ឪពុកអ្នកម្តាយគ្រប់រូបតែងតែចង់ឃើញកូនរបស់ខ្លួនមានការលូតលាស់ពីវ័យកុមារទៅវ័យជំទង់បានយ៉ាងល្អប្រសើរ និងពីវ័យជំទង់ទៅមនុស្សពេញវ័យប្រកបដោយចំណេះដឹង និងសមត្ថភាពខ្ពស់។ ទន្ទឹមគ្នានេះ ឪពុកអ្នកម្តាយជាច្រើនតែងចង់ឱ្យកូនរៀនភាសាទី២ ឱ្យឆាប់ចេះលឿន ព្រោះគិតដល់អនាគតនៃទីផ្សារការងាររបស់កូន។ តើឪពុកម្ដាយគួរដឹងអ្វីខ្លះមុនសម្រេចចិត្តឱ្យកូនរៀនភាសាទី២ ?

អ្នកស្រី យូ បូរី ស្ថាបនិកនៃក្រុមហ៊ុន TEDP និងឯកទេសប្រព័ន្ធ KPI មានប្រសាសន៍ថា តាមការស្រាវជ្រាវ កុមារនៅកម្រិតបឋមសិក្សា អាចរៀនរហូតដល់ទៅ៥ភាសាក្នុងពេលជាមួយគ្នា ប៉ុន្តែត្រូវបង្រៀនភាសានីមួយៗឱ្យបានត្រឹមត្រូវ ទាំងវេយ្យាករណ៍ ការសរសេរ ការអាន ទើបធ្វើឱ្យក្មេងចាប់បានល្អ និងចេះច្បាស់ដូចភាសាកំណើររបស់ខ្លួន។

អ្នកជំនាញរូបនេះ បញ្ជាក់បន្ថែមថា អាយុដែលសក្ដិសមបំផុតក្នុងការរៀនភាសាទី២ គឺចាប់ពីកុមារចូលរៀននៅថ្នាក់ទី១ ពោលគឺចាប់ពីអាយុ៧ឆ្នាំរហូតដល់អាយុ១៥ឆ្នាំ ជារយៈពេលមួយល្អប្រសើរបំផុតក្នុងការរៀនភាសាទី២។ ដោយឡែក​សម្រាប់កុមារ​នៅអាយុ១៥ឆ្នាំ ដែលជាវ័យជំទង់ ប៉ុន្តែទើបចាប់ផ្ដើមចង់រៀនភាសាទី២ ក៏អាចឆាប់ចាប់បានដូចគ្នា ព្រោះជាវ័យមានការច្នៃប្រឌិត ចេះស្រាវជ្រាវបានល្អប្រសើរជាងកុមារ អាចថ្លឹងថ្លែងបានល្អជាងកុមារ ប៉ុន្តែតុងសំឡេង កុមារបញ្ចេញសំឡេងបានល្អជាង។ មានន័យថា មនុស្សពេញវ័យ ចាប់ផ្ដើមរៀនភាសាទី២ អាចមានប្រសិទ្ធភាពដូចក្មេងដែរ ប្រសិនបើដាក់ចិត្ត និងខិតខំរៀន។

“ផលវិជ្ជមាននៃការរៀនភាសាទី២ តាំងពីតូច គឺកុមារឆាប់ចាប់បាន អាចប្រើប្រាស់បានដូចភាសាកំណើត។ ប៉ុន្តែក៏មានផលអវិជ្ជមានដែរ ប្រសិនបើភាសាទី២ ប្រើប្រាស់ច្រើនពេកក្នុងការសន្ទនាប្រចាំថ្ងៃ ដែលធ្វើឱ្យភាសាទី២ ក្លាយជាភាសាដែលមានឥទ្ធពលខ្លាំងពេក នឹងនាំឱ្យកុមារភ្លេចភាសាកំណើតរបស់ខ្លួន ដែលប៉ះពាល់ដល់វប្បធម៌នៃអក្សរសាស្រ្តជាតិ”

អ្នកស្រី យូ បូរី ក៏លើកទឹកចិត្តដល់ឪពុកម្ដាយគ្រប់រូប គួរតែមានការរៀនភាសាមួយឱ្យបានច្បាស់លាស់ដល់កូនជាមុនសិន ជាពិសេសភាសាកំណើតរបស់ខ្លួន។ ដោយថា នៅផ្ទះបើជ្រើសរើសរៀនភាសាណា សូមឱ្យរៀនឱ្យច្បាស់លាស់ ពេលនិយាយកុំនិយាយលាយភាសាពីរចូលគ្នាដែលធ្វើឱ្យកុមារបែងចែកមិនច្បាស់លាស់។ ផលប៉ះពាល់ខ្លាំងនៅពេលចេញទៅបំពេញការងារ ឬប្រើប្រាស់ភាសាជាផ្លូវការ ធ្វើឱ្យពួកគេពិបាកនិយាយភាសាកំណើតរបស់ខ្លួន។

