ទោះបីអំណានសំខាន់ និងមានគុណប្រយោជន៍ធំធេងយ៉ាងណាក្តី ក៏ប៉ុន្តែបុគ្គលមួយចំនួននៅតែងតែផ្ដេកផ្ដួល ព្រមទាំងបង្កើតហេតុផលផ្សេងៗឱ្យជាឧបសគ្គចំពោះអំណានផ្ទាល់ខ្លួន ។ ឧបសគ្គអំណានកើតឡើងដោយសារបុគ្គលមិនមានពេលវេលាគ្រប់គ្រាន់ដើម្បីអាន គ្មានទម្លាប់អាន កង្វះឯកសារអានតាមតម្រូវការ និងគ្មានគោលដៅអានឱ្យពិតប្រាកដ ។

តែបើពិនិត្យឱ្យកាន់តែច្បាស់ ឧបសគ្គប៉ុន្មានចំណុចខាងលើនេះ វាគ្រាន់តែជាហេតុផលរបស់បុគ្គលមិនចង់អានតែប៉ុណ្ណោះ ។ តើធ្វើយ៉ាងដូចម្តេចជំរុញឱ្យបុគ្គលមានឆន្ទៈអាន ឬបណ្តុះទម្លាប់អានជាប្រចាំ? ខាងក្រោមនេះជាវិធីងាយៗ ៥ចំណុចជំរុញបុគ្គលខ្លួនឯងឱ្យចូលចិត្តអំណាន និងចាំផ្តើមអានជាជំហានដំបូង ។

១. អានអត្ថបទព័ត៌មាន ៖ ទម្លាប់អានសៀវភៅអាចចាប់ផ្ដើមដោយរូបភាពអានអត្ថបទងាយស្រួលអានជាមុន ។ អត្ថបទដែលងាយស្វែងរក និងងាយស្រួលអាន គឺជាប្រភេទអត្ថបទសារព័ត៌មាន ។ តាមរយៈអត្ថបទព័ត៌មានប្រចាំថ្ងៃ អាចជួយឱ្យអ្នកអានដឹងពីព្រឹត្តិការណ៍កើតឡើងផង និងអាចជួយឱ្យអ្នកអានមើលឃើញកាន់តែច្បាស់អំពីគុណតម្លៃនៃអំណានផង ។ អត្ថបទសារព័ត៌មានជួយឱ្យអ្នកអានទទួលបានព័ត៌មានថ្មីៗ និងមិនធ្វើឱ្យអ្នកអាចធុញទ្រាន់ឡើយ ។

២. អានសៀវភៅទំព័រតិច ៖ សៀវភៅដែលមានកម្រាស់ក្រាស់ជាឧបសគ្គមួយរារាំងដល់ការអានដំបូងរបស់បុគ្គល ។ ប្រសិនបើចង់ឱ្យការអានទទួលផលល្អ និងបន្តអានជាទម្លាប់នោះ បុគ្គលគួរចាប់ផ្ដើមអានសៀវភៅដែលមានចំនួនទំព័រតិច ។ បន្តិចម្ដងៗ អ្នកអានអាចជ្រើសរើសសៀវភៅដែលមានទំព័រក្រាស់សាកល្បងអាន ។ ជាមួយគ្នានេះ អ្នកអានត្រូវកំណត់គោលដៅអាន ឬចំនួនទំព័រសៀវភៅអានដោយវិធីសាស្រ្តឆ្លាតវៃរបស់ខ្លួន ។

៣. អានផ្សាភ្ជាប់គោលដៅ ៖ ទោះបីស្ថិតនៅក្នុងរូបភាពអានដើម្បីកម្សាន្តក៏ដោយ សកម្មភាពអំណាននោះត្រូវមានគោលដៅពិតប្រាកដដែរ ។ គោលដៅនៃអំណាននេះ គឺអានចង់ដឹងព័ត៌មានអ្វីមួយ អានដើម្បីយល់ពីអត្ថន័យខ្លឹមសារសៀវភៅ ឬអានដើម្បីដឹងពីគោលគំនិតរបស់អ្នកនិពន្ធ ។ ការកំណត់គោលដៅច្បាស់លាស់មុននឹងចាប់កាន់សៀវភៅអាន ជួយឱ្យអំណានហុចផលយ៉ាងពិតប្រាកដសម្រាប់អ្នកអាន ។

៤. អានអត្ថបទអក្សរសិល្ប៍ ៖ អត្ថបទអក្សរសិល្ប៍ គឺជាប្រភេទអត្ថបទមួយដែលអាចទាក់ទាញចិត្ត ឬបណ្ដុះគំនិតរបស់បុគ្គលឱ្យចូលចិត្តអាន។ ហេតុអ្វីបានជាអត្ថបទអក្សរសិល្ប៍ជួយបណ្ដុះទម្លាប់បុគ្គលឱ្យចូលចិត្តអានសៀវភៅ ? នោះគឺដោយសារតែអត្ថបទអក្សរសិល្ប៍មានលក្ខណៈពិសេស ព្រោះអ្នកនិពន្ធបានប្រើប្រាស់វិធីសាស្ត្រសរសេរអមសិល្បៈរូបបារម្មណ៍ ដែលអាចញ៉ាំងឱ្យអ្នកអានមានជំនក់ចិត្តរាល់ពេលចាប់កាន់សៀវភៅអាន ។

៥. កត់ចំណាំពាក្យ ឬឃ្លាប្រយោគ ៖ សម្រាប់អ្នកអានដំបូង ឬអ្នកទើបចាប់ផ្ដើមអាន អ្វីដែលសំខាន់អានអមដោយការកត់ត្រាឃ្លាប្រយោគល្អៗ ឬពាក្យពេចន៍ដែលមានអត្ថន័យនៅក្នុងសៀវភៅចេញមកខាងក្រៅ ។ ការកត់ត្រា ឬការកត់ចំណាំនេះនឹងជួយបង្កើនការចងចាំកាន់តែប្រសើរសម្រាប់អ្នកអាន ហើយនឹងក្លាយជាទម្លាប់ប្រចាំថ្ងៃ ។ ការកត់ត្រានឹងជួយបង្កើនការចង់ចាំមួយកម្រិតទៀតបន្ថែមលើសកម្មភាពអំណាន ៕