទួលថ្នាំបង្ការឱ្យបានគ្រប់ចំនួនទៅតាមកម្មវិធីជាតិដែលបានកំណត់។
លោកវេជ្ជបណ្ឌិត កែវ សំឡី បន្ថែមថា កម្មវិធីដើម្បីលុបបំបាត់ជំងឺរលាកថ្លើមនឹងដើរស្របទៅនឹងគោលដៅសហស្សវត្សរ៍របស់អង្គការសុខភាពពិភពលោកក៏ដូចជាសកលលោក និងអនុវត្តក្នុងកម្មវិធីផ្នែកសុខភាពម្ដាយ និងទារក ដែលមានគោលដៅលុបបំបាត់ចំនួនបី គឺ ជំងឺអេដស៍ ជំងឺស្វាយ និងជំងឺរលាកថ្លើម ដូចនេះគ្រប់ស្ត្រីដែលមានផ្ទៃពោះទាំងអស់ត្រូវតែធ្វើតេស្តរកមើលជំងឺទាំងបីនេះ។ លោកថា ប្រសិនបើក្នុងករណីរកឃើញជំងឺណាមួយ ខាងគ្រូពេទ្យក៏អាចផ្ដល់នូវថ្នាំបង្ការដើម្បីកុំឱ្យមានមេរោគច្រើននៅពេលសម្រាល និងមិនចម្លងច្រើនទៅទារក។ «ស្រ្តីមានផ្ទៃពោះគ្រប់រូប ត្រូវតែពិនិត្យសុខភាពឱ្យបានទៀងទាត់ ជាពិសេសពិនិត្យរកជំងឺរលាកថ្លើមប្រភេទបេ និងសេ និងទទួលថ្នាំបង្កា ដោយធ្វើបែបណាកុំឱ្យមានការចម្លងពីម្ដាយទៅកូន ពីព្រោះការចម្លងពីម្ដាយទៅកូនអាចមានលទ្ធភាពច្រើនក្រោយពេលសម្រាល»។
យោងតាមរបាយការណ៍របស់អង្គការសុខភាពពិភពលោក (WHO) គេបានប៉ាន់ប្រមាណថា មានមនុស្ស ២៥៤លាននាក់នៅទូទាំងពិភពលោកកំពុងរស់នៅជាមួយជំងឺថ្លើមប្រភេទ B ក្នុងនោះ ៦៥% នៅអាហ្វ្រិក និងតំបន់អាស៊ីប៉ាស៊ីហ្វិក។ ដោយឡែកនៅប្រទេសកម្ពុជា បើយោងតាមទិន្នន័យឆ្នាំ២០២២ គឺមានប្រជាជនប្រមាណ ៥,៣៣% នៃប្រជាជនកម្ពុជាសរុបបានកើតជំងឺថ្លើម។ វេជ្ជបណ្ឌិត កែវ សំឡី លើកទឹកចិត្តដល់ប្រជាពលរដ្ឋគ្រប់រូប សូមទៅស្វែងរកសេវាពិនិត្យ និងធ្វើតេស្តសុខភាពស្វែងរកជំងឺរលាកថ្លើម ហើយធ្វើការព្យាបាលឱ្យបានទាន់ពេលវេលា ដើម្បីចូលរួមកាត់បន្ថយ និងលុបបំបាត់ជំងឺរលាកថ្លើមនៅឆ្នាំ២០៣០៕