អ្នកគ្រូ កឹម ច័ន្ទលក្ខិណា គ្រូបង្រៀនភាសាអង់គ្លេស នៃសាលារៀនជំនាន់ថ្មី វិទ្យាល័យព្រែកលៀប មានប្រសាសន៍ថា ការរៀនភាសាសុទ្ធតែមានសារសំខាន់ មិនថា ភាសាអង់គ្លេស ភាសាចិន ភាសាជប៉ុន ឱ្យតែរៀនចេះសុទ្ធតែផ្ដល់អត្ថប្រយោជន៍។ អ្នកគ្រូបន្តថា បច្ចុប្បន្ន ភាសាអង់គ្លេស នៅតែជាភាសាសំខាន់មួយក្នុងចំណោមភាសាផ្សេងៗដែលកូនសិស្សទាំងអស់គ្នាគួរតែខិតខំ ព្រោះភាសាអង់គ្លេសជាភាសាសកលដែលត្រូវការយកទៅប្រើប្រាស់ ជាពិសេសសម្រាប់កូនសិស្សដែលចូលទៅថ្នាក់ឧត្តមសិក្សា គឺរឹតតែសំខាន់សម្រាប់ការស្រាវជ្រាវឯកសារផ្សេងៗ។

អ្នកគ្រូ កឹម ច័ន្ទលក្ខិណា បន្ថែមថា ដើម្បីឱ្យការរៀនភាសាអង់គ្លេសជាភាសាទី២ ឱ្យមានប្រសិទ្ធភាព សិស្សានុសិស្សអាចចាប់ផ្ដើមនៅពេលណាក៏បាន ពោលគឺនៅពេលដែលត្រៀមខ្លួនរួចរាល់។ អ្នកគ្រូបន្តថា ឱ្យតែអ្នករៀនព្យាយាមយកចិត្តទុកដាក់នៅក្នុងការរៀន ហើយយកវាមកអនុវត្តឱ្យបានច្រើន នោះការរៀនភាសានឹងមានប្រសិទ្ធភាព ហើយមិនមែនចាប់ផ្ដើមរៀនចាប់តាំងពីអាយុក្មេង ៤ទៅ៥ឆ្នាំ ចូលទៅរៀនភាសាទើបចេះនោះទេ។

គ្រូបង្រៀនភាសាអង់គ្លេស នៃសាលារៀនជំនាន់ថ្មី វិទ្យាល័យព្រែកលៀប រូបនេះ បញ្ជាក់ថា អ្នកគ្រូផ្ទាល់ ជាអ្នកកើតនៅខេត្តពេលនៅពីក្មេងអាយុ ៤ទៅ៥ ឆ្នាំ មិនទាន់បានស្គាល់ភាសាអង់គ្លេសនោះទេ គឺទើបបានចូលរៀនភាសាអង់គ្លេស​នៅអាយុ១០ឆ្នាំជាងក្នុងកម្រិតថ្នាក់អនុវិទ្យាល័យប៉ុណ្ណោះ។ ដូច្នេះឱ្យតែយកចិត្តទុកដាក់ ខិតខំព្យាយាមរៀន ហើយអនុវត្តក្នុងការរស់នៅប្រចាំថ្ងៃ នឹងអាចរៀនភាសាទី២ ដោយប្រសិទ្ធភាព។

បើតាមសៀវភៅការអភិវឌ្ឍភាសា និងទ្រឹស្ដីនៃការអភិវឌ្ឍកុមារ របស់ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បង្ហាញថា អាយុរបស់កុមារមានតួនាទីយ៉ាងសំខាន់ ក្នុងការរៀនភាសាទី២។ កុមារធំអាចរៀនភាសាទី២ បានលឿនជាងក្មេងតូច ដោយសារគេអាចរៀនវិធានវេយ្យាករណ៍ និងរៀនពាក្យ និងបញ្ញត្តិបានលឿនជាងកុមារដែលនៅតូច។ ក៏ប៉ុន្តែ កុមារដែលនៅក្មេងអាចរៀននិយាយបានល្អ និងច្បាស់ជាមនុស្សធំ ដោយសារនៅក្មេងកុមារមានសមត្ថភាពក្នុងការញែកសំឡេង និងធ្វើត្រាប់តាមបានល្អជាងមនុស្សធំ។

កត្តាមួយទៀតមានតួនាទីសំខាន់ខ្លាំងដែរ នៅក្នុងការរៀនភាសា គឺអ្នកសិក្សាត្រូវធ្វើសមាហរណកម្មទាំងផ្នែកសង្គម និងចិត្តសាស្ត្រ ចូលទៅក្នុងវប្បធម៌នៃភាសាថ្មីនេះតែម្តង។ ម្យ៉ាងវិញទៀត ដើម្បីរៀនភាសាបរទេសបានចេះច្បាស់លាស់ អ្នកសិក្សាត្រូវមានការលើកទឹកចិត្ត និងគោលដៅបានច្បាស់លាស់ដែរ៕