អភិវឌ្ឍន៍ស្មារតីរឭកដឹង ទាមទារឱ្យចេះរកភាពរីរាយក្នុងរឿងសាមញ្ញៗ ផ្តោតលើដំណើរការ នៃរាងកាយខ្លួនឯង កាត់បន្ថយការគិតអវិជ្ជមាន រួមទាំងប្តេជ្ញា​ឱ្យបានខ្ពស់ក្នុងការប្រព្រឹត្តឱ្យបានជាប្រចាំ។ គេហទំព័រ Wealth Of Geeks បានលម្អិតអំពីមូលហេតុទាំងនេះនៅខាងក្រោម។

១. រកភាពរីករាយក្នុងរឿងសាមញ្ញៗ ៖ កាត់បន្ថយភាពងប់ងល់ទៅនឹងការធ្វើឱ្យអារម្មណ៍ល្អប្រសើរតាមរយៈរឿងរ៉ាវធំៗ ឬក៏ចំណាយពេលស្ទើរពេញមួយថ្ងៃ ឬមួយយប់ ទើបអាចរកភាពរីករាយបាន។ ជំនួសមកវិញនូវការរៀនរីករាយរាល់ចំណុចតូចៗ ឬពេញចិត្តជាមួយសកម្មភាពប្រចាំថ្ងៃ។ ប្រសិនបើមានបញ្ហានៅកន្លែងធ្វើការ ឬមិនពេញចិត្តជាមួយសកម្មភាពអ្វីមួយ ការចំណាយពេលបន្តិចទៅគិតអំពីថា តើសកម្មភាពបែបណាដែលអាចផ្តល់នូវភាពរីករាយបានទោះបីជាស្ថិតក្នុងលក្ខខណ្ឌតិចតួចក្ដី ឧទាហរណ៍ មើលឯកសារសត្វ សម្លឹងមើលបរិយាកាសខាងក្រៅ ឬក៏ដើរជុំវិញការិយាល័យ និងងាកក្រៅបង្អួចដើម្បីស្រូបខ្យល់ជាដើម។

២. ផ្តោតលើរាងកាយខ្លួនឯង ៖ ការពិនិត្យ ឬទ្រឹងជញ្ជឹងគិតយកចិត្តទុកដាក់អំពីស្ថានភាព នៃរាងកាយខ្លួនឯង គឺជាគន្លឹះមួយដ៏សាមញ្ញ និងអាចអនុវត្តន៍ជាប្រចាំដើម្បីពង្រឹងស្មារតីរឮកដឹង ដូចជាសង្កេតអំពីដំណើរ ចលនារាងរាយ នៃផ្នែកនីមួយៗ ថាតើអ្នកមានអារម្មណ៍បែបណា និងត្រូវប្រាកដចិត្តថា បានយកចិត្តទុកដាក់គ្រប់ផ្នែកទាំងអស់នៃរាងកាយ។

៣. បញ្ចៀសការផ្តោតលើភាពអវិជ្ជមាន ៖ កុំគិតអវិជ្ជមាន ជាប្រយោគមួយឃ្លា ដែលងាយស្រួលនិយាយ តែមិនងាយនឹងអនុវត្តន៍នោះទេ។ មានការសិក្សាមួយបានបង្ហាញថា ៨០ភាគរយនៃការគិតរបស់មនុស្សគឺមានទំនោរផ្តោតទៅលើភាពអវិជ្ជមាន។ ហើយគន្លឹះដែលអាចទប់នឹងការគិតបែបនេះបាន គឺទាល់តែព្យាយាមសម្រួចទម្លាប់ការគិតប្រចាំថ្ងៃជាមួយនឹងផ្នត់គំនិតវិជ្ជមាន ឬព្យាយាមផ្តោតតែលើរឿងល្អៗឱ្យបានច្រើន។ កាលដែលមានទម្លាប់គិតអ្វីដែលផ្តល់នូវភាពរីករាយ ដូចជាគិតអំពីសត្វចិញ្ចឹម ឬក៏ទៅក្រៅជាមួយមនុស្សស្និទ្ធស្នាលណាម្នាក់ សុទ្ធសឹងតែជាចំណែកជួយជំរុញការគិតឱ្យមានភាពល្អប្រសើរជាងមុន ហើយជារឿយៗ គួរគិតអ្វីដែលអាចទៅរួច ជំនួសឱ្យការគិតថាមិនអាចធ្វើបាន។

៤. ឧស្សាហ៍ព្យាយាម ៖ មិនខុសពីកាតព្វកិច្ចដទៃនោះទេ មិនថាកាត់បន្ថយការកម្សាន្ត កាត់បន្ថយស្រ្តេស ឬការធ្វើឱ្យខ្លួនឯងមានស្មារតីរឭកដឹងជាប្រចាំនោះទេ ចាំបាច់ទាមទារឱ្យឧស្សាហ៍ព្យាយាមក្នុងធ្វើឱ្យបានទៀងទាត់ប្រចាំថ្ងៃ គឺទាល់តែដាក់ការប្តេជ្ញា និងប្រឹងប្រែងខ្ពស់ ទើបអាចទទួលលទ្ធផលល្អ។ ព្យាយាមបន្តហាត់ពត់ លត់ដំស្មារតីមិនថាស្ថិតក្នុងកាលៈទេសៈ រវល់យ៉ាងណានោះទេ សូមកុំប្រើលេសក្នុងការគេចវេស ព្រោះអាចនឹងផ្តល់ផលមិនល្អនៅពេលខាងមុខ៕