ដោយសារបច្ចេកវិទ្យាកំពុងមានការរីកចម្រើនខ្លាំង និងបំពេញតម្រូវការសម្រាប់មនុស្សគ្រប់វ័យ ក្នុងនោះក៏មានកុមារដែលប្រើប្រាស់បច្ចេកវិទ្យា។ ដូច្នេះ គ្រួសារដើរតួនាទីសំខាន់ក្នុងការពិនិត្យ និងតាមដានអំពីកម្មវិធីបច្ចេកវិទ្យាដែលកូនរបស់ខ្លួនប្រើប្រាស់ និងអាចធានាសុវត្ថិភាព។

លោ​ក​ សំលៀង សីលា នាយកប្រតិបត្តិអង្គការ APLE Cambodia មានប្រសាសន៍ថា ឪពុកម្ដាយដើរតួសំខាន់ក្នុងការនិយាយអំពីសុវត្ថិភាពលើប្រព័ន្ធអនឡាញជាមួយកូនៗរបស់ខ្លួន។ លោ​កថា  ឪពុកម្ដាយអាចផ្ដល់ការណែនាំដល់កូនៗ នៅពេលកូនៗចាប់ផ្ដើមប្រើប្រាស់បច្ចេកវិទ្យា ដើម្បីធានាសុវត្ថិភាពរបស់ពួកគេ។ ក្នុងនោះ អង្គការ APLE ក៏បានធ្វើការជាមួយក្រសួងពាក់ព័ន្ធ ដើម្បីបណ្ដុះបណ្ដាលជាមួយឪពុកម្ដាយ និងសុវត្ថិភាពតាមប្រព័ន្ធអនឡាញ និងកម្មវិធីមួយចំនួនដែលគួរប្រើប្រាស់ ដើម្បីការពារកូនពីហានិភ័យនៃការកេងប្រវ័ញ្ចផ្លូវភេទកុមារតាមប្រព័ន្ធអនឡាញ។

ខាងក្រោមនេះ ជាទម្រង់៤ប្រភេទ នៃការកេងប្រវ័ញ្ចផ្លូវភេទកុមារតាមប្រព័ន្ធអនឡាញដែលឪពុកម្ដាយសម័យឌីជីថលគួរដឹងដើម្បីការពារកូនជាទីស្រឡាញ់របស់ខ្លួន រួមមាន៖

១. សកម្មភាពលួងលោមតាមប្រព័ន្ធអនឡាញ ៖ ការប្រើប្រាស់វិធីសាស្រ្តដើម្បីទាក់ទាញ រៀបចំ បង្កើតទំនាក់ទំនង រវាងមនុស្សធំ និងកុមារ ក្នុងគោលបំណងធ្វើឱ្យកុមារទុកចិត្ត ហើយយល់ព្រមចូលរួមក្នុងសកម្មភាពផ្លូវភេទ អាចជាសកម្មភាពផ្លូវភេទលើប្រព័ន្ធអនឡាញ ឬសកម្មភាពផ្លូវភេទដោយផ្ទាល់។ ជនបង្កទាំងនេះ ច្រើនប្រើវិធីសាស្រ្តក្លែងបន្លំអត្តសញ្ញាណ រូបថត និងព័ត៌មានផ្ទាល់ខ្លួន ដែលឱ្យជនរងគ្រោះឆាប់ជឿទុកចិត្ត និងងាយទំនាក់ទំនងជិតស្និទ ឬឈានដល់កម្មភាពផ្លូវភេទកើតឡើង។

២. ទម្រង់នៃការគំរាមទាក់ទងនឹងផ្លូវភេទ ៖ ជាសកម្មភាពដែលអ្នកប្រព្រឹត្តទទួលបានរូបថត អាក្រាតកាយរបស់ជនរងគ្រោះរួចហើយ ប្រើប្រាស់រូបនោះ ដើម្បីជំរិតទាមទារឱ្យជនរងគ្រោះធ្វើតាមលក្ខខណ្ឌរបស់ខ្លួន ហើយលក្ខខណ្ឌនោះ អាចជាការយល់ព្រម និងប្រព្រឹត្តសកម្មភាពផ្លូវភេទតាមរយៈការស្នើសុំ។ សកម្មភាពផ្លូវភេទនោះ អាចធ្វើតាមរយៈអនឡាញ ដោយការផ្ញើរូបភាពអាក្រាតកាយទៅជនជំរិត ក្នុងករណីខ្លះ អ្នកជំរិតទាមទារនោះ អាចទាមទារជាលុយកាក់មួយចំនួន ដើម្បីជាថ្នូរប្រសិនបើមិនចង់ឱ្យរូបថតទាំងនោះមិនត្រូវផ្សព្វផ្សាយទៅឱ្យអ្នកផ្សេងដឹង។ ករណីនេះច្រើនកើតមានច្រើនចំពោះកុមារី ក្នុងនោះ ក្មេងប្រុសក៏បានរងគ្រោះដែរ។

