ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងសុន្ទរកថាបិទសិក្ខាសាលាអប់រំស្តីពី «ការកសាងអត្តចរិតជាវិជ្ជមានរបស់យុវជនដើម្បីចូលរួមអភិវឌ្ឍសង្គមជាតិ» នៅថ្ងៃទី២០ ខែតុលា ឆ្នាំ២០២៣ លោក គង់ សំនៀង ប្រធានសហព័ន្ធសេវាអប់រំនៅកម្ពុជា លើកឡើងថា ការអភិវឌ្ឍសមត្ថភាពយុវជន ជាកត្តាចម្បងដើម្បីរុញសេដ្ឋកិច្ចជាតិទៅមុខ តែដើម្បីចម្លងយុវជនឱ្យក្លាយជាមូលធនមនុស្សបាន ការយកចិត្តទុកដាក់លើការអភិវឌ្ឍកុមារ និងអ្នកបណ្តុះបណ្តាលយុវជនរឹតតែមិនអាចខ្វះបាន។
លោក គង់ សំនៀង ប្រធានសហព័ន្ធសេវាអប់រំនៅកម្ពុជា និងអគ្គនាយករងក្រុមហ៊ុន វេសឡាញ អេឌ្យូខេសិន គ្រុប បញ្ជាក់ថា ស្របពេលប្រទេសកម្ពុជា កំពុងអភិវឌ្ឍខ្លួនឆ្ពោះទៅរកប្រទេសចំណូលមធ្យមកម្រិតខ្ពស់ត្រឹមឆ្នាំ២០៣០ ការចូលរួមចំណែករបស់យុវជនដែលពោរពេញដោយសមត្ថភាព ចំណេះ ជំនាញ ផ្នត់គំនិត និងអត្តចរិតវិជ្ជមាន ជាកម្លាំងចលករដ៏សំខាន់ដើម្បីសម្រេចគោលដៅរបស់រាជរដ្ឋាភិបាល។
បើតាមប្រធានសហព័ន្ធសេវាអប់រំនៅកម្ពុជារូបនេះ ការអភិវឌ្ឍសមត្ថភាពយុវជនសំខាន់មែន ប៉ុន្តែដើម្បីបណ្តុះយុវជនជាមូលធនមនុស្សបាន យើងមិនត្រូវភ្លេចពីការអភិវឌ្ឍលើកុមារ និងអ្នកផ្ទេរចំណេះដឹង ឬអ្នកបណ្តុះបណ្តាលយុវជននោះទេ។ យុវជន ដែលនៅចំណុចកណ្តាលត្រូវការការសំលៀង ដុសខាត់ ដើម្បីឱ្យឫសរឹងមាំតាំងពីក្មេង ហើយបន្តអភិវឌ្ឍសមត្ថភាពរបស់ខ្លួនតាមរយៈការណែនាំ បណ្តុះបណ្តាល តម្រង់ទិសពីលោកគ្រូ អ្នកគ្រូ ក៏ដូចជាមជ្ឈដ្ឋានជុំវិញខ្លួនបន្ថែមទៀត។
អភិវឌ្ឍសមត្ថភាពយុវជនសំខាន់ តែការអប់រំបណ្តុះបណ្តាលកុមារ និងអ្នកបណ្តុះបណ្តាលយុវជន រឹតតែត្រូវការយកចិត្តទុកដាក់ដើម្បីជាស្ពានអភិវឌ្ឍសមត្ថភាពយុវជន និងសង្គមជាតិទាំងមូល
លោក គង់ សំនៀង ប្រធានសហព័ន្ធសេវាអប់រំនៅកម្ពុជា
ជាមួយគ្នានេះ ប្រធានសហព័ន្ធសេវាអប់រំនៅកម្ពុជា ក៏បានកោតសរសើរ និងថ្លែងអំណរគុណជាខ្លាំងដល់ លោកគ្រូ អ្នកគ្រូ អ្នកបណ្តុះបណ្តាល ព្រមទាំងរៀមច្បង ដែលបានលះបង់ពេលវេលាចូលរួមសិក្ខាសាលាអប់រំពេញមួយថ្ងៃដើម្បីទទួលបានពុទ្ធិថ្មីៗទៅបង្ហាត់បង្រៀន បណ្តុះបណ្តាល ក៏ដូចជាចែករំលែកដល់យុវជនជំនាន់ក្រោយ។
សូមបញ្ជាក់ថា ក្រុមហ៊ុន ហ្រ្វែងខ្លីន ខូវី អេឌ្យូខេសិន ប្រចាំនៅកម្ពុជា នៅថ្ងៃទី២០ ខែតុលា ឆ្នាំ២០២៣ បានរៀបចំសិក្ខាសាលាអប់រំស្តីពី «ការកសាងអត្តចរិតជាវិជ្ជមានរបស់យុវជនដើម្បីចូលរួមអភិវឌ្ឍសង្គមជាតិ» នៅសាកលវិទ្យាល័យខេមតិច ដែលធ្វើបទបង្ហាញ និងចូលរួមជជែកពិភាក្សាដោយអ្នកជំនាញក្នុងវិស័យអប់រំល្បីៗ ទាំងនៅប្រទេសកម្ពុជា និងអាម៉េរិក ដើម្បីចែករំលែកចំណេះដឹង និងជំរុញការស្វែងយល់ស៊ីជម្រៅបន្ថែម លើការកសាងផ្នត់គំនិត ការពង្រឹងអត្តចរិតជាវិជ្ជមាន ដល់យុវជន និងជំរុញការចូលរួមអភិវឌ្ឍខ្លួន គ្រួសារ សហគមន៍ និងសង្គមជាតិកម្ពុជាទាំងមូល៕
