ពិធីប្រកាសពានរង្វាន់ Hugo Awards ប្រចាំឆ្នាំ២០២៣ បានប្រព្រឹត្តិទៅក្រោមបរិយាកាសដ៏រីករាយមានអត្ថន័យបំផុតសម្រាប់អ្នកនិពន្ធ និងអ្នកវិទ្យាសាស្ត្រ ព្រមទាំងទទួលបានការចាប់អារម្មណ៍យ៉ាងខ្លាំងពីអ្នកសារព័ត៌មានកាលពីរាត្រីថ្ងៃសៅរ៍កន្លងទៅ ។ អ្នកនិពន្ធជនជាតិចិនលោក Hai Ya បានក្លាយជាម្ចាស់ពានរង្វាន់ Hugo Awards ឆ្នាំ២០២៣ លើស្នាដៃប្រលោមលោកចំណងជើងថា “The Space-Time Painter” ដែលជាស្នាដៃតែងនិពន្ធបែបវិទ្យាសាស្ត្រល្អផ្តាច់គេប្រចាំឆ្នាំ ។

កម្មវិធីនេះបានប្រព្រឹត្តិទៅនៅក្នុងសន្និបាតប្រតិដ្ឋវិទ្យាសាស្រ្តពិភពលោកលើកទី៨១ (The World Science Fiction Convention) នៅទីក្រុង Chengdu ភាគនិរតីនៃប្រទេសចិន ។ ប្រទេសចិនបានអភិវឌ្ឍន៍ទីក្រុង Chengdu ជាទីក្រុងរីកចម្រើនបច្ចេកវិទ្យា និងត្រៀមខ្លួនសម្រាប់សន្និបាតប្រតិដ្ឋវិទ្យាសាស្រ្តពិភពលោកឆ្នាំ២០២៣ ។ នេះបើតាមការចុះផ្សាយរបស់ CGTN របស់ចិន ។

លោក Hai Ya បានក្លាយជាអ្នកនិពន្ធផ្នែកប្រតិដ្ឋវិទ្យាសាស្រ្តទី៣ របស់ចិនដែលទទួលបានពានរង្វាន់ Hugo Awards បន្ទាប់ពីលោក Liu Cixin និងលោក Hao Jingfang ។ បន្ទាប់ពីទទួលបានពានរង្វាន់នេះ លោក Hai Ya បាននិយាយថា លោកមានចំណង់ចំណូលចិត្តទៅនឹងគំនិតស្រមើស្រមៃបែបវិទ្យាសាស្ត្រតាំងពីកុមារភាព ។ ការតែងនិពន្ធដែលមានគំនិតវិទ្យាសាស្ត្រខ្ពស់ជួយឱ្យអ្នកអានមានចំណេះដឹងជីវិតទូលំទូលាយ ។ ចំណែកការដាក់បញ្ចូលគំនិតរបស់លោកទៅក្នុងកម្រងសំណេរប្រលោមលោក ជួយឱ្យមនុស្សយល់កាន់តែច្បាស់ពីគុណតម្លៃនៃវិទ្យាសាស្ត្រ និងហ៊ានបង្កើតក្តីស្រមៃដែលអាចទៅរួច ។

តាមការបញ្ជាក់របស់លោក Hai Ya ប្រលោមលោក The Space-Time Painter បានបោះពុម្ពក្នុងឆ្នាំ២០២២ ។ គំនិតតែងប្រលោមលោកនេះឡើងគឺផ្អែកតាមបទពិសោធន៍ជីវិតរបស់វិចិត្រករជនជាតិចិនដ៏ប៉ិនប្រសប់ម្នាក់ឈ្មោះ Wang Ximeng ដែលបានបង្កើតគំនូរទេសភាពប្រវែង ១២ម៉ែត្រ និយាយពីលំហទេសភាពកំពូលភ្នំរាប់ពាន់ និងទន្លេ ។ ស្នាដៃ The Space-Time Painter បានបង្ហាញពីទស្សនទានគំនិតវប្បធម៌ចិន គំនិតនយោបាយ ការរីកចម្រើនសង្គមនិងបច្ចេកវិទ្យា ព្រមទាំងបទពិសោធន៍ជីវិតនានា ។

សូមបញ្ជាក់ថា សន្និបាតប្រតិដ្ឋវិទ្យាសាស្រ្តពិភពលោកលើកទី៨១ នៅទីក្រុង Chengdu ប្រទេសចិន មានវាគ្មិនកត្តិយសអញ្ជើញចូលរួមសរុបប្រមាណជាង ១ពាន់ពីររយនាក់ និងអ្នកពាក់ព័ន្ធចូលរួមជាង ២ម៉ឺននាក់មកពី ៣៥ប្រទេស ។ សន្និបាតវិទ្យាសាស្ត្រនេះ បានជជែកពិភាក្សាលើប្រធានបទវិទ្យាសាស្រ្តពាក់ព័ន្ធចំនួនជាង ២០០ ចាប់ពីថ្ងៃទី១៨ ដល់ថ្ងៃទី២២ ខែតុលា ឆ្នាំ២០២៣ ។ ពានរង្វាន់ Hugo Awards បង្កើតឡើងកាលពីឆ្នាំ១៩៥៣ គឺជាពានរង្វាន់ប្រចាំឆ្នាំដែលប្រគល់ដោយសមាគមការប្រតិដ្ឋខាងវិទ្យាស្ត្រពិភពលោក ដើម្បីរំលឹកអ្នកនិពន្ធលោក Hugo Gernsback ៕