ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បញ្ហាផ្លូវចិត្ត មិនប្រកាន់វណ្ណៈ ភេទ ឬពណ៌សម្បុរនោះទេ អ្នកណាក៏អាចប្រឈមនឹងការកើតបញ្ហាផ្លូវចិត្តដែរ។ នេះគឺជាការលើកឡើង របស់កញ្ញា រិទ្ធី លំអរកេសរ នៅក្នុងកិច្ចពិភាក្សាយុវជន ក្នុងឱកាសចូលរួមទិវាយុវជន ដែលរៀបចំឡើងដោយក្រសួងអប់រំ យុវជន និងកីឡា កាលពីពេលថ្មីៗនេះ។
កញ្ញា លំអរកេសរ លើកឡើងថា បញ្ហាផ្លូវចិត្ត តាមពិតទៅមានច្រើនប្រភេទ ប៉ុន្តែសម្រាប់កញ្ញាផ្ទាល់ គឺធ្លាប់ឆ្លងកាត់បញ្ហាថប់បារម្ភធ្ងន់ធ្ងរ ដែលភាសាអង់គ្លេសហៅថា anxiety attack រហូតមានអាការញ័រដៃ ដកដង្ហើមមិនទាន់គ្នា និងកន្ត្រាក់សាច់ដុំ។
កញ្ញាបន្តថា ដើម្បីការពារខ្លួនពីបញ្ហានេះ យើងអាចក្រឡេកមើលទម្លាប់ខ្លួនឯង ជាពិសេសគឺទម្លាប់ពេលព្រឹកល្អៗ ដូចជា ការហាត់ប្រាណ និងញ៉ាំអាហារ ដែលល្អសម្រាប់សុខភាព។ កញ្ញាសង្កត់ធ្ងន់ថា ការធ្វើលំហាត់ប្រាណ យ៉ាងហោចណាស់មួយថ្ងៃឱ្យបាន ៣០នាទី គឺល្អ ព្រោះការហាត់ប្រាណពិតជាមានសារៈសំខាន់ណាស់សម្រាប់សុខភាព ហើយអាចឱ្យយើងជៀសផុតពីបញ្ហាផ្លូវចិត្ត។
សកម្មភាពទាំងនោះអាចធ្វើ ការវាយសី ដើរ រត់ ហែលទឹក ទាត់បាល់ ឬប្រភេទកីឡាណាមួយ ដែលយើងចូលចិត្ត…
កញ្ញា រិទ្ធី លំអរកេសរ
ចំណុចទី ២ ដែលសំខាន់ដែរនោះគឺ ទោះជាជួបរឿងបែបណាក៏ដោយ កុំបន្ទោសខ្លួនឯង, អនុញ្ញាតឱ្យខ្លួនខកចិត្តបាន ឱ្យខ្លួនឯងយំបាន ឱ្យខ្លួនឯងតូចចិត្តបាន ប៉ុន្តែមិនបន្ទោសខ្លួនឯង។ នេះជាការបញ្ជាក់បន្ថែមរបស់ កញ្ញា លំអរកេសរ។
ជាមួយគ្នានេះ កញ្ញាបានចែករំលែកជំហានចំនួន ៣ ដើម្បីស្ដារសុខភាពផ្លូវចិត្តឡើងវិញ អំឡុងពេលមានបញ្ហាផ្លូវចិត្ត ក្នុងនោះ ជំហានទី១ ត្រូវទទួលស្គាល់ថា ខ្លួនឯងកំពុងមានបញ្ហាផ្លូវចិត្ត។ ជំហានទី២ បន្ទាប់ពីកំណត់អារម្មណ៍ខ្លួនឯង ហើយត្រូវនិយាយចេញក្រៅ ប្រាប់មនុស្សជិតស្និត មិត្តភក្តិ ឬអាចជាក្រុមគ្រួសារ ប៉ុន្តែក្នុងលក្ខខណ្ឌដែលគ្មានអ្នកជជែក ឬបង្ហាញអារម្មណ៍ចេញក្រៅ យើងអាចជ្រើសរើសវិធីសាស្ត្រសរសេរអារម្មណ៍ខ្លួនឯង និងជំហានទី ៣ ប្រសិនបើអនុវត្តវិធីសាស្ត្រអភិវឌ្ឍ និងស្ដារផ្លូវចិត្តខ្លួនឯងមិនបាន អ្នកអាចទៅជួបជាមួយអ្នកជំនាញ ដើម្បីធ្វើការប្រឹក្សា៕
