ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កាលពីថ្ងៃទី៦ ខែមិថុនា ឆ្នាំ២០២៥កន្លងទៅនេះ លោកគ្រូអ្នកគ្រូ និងថ្នាក់ដឹកនាំជាន់ខ្ពស់ នៃបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប បានទទួលការបណ្តុះបណ្តាលស្តីពីបញ្ញាសិប្បនិម្មិត (AI) ក្នុងវិស័យអប់រំ ពីក្រុមហ៊ុន CodingGate ។ ក្នុងកម្មវិធីបើកនោះ ឧកញ៉ា ប៉ិច បូឡែន អគ្គនាយក Westline Education Group បានស្នើដល់លោកគ្រូអ្នកគ្រូ ក៏ដូចជាថ្នាក់ដឹកនាំទាំងអស់ យកចិត្តទុកដាក់ទទួលយកការបណ្តុះបណ្តាល ដើម្បីអភិវឌ្ឍចំណេះជំនាញនេះ ដោយថា បច្ចេកវិទ្យា AI នឹងជួយបង្កើនផលិតភាពការងារ ស្របតាមបរិបទសង្គមឌីជីថលនាពេលបច្ចុប្បន្ន។
បើតាមប្រសាសន៍របស់លោកឧកញ៉ា ប៉ិច បូឡែន បច្ចេកវិទ្យា AI អាចធ្វើឱ្យមនុស្សម្នាក់ ពូកែជាងមនុស្សម្នាក់ទៀត, លោកថា បច្ចេកវិទ្យានេះ មិនអាចបំបាត់ការងារមនុស្សទាំងស្រុងនោះទេ ប៉ុន្តែបច្ចេកវិទ្យានេះ នឹងជួយមនុស្សម្នាក់ទៀត ឬក្រុមហ៊ុនមួយ ឱ្យពូកែជាងក្រុមហ៊ុនមួយទៀត។ ដូច្នេះ លោកស្នើដល់លោកគ្រូអ្នកគ្រូ បុគ្គលិកថ្នាក់ដឹកនាំទាំងអស់ ត្រូវអភិវឌ្ឍចំណេះជំនាញរបស់ខ្លួន ដើម្បីបង្កើនផលិតភាពឱ្យកាន់តែប្រសើរជាងមុន។ “…ផលិតភាពរបស់យើងដែលរត់មិនទាន់ មិនមែនប្រណាំងជាមួយ AI ទេ តែប្រឡងប្រណាំងជាមួយក្រុមដែលមានបច្ចេកវិទ្យាខ្ពស់ជាងយើង”។
ទោះជា AI វានឹងជួយឱ្យមនុស្សពូកែជាងមុនក្តី តែលោកឧកញ៉ា ប៉ិច បូឡែន ស្នើដល់លោកគ្រូអ្នកគ្រូ បុគ្គលិកទាំងអស់ សូមប្រើដោយទំនួលខុសត្រូវ ប្រើដោយប្រយ័ត្នប្រយ៉ែង ហើយប្រើជាប្រយោជន៍ តាមរយៈការសិក្សាស្រាវជ្រាវ។
ក្នុងឱកាសនោះ លោក សុខ សុភមង្គល នាយកប្រតិបត្តិ នៃក្រុមហ៊ុន Codingate Technology មានប្រសាសន៍ថា WEG នឹងឈានជើងចូលទៅទីផ្សារអន្តរជាតិ ដូច្នេះការអភិវឌ្ឍសមត្ថភាព គឺជារឿងសំខាន់។ យ៉ាងណាលោកថា បច្ចេកវិទ្យា AI មិនមែនចូលមកជំនួសយើងនោះទេ ប៉ុន្តែវាមកបង្កើនប្រសិទ្ធភាព ដើម្បីឱ្យក្រុមហ៊ុនកាន់តែមានការប្រកួតប្រជែង។ “ពេលដែលបច្ចេកវិទ្យាចូលមក គឺផលគុណនៃប្រសិទ្ធភាពគឺ ២ ទៅ៤ដង មានន័យថា យើងបំពាក់បច្ចេកវិទ្យាប្រព័ន្ធគ្រប់គ្រង ឬបច្ចេកវិទ្យាណាមួយចូលទៅក្នុងដំណើរការប្រតិបត្តិការប្រចាំថ្ងៃរបស់យើង វាអាចជួយយើង២ ទៅ៤ដង”។
សូមជំរាបជូនថា សម្រាប់វគ្គបណ្តុះបណ្តាលបញ្ញាសិប្បនិម្មិត ក្នុងវិស័យអប់រំនេះ លោកគ្រូអ្នកគ្រូ ក៏ដូចជាថ្នាក់ដឹកនាំជាន់ខ្ពស់ នៃបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប ទទួលបានការបណ្តុះបណ្តាលពី ការប្រើប្រាស់ AI ក្នុងការសរសេរលិខិតរដ្ឋបាល, ការប្រើប្រាស់ AI សរសេរគោលការណ៍ និងរៀបចំអត្ថាធិប្បាយការងារបុរគ្គលិក, ការប្រើប្រាស់ AI សម្រាប់ការរៀបចំកម្មវិធីសិក្សា, ក៏ដូចជាការប្រើប្រាស់ AI សម្រាប់ផ្នែកលក់ និងទីផ្សារជាដើម៕
