នៅ​ក្នុង​កិច្ច​សន្ទនា​ជាន់ខ្ពស់​រវាងរដ្ឋមន្រ្តីសហគមន៍​សង្គម-វប្បធម៌អាស៊ាន ជាមួយឥស្សរជនជាន់ខ្ពស់សហគមន៍សង្គម-វប្បធម៌អាស៊ាន លើការអភិវឌ្ឍន៍ផែនការយុទ្ធសាស្រ្តសហគមន៍សង្គម-វប្បធម៌អាស៊ាន ក្រោយឆ្នាំ២០២៥ កាលពីពេលថ្មីៗនេះនៅ​ទីក្រុងវៀងចន្ទន៍ សាធារណរដ្ឋប្រជាធិបតេយ្យប្រជាមានិតឡាវ កម្ពុជា​បានស្នើឱ្យ​អាស៊ានពិចារណា ក្នុងការ​បង្កើត​ក្របខណ្ឌអភិវឌ្ឍការអប់រំ និង​ជំនាញក្នុងតំបន់ ដែលសមស្របសម្រាប់​កម្លាំង​ពលកម្ម​នាពេលអនាគត។

លោកបណ្ឌិត នាក់ ចិន្តារិទ្ធិ នាយកវិទ្យាស្ថាន​សិក្សា​អន្តរជាតិ និង​គោល​នយោបាយ​សាធារណៈ ក្នុងនាមជាជាឥស្សរជនជាន់ខ្ពស់សហគមន៍សង្គម-វប្បធម៌អាស៊ានកម្ពុជា បានលើកឡើងថា ការបង្កើតក្របខណ្ឌអភិវឌ្ឍការអប់រំ និងជំនាញក្នុងតំបន់ ដែលសមស្របសម្រាប់កម្លាំងពលកម្មនាពេលអនាគត ដែល​ក៏​រួមមានការ​ពង្រីក​លទ្ធភាពទទួលបាន​វគ្គបណ្តុះបណ្តាល​វិជ្ជាជីវៈ (TVET) គឺដើម្បីធានាបានថា មូលធន​មនុស្ស​របស់យើង​នៅ​តែ​អាច​ប្រកួតប្រជែង​នៅ​ក្នុងសេដ្ឋកិច្ច​ពិភពលោក​ដែល​កំពុងវិវត្ត។

ជាមួយគ្នានេះ លោក​បណ្ឌិតក៏ស្នើ​ឱ្យ​មានការពន្លឿនការធ្វើបរិវត្តកម្មឌីថលសម្រាប់សេវាសាធារណៈ និងសហគ្រាសឯកជន តភ្ជាប់ការបែងចែកទីក្រុងនិងជនបទ និងផ្តល់សិទ្ធិអំណាចដល់មីក្រូសហគ្រាស សហគ្រាសខ្នាតតូច និងមធ្យម ដោយថា ការវិនិយោគជាយុទ្ធសាស្ត្រលើហេដ្ឋារចនាសម្ព័ន្ធឌីជីថល និងគំនិតផ្តួចផ្តើមលើការពង្រឹងជំនាញជាការចាំបាច់ដើម្បីសម្រចបាននូវការអនុវត្តនេះ។

លោកបណ្ឌិត នាក់ ចិន្តារិទ្ធិ ក៏បានជំរុញឱ្យ​អាស៊ាន ជំរុញទំនាក់ទំនងរវាងមនុស្សនិងមនុស្សឱ្យកាន់តែច្រើន តាមរយៈការពង្រីកកម្មវិធីផ្លាស់ប្តូរសិស្ស/យុវជន ការចល័តវិជ្ជាជីវៈ និងការលើកកម្ពស់ការចូលរួមរបស់សង្គមស៊ីវិល ដោយថា ចំនុចទាំងនេះនឹងពង្រឹងការយល់ដឹងរួមរបស់យើងអំពីអត្តសញ្ញាណ និងសហគមន៍អាស៊ាន។

លោកជំទាវ គឹម សេដ្ឋានី រដ្ឋលេខាធិការប្រចាំការ ក្នុងនាមឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា និងជាតំណាងជាតិសម្រាប់ក្រុមប្រឹក្សាសហគមន៍សង្គម-វប្បធម៌អាស៊ាន បានគាំទ្រនូវអនុសាសន៍របស់ឥស្សរជនជាន់ខ្ពស់សហគមន៍សង្គម-វប្បធម៌អាស៊ាន លើរបៀបវារៈសហគមន៍សង្គម-វប្បធម៌អាស៊ានក្រោយឆ្នាំ២០២៥។ លោកជំទាវរដ្ឋលេខាធិការប្រចាំការបានលើកឡើងពីគោលជំហររបស់កម្ពុជា ក្នុងការកត់សម្គាល់លើបញ្ហាប្រឈមសំខាន់ៗពាក់ព័ន្ធនឹងភូមិសាស្ត្រនយោបាយ សេដ្ឋកិច្ចសង្គម និងបរិស្ថាននៅក្នុងតំបន់អាស៊ាន និងបានវាយតម្លៃលើរបៀបវារៈដែលបានគូសបញ្ជាក់ក្នុងអង្គប្រជុំ ដើម្បីពង្រឹងសហគមន៍សង្គម-វប្បធម៌អាស៊ាន។

លោកជំទាវបញ្ជាក់ថា កម្ពុជាគាំទ្រលើការវិនិយោគលើមូលធនមនុស្ស ដើម្បីធានាបាននូវសុខុមាលភាពរបស់មនុស្ស ដូចជាការអប់រំប្រកបដោយគុណភាពខ្ពស់ចាប់ពីកុមារភាពរហូតដល់កម្រិតឧត្តមសិក្សា ជាពិសេសផ្តោតលើការអប់រំស្ទែម និង TVET តាមរយៈការបង្កើតក្របខណ្ឌអភិវឌ្ឍន៍ជំនាញ និងកម្មវិធីពង្រឹងជំនាញ និងការផ្លាស់ប្តូរជំនាញថ្មីៗសម្រាប់យុវជន៕