ទូតសុច្ឆន្ទៈពិព័រណ៍សៀវភៅកម្ពុជាលើកទី១០ លោក ម៉ុង ម៉ានិត លើកឡើងថា ក្នុងរយៈពេលដប់ឆ្នាំនៃការបង្កើតពិព័រណ៍សៀវភៅកម្ពុជានេះ មិនត្រឹមតែជំរុញវិស័យអំណានឱ្យបានរីកលូតលាស់តែប៉ុណ្ណោះទេ តែកម្មវិធីនេះ ប្រៀបបានជាទំនៀមទម្លាប់មួយដែលមិត្តអ្នកអាន អ្នកនិពន្ធ សិស្សានុសិស្ស ព្រមទាំងប្រជាជនខ្មែរជាច្រើនរូបតែងតែទន្ទឹមរង់ចាំជារៀងរាល់ឆ្នាំ ហើយការផ្សព្វផ្សាយការអានមិនមែនជាតួនាទីរបស់ស្ថានប័នណាមួយឡើយ តែគឺយើងទាំងអស់គ្នាចូលរួមលើកកម្ពស់។

លោក ម៉ុង ម៉ានិត បន្តថា ពិព័រណ៍សៀវភៅកម្ពុជាគឺជាព្រឹត្តិការណ៍ដ៏ធំបំផុតប្រចាំឆ្នាំ ដែលនាំមកនូវសកម្មភាពអប់រំល្អៗជាច្រើន និងការកម្សាន្តដ៏សម្បូរបែបដល់អ្នកចូលរួមទៀតផង លើសពីនេះក៏បានផ្តល់មាគ៌ាយ៉ាងរឹងមាំដល់ការចរាចរណ៍លក់សៀវភៅ ដល់អ្នកបោះពុម្ភផ្សាយ និងអ្នកនិពន្ធខ្មែរផងដែរ។

អក្សរសិល្ប៍ខ្មែរ គឺជាអត្តសញ្ញាណជាតិដ៏សំខាន់ មិនខុសពីប្រពៃណី វប្បធម៌ ប្រាង្គប្រាសាទដែលជាកេរ្តិ៍ដំណែលរបស់ដូនតាយើងឡើយ។ ពិព័រណ៍សៀវភៅកម្ពុជា បានចូលរួមចំណែកយ៉ាងធំ ក្នុងការធ្វើឱ្យវិស័យអំណាន មានប្រជាប្រិយភាពម្តងទៀត។

លោក ម៉ុង ម៉ានិត  ទូតសុច្ឆន្ទៈពិព័រណ៍សៀវភៅកម្ពុជាលើកទី១០

ទូតសុច្ឆន្ទៈពិព័រណ៍សៀវភៅលើកទី១០បន្ថែមថា ការផ្សព្វផ្សាយការអាន គឺជាតួនាទីរបស់យើងម្នាក់ៗ នៅក្នុងការថែររក្សា អភិវឌ្ឍន៍ និងពង្រីកសក្តានុភាពនៃការអាន ដែលវាជាកត្តាចម្បងក្នុងការផ្តល់នូវចំណេះសម្រាប់ប្រជាជនខ្មែរ និងដើម្បីភាពរីកម្រើន​នៃប្រទេសជាតិយើងទាំងមូល។

គួរបញ្ជាក់ថា ពិព័រណ៌សៀវភៅកម្ពុជាលើកទី១០ បានប្រព្រឹត្តទៅ​កាលពីសប្តាហ៍​កន្លងទៅ នៅសួនច្បារខាងមុខសាលាបុរីកោះពេជ្រ ដោយឆ្នាំនេះ បានធ្វើឡើងរហូត​ដល់ទៅរយៈពេល៤ថ្ងៃ ​ដោយមានស្តង់សៀវភៅរហូតដល់២២៩ស្តង់ ដែលមានការចូលរួមពីគ្រឹះស្ថានបោះពុម្ពផ្សាយ និ​ងអ្នកនិពន្ធរហូត​ដល់ ១៥២ស្ថាប័ន។ ចំណែកឯសៀវភៅ​ដែលបានដាក់តាំងតាមស្តង់នីមួយៗមានគ្រប់ប្រភេទ ដូចជា សៀវភៅបែបប្រលោមលោក សៀវភៅទស្សនវិជ្ជានិងចិត្តវិទ្យា សៀវភៅសម្រាប់កុមារ សៀវភៅប្រវត្តិវិទ្យា និងភូមិវិទ្យា សៀវភៅទាក់ទងនឹងសាសនានិងសិល្បៈ ជាដើម៕