អ្នកនាំពាក្យ​ក្រសួងការងារ និង​បណ្តុះបណ្តាលវិជ្ជាជីវៈ បាន​ឱ្យដឹងថា នៅក្នុងឆ្នាំ២០២៥កន្លងទៅនេះ មានយុវជន ព្រមទាំងពលរដ្ឋទូទៅ ជិត១៥ម៉ឺននាក់ បានស្នើ​ចុះឈ្មោះចូលរៀនក្នុងកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស (TVET 1.5M) ដែលជាកម្មវិធីបណ្តុះបណ្តាលជំនាញ​ដល់យុវជន​ដោយ​ឥតគិតថ្លៃ។

កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ចំនួន ១,៥លាននាក់ (TVET 1.5M) ត្រូវបានផ្ដួចផ្ដើមដោយ សម្ដេចអគ្គមហាសេនាបតីតេជោ ហ៊ុន សែន ក្នុងឆ្នាំ២០២៣ និងបានប្រកាសដាក់ឱ្យអនុវត្តដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី១៤ ខែវិច្ឆិកា ឆ្នាំ២០២៣ ដើម្បីជាប្រយោជន៍ដល់យុវជនដែលមកពីគ្រួសារក្រីក្រ និងងាយរងហានិភ័យ បានទទួលការបណ្តុះបណ្តាលជំនាញវិជ្ជាជីវៈ ក្លាយជាអ្នកមានជំនាញមួយពិតប្រាកដ មានការងារមួយកាន់តែសមរម្យ មានចំណូលទៀងទាត់ ដែលជួយដល់យុវជនខ្លួនឯងផង និងគ្រួសារផង។

លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ គិតត្រឹមខែធ្នូ ឆ្នាំ២០២៥ មានសិស្សស្នើចុះឈ្មោះចូលរៀនក្នុងកម្មវិធីបណ្ដុះបណ្ដាលបច្ចេកទេស និងវិជ្ជាជីវៈ (TVET 1.5M) សរុប ១៤៨ ២៧២នាក់ ក្នុងនោះសិស្សមានបណ្ណសមធម៌មានចំនួន ៦២ ៥៨១នាក់។

តាមរយៈរបាយការណ៍សង្ខេប បច្ចុប្បន្នមានយុវជន​សរុប​ចំនួន ៧,៤៤៥ នាក់​កំពុង​សិក្សា ក្នុង​នោះ​មាន​ស្ត្រី ៤,០៧១ នាក់, យុវជន​ចំនួន ១៥,៨១៣ នាក់​កំពុង​រង់ចាំ​សិក្សា ក្នុង​នោះ​មាន​ស្ត្រី ៧,៣៤៧ នាក់ និង ៧៩,២៨៥ នាក់​បាន​បញ្ចប់​ការ​សិក្សា ក្នុង​នោះ​មាន​ស្ត្រី ៣៥,៣២២ នាក់ និង​និស្សិត​ចំនួន ៥១,៥៩១ នាក់​កំពុង​ធ្វើការ ក្នុង​នោះ​មាន​ស្ត្រី ២៣,៣៨៤ នាក់។

ឯកឧត្តម ថង សាម៉ុន អគ្គនាយករង នៃកម្មវិធីអប់រំបច្ចេកទេស និង​វិជ្ជាជីវៈ (TVET) នៃក្រសួងការងារ និង​បណ្តុះបណ្តាលវិជ្ជាជីវៈ មានប្រសាសន៍ថា កម្មវិធីបណ្តុះបណ្តាលជំនាញ TVET ១,៥ លាននាក់ បាន​ទាក់ទាញ​ចំណាប់អារម្មណ៍​យ៉ាងខ្លាំង​ពី​យុវជន កម្មករ និង​អ្នក​ដែល​ធ្វើការ​ក្នុង​សេដ្ឋកិច្ច​ក្រៅ​ប្រព័ន្ធ ជាពិសេស​យុវជន​មកពី​គ្រួសារ​ក្រីក្រ និង​ងាយ​រងគ្រោះ។

បន្ទាប់ពីការអនុវត្តរយៈពេលពីរឆ្នាំ បើតាម ឯកឧត្តម ថង សាម៉ុន កម្មវិធីបណ្តុះបណ្តាលជំនាញ TVET ១,៥ លាននាក់ ទទួលបានការគាំទ្រយ៉ាងខ្លាំងពីសាធារណជន វិស័យឯកជន យុវជន និងអ្នកពាក់ព័ន្ធផ្សេងទៀត។ ហើយ​សម្រាប់ឆ្នាំ២០២៦នេះ ក្រសួងនឹងបន្តពង្រឹងយុទ្ធនាការផ្សព្វផ្សាយ និងផ្តល់ព័ត៌មាន ដើម្បីលើកទឹកចិត្តយុវជនកាន់តែច្រើនមកពីគ្រួសារក្រីក្រ និងងាយរងគ្រោះ ឱ្យ​ចុះឈ្មោះ និងទទួលបានអត្ថប្រយោជន៍ពីកម្មវិធីនេះ៕