ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លោកស្រី ស្រ៊ុន ម៉ាលីន ប្រធានគ្រប់គ្រងទូទៅប្រចាំ DKSH លើកឡើងថា សៀវភៅគឺជាផ្នែកមួយនៃជីវិតរបស់យើង មិនថាកុមារ ឬក៏មនុស្សពេញវ័យនោះទេ ព្រោះថាសៀវភៅ ជាប្រភពចំណេះដឹង និងជាបណ្តុំនៃព័ត៌មានផងដែរ។
ក្នុងនោះគុណសម្បត្តិនៃការអានសម្រាប់កុមារ គឺជួយឱ្យពួកគេ ទទួលបានចំណេះដឹងបន្ថែមជាពិសេសគឺការរៀនពាក្យថ្មីៗ ការប្រើប្រាស់ពាក្យពេចន៍ពេលនិយាយ ការប្រើវេយ្យាករណ៍បានត្រឹមត្រូវ និងការអភិវឌ្ឍជំនាញសរសេរឱ្យកាន់តែប្រសើរឡើងបន្ថែមមួយកម្រិតទៀត។
លោកស្រីបន្ថែមថា ការអានក៏បានបណ្តុះទឹកចិត្តកុមារឱ្យស្រឡាញ់សៀវភៅ ហើយបង្កើតជាទម្លាប់ក្នុងការអាន ដែលជាប្រយោជន៍ក្នុងដំណើរការសិក្សាកុមារផងដែរ ។ សម្រាប់មនុស្សពេញវ័យ នៅពេលដែលពួកគេចាប់ផ្តើមអានសៀវភៅបានកាន់តែច្រើន វាជំរុញឱ្យពួកគេ មានសមត្ថភាពក្នុងការគិតទូលំទូលាយ មានការត្រិះរិះពិចារណាបានត្រឹមត្រូវល្អិតល្អន់ និងជួយជាចំណែកក្នុងការដោះស្រាយបញ្ហា។ ហើយដើម្បីជំរុញ ក៏ដូចជាគាំទ្រការអានឱ្យកាន់តែមានប្រសិទ្ធភាព យើងក៏ត្រូវយកចិត្តទុកដាក់អំពីសុខភាពក្នុងការរស់នៅដូចគ្នាដែរ។
សុខភាព និងចំណេះដឹងត្រូវដើរទន្ទឹមគ្នា! ហើយការចូលរួមនៅក្នុងពិព័រណ៍សៀវភៅនេះ គឺជាការរួមចំណែកដើម្បីគាំទ្រនូវឥរិយាបថរបស់ការអាន របស់សហគមន៍ និងប្រទេសជាតិទាំងមូល ក្នុងការអភិវឌ្ឍមនុស្ស និងធនធានសម្រាប់ប្រទេសជាតិ។
លោកស្រី ស្រ៊ុន ម៉ាលីន ប្រធានគ្រប់គ្រងទូទៅប្រចាំ DKSH
តំណាងដៃគូសហការពិព័រណ៍សៀវភៅកម្ពុជាលើកទី១០ បន្ថែមថា សៀវភៅនីមួយៗ សុទ្ធតែផ្តល់នូវចំណេះដឹងផ្សេងៗគ្នា ដូចជាសៀវភៅប្រវត្តិសាស្រ្ត ភាពជាអ្នកដឹកនាំ សៀវភៅកម្សាន្ត និងការអប់រំជាដើម។ ចំពោះសៀវភៅទាំងអស់នោះ គឺយើងអាចទាញប្រយោជន៍ និងចំណេះដឹងផ្សេងៗដែលស្របនឹងតម្រូវការជាក់ស្ដែងប្រចាំថ្ងៃ ហើយចំណេះទាំងនោះ វានឹងនៅជាមួយយើងជានិច្ច។ លោកស្រីសង្កត់ធ្ងន់ថា ការអាន គឺជាការផ្តល់ឱ្យនូវចំណេះដឹង និងអនុញ្ញាតិឱ្យយើងអាចអភិវឌ្ឍខ្លួនយើង និងសង្គមជាតិ៕
