ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អគ្គនាយកដ្ឋានយុវជន នៃក្រសួងអប់រំ យុវជន និងកីឡា បានប្រកាសជ្រើសរើសប្រតិភូកុមារតំណាងប្រទេសកម្ពុជាចំនួន៤រូប ចូលរួមក្នុងសន្និសីទកុមារអាស៊ី-ប៉ាស៊ីហ្វិក (APCC) ដែលនឹងធ្វើឡើងចាប់ពីថ្ងៃទី១១ ដល់ថ្ងៃទី២២ ខែកក្កដា ឆ្នាំ២០២៥ ខាងមុខ នៅទីក្រុងហ្វូគូអូកា ប្រទេសជប៉ុន។ ក្នុងនោះសិស្សចំនួនបួននាក់ (ស្រី២នាក់ និងប្រុស២នាក់) នឹងត្រូវជ្រើសរើស ដើម្បីផ្លាស់ប្ដូរវប្បធម៌ លើកកម្ពស់កិច្ចសហប្រតិបត្តិការ និងការប្រាស្រ័យទាក់ទងគ្នារវាងកុមារមកពី៤០ប្រទេសផ្សេងៗក្នុងតំបន់។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា កិច្ចប្រជុំកុមារអាស៊ី-ប៉ាស៊ីហ្វិក (APCC) បង្កើតឡើងចាប់តាំងពីឆ្នាំ១៩៨៩ នៅក្នុងតំបន់អាស៊ីប៉ាស៊ីហ្វិក ក្នុងគោលបំណងបង្កើតទំនាក់ទំនងរវាងកុមារក្នុងតំបន់ឱ្យមានភាពស្និតស្នាល និងអភិវឌ្ឍសមត្ថភាពកុមារឱ្យយល់ដឹងអំពីវប្បធម៌ អរិយធម៌ និងទម្លាប់ក្នុងការរស់នៅរបស់កុមារតាមប្រទេសនីមួយៗ។ សម្រាប់កម្ពុជាបានចូលរួមក្នុងកិច្ចប្រជុំកុមារអាស៊ី-ប៉ាស៊ីហ្វិក (APCC) នេះនៅឆ្នាំ២០១១ ដោយមានកុមារចំនួនពី៤ទៅ៦នាក់ចូលរួមក្នុងកម្មវិធីនេះ ជារៀងរាល់ឆ្នាំ។
យ៉ាងណាក៏ដោយសម្រាប់លក្ខខណ្ឌនៃការជ្រើសរើសប្រតិភូកុមារសម្រាប់ឆ្នាំនេះ រួមមាន បេក្ខជនត្រូវតែមានសញ្ជាតិខ្មែរ, កំពុងសិក្សាតាមគ្រឹះស្ថានរដ្ឋ និងឯកជន, ត្រូវមានថ្ងៃខែឆ្នាំកំណើត ចន្លោះថ្ងៃទី០១ ខែសីហា ឆ្នាំ២០១៣ ដល់ថ្ងៃទី៣១ ខែកក្កដា ឆ្នាំ២០១៤ (អាយុ១០-១១ឆ្នាំ) និងរ៉ាប់រងការចំណាយចុះឈ្មោះចូលរួមកម្មវិធីដោយខ្លួនឯង។
អគ្គនាយកដ្ឋានយុវជន នឹងជ្រើសរើសបេក្ខជនដែលមានចំណាប់អារម្មណ៍ចង់ជួបមនុស្សថ្មីៗ, អាចចែករំលែកពីវប្បធម៌ ទំនៀមទម្លាប់ ប្រពៃណីក្នុងតំបន់, មានចិត្តរំភើបនឹងការភ្លក់រសជាតិអាហារ និងបទពិសោធន៍ថ្មីៗ, ក្លាហានចាកចេញពីតំបន់សុខស្រួលរបស់ខ្លួន និងមិនត្រូវបន្តដំណើរកម្សាន្តពេលដល់ថ្ងៃកំណត់។
សម្រាប់អត្ថប្រយោជន៍ដែលបេក្ខជនទទួលបានរួមមាន ចូលរួមកម្មវិធីតម្រង់ទិសមុនពេលចេញដំណើរដោយមន្ត្រីផ្នែកទំនាក់ទំនងរបស់ APCC, ទទួលបានសំបុត្រយន្តហោះទៅមកពីភ្នំពេញទៅទីក្រុងហ្វូគូតា, ការធ្វើដំណើរក្នុងប្រទេសជប៉ុន តាមការកំណត់ដោយ APCC ឬក្រុមគ្រួសារម្ចាស់ផ្ទះ, ការស្នាក់នៅក្នុងប្រទេសជប៉ុន ឬនៅបរទេស ដូចដែលបានកំណត់ដោយ APCC ឬក្រុមគ្រួសារម្ចាស់ផ្ទះ និងទទួលបានអាហារក្នុងអំឡុងពេលស្នាក់នៅទីក្រុងហ្វូគូអូកា។
បេក្ខជនដែលចាប់អារម្មណ៍ចង់ចូលរួមក្នុងសន្និសីទកុមារអាស៊ី-ប៉ាស៊ីហ្វិច (APCC) ដែលនឹងធ្វើឡើងចាប់ពីថ្ងៃទី១១ដល់ថ្ងៃទី២២ ខែកក្កដា ឆ្នាំ២០២៥ នៅទីក្រុងហ្វូគូកា ប្រទេសជប៉ុន អាចចុះឈ្មោះតាមរយៈតំណភ្ជាប់ https://rebrand.ly/APCC2025 ។ កាលបរិច្ឆេទផុតកំណត់ទទួលពាក្យថ្ងៃទី២០ ខែមករា ឆ្នាំ២០២៥ វេលាម៉ោង ៥:០០ នាទីល្ងាច៕