៣. ទម្រង់រូបភាពសម្ភាររំលោភបំពានផ្លូវភេទលើកុមារ (CSAM) ៖ គឺជារូបភាពទាំងឡាយណាដែលបង្ហាញអំពីរូបរាងអាក្រាត ឬកេរ្តិ៍អាក្រាតរបស់កុមារ ធ្វើជារូបភាពដើម្បីផលិតចែកចាយ លក់ដូរ ទាំងនៅលើប្រព័ន្ធអនឡាញ ទាំងនៅក្រៅប្រព័ន្ធអនឡាញ។ កុមារត្រូវបានគេថតរូបតាមវិធីសាស្រ្តផ្សេងៗ ថតរូបតាមរយៈការលួងលោម ការគំរាម ឬត្រូវបានគេជួញដូរទៅថតផលិតជារូបភាពអាក្រាតអាសអាភាស ដើម្បីធ្វើអាជីវកម្ម។ ទម្រង់ទី៣នេះ ជាទម្រង់ដែលកើតមានឡើងច្រើនជាងគេបំផុត ចាប់តាំងពីការបង្កើតកិច្ចយន្តការឆ្លើយតបការកេងប្រវ័ញ្ចតាមប្រព័ន្ធអនឡាញ។ ក្នុងនោះ ជនរងគ្រោះភាគច្រើន ៨០% ជាកុមារីអាយុចាប់ពីក្រោម១៨ឆ្នាំរហូតដល់ទារកទើបនឹងកើត។ ជាពិសេស កុមារមានអាយុពី ១០ទៅ១៣ឆ្នាំ ជាជនរងគ្រោះដែលមានអត្រាខ្ពស់ជាងគេ។

៤. ទម្រង់នៃការផ្សាយបន្តផ្ទាល់នៃសកម្មភាពផ្លូវភេទកុមារ ៖ ជាសកម្មភាពដែលជនប្រព្រឹត្ត រៀបចំកុមារឱ្យប្រព្រឹត្តនូវសកម្មភាពផ្លូវភេទ អាចប្រព្រឹត្តជាមួយមនុស្សធំ ឬកុមារនិងកុមារ ហើយសកម្មភាពនោះត្រូវបានគេចាក់ផ្សាយផ្ទាល់ឱ្យអ្នកដទៃនៅទីកន្លែងផ្សេងទៀតអាចមើលបានក្នុងពេលតែមួយ។ ជាទូទៅ នេះជាការធ្វើអាជីវកម្មផ្លូវភេទលើកុមារ ដោយសារកុមារជាជនរងគ្រោះដែលត្រូវបានគេបោកបញ្ឆោទ ជួញដូរឱ្យចូលរួមក្នុងសកម្មភាពនោះ ដើម្បីបានជាផលប្រយោជន៍ហិរញ្ញវត្ថុ។

នាយកប្រតិបត្តិអង្គការ APLE Cambodia ក៏បានលើកទឹកចិត្តដល់ឪពុកម្ដាយត្រូវនិយាយពីបញ្ហាការកេងប្រវ័ញ្ចផ្លូវភេទកុមារតាមប្រព័ន្ធអនឡាញជាមួយកុមារដោយមិនស្ដីបន្ទោស។ ប្រសិនបើកុមារប្រាប់ពីបញ្ហាការរំលោភបំពានទាំងនេះ ត្រូវមានការចូលរួមគាំទ្រ ដើម្បីឱ្យកុមារមានទំនុកចិត្ត និងមានសេចក្ដីក្លាហានក្នុងការរាយការណ៍។ លោ​ក​ សំលៀង សីលា បន្តថា នៅពេលអ្នកឃើញករណីសង្ស័យកុមារត្រូវគេកេងប្រវ័ញ្ចផ្លូវភេទតាមប្រព័ន្ធអនឡាញ អាចទំនាក់ទំនងមកកាន់អង្គការ APLE Cambodia ដើម្បីប្រឹក្សា និងចាត់វិធានការស៊ើបអង្កេតតាមរយៈលេខទូរស័ព្ទ ០៩២ ៣១១ ៥១១ ឬគេហទំព័រ internethotlinecambodia.org។

បើតាមរបាយការណ៍ អង្គការ APLE Cambodia ក្នុងរយៈពេល៨ខែក្នុងឆ្នាំ២០២៤នេះ (ខែមករាដល់ខែសីហា) មាន១២៩ករណីបានរាយការណ៍ ក្នុងនោះ ៨៨% ជាការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ៕