អ្នកនាំពាក្យ​ក្រសួងអប់រំ យុវជន និងកីឡា បាន​ឱ្យដឹងថា ក្រសួងអប់រំ នឹង​ដាក់បន្ថែម​នូវ​ចំណេះ​ដឹងស្តីពីសុវត្ថិភាព​កុមារ​តាម​ប្រព័ន្ធអនឡាញ ជាផ្នែកមួយ នៃមុខវិជ្ជា​បំណិន​ជីវិត​តាម​មូលដ្ឋាន ដោយផ្តោតសំខាន់ទៅលើគ្រូបង្រៀន មាតាបិតា សិស្សានុសិស្ស អ្នកពាក់ព័ន្ធនានា ឱ្យបានយល់កាន់តែច្បាស់ពីការកេងប្រវ័ញ្ចកុមារគ្រប់ទម្រង់តាមប្រព័ន្ធអនឡាញ និងយន្តការកាពារ។

លោកជំទាវ ឃួន វិច្ឆិកា អ្នកនាំពាក្យ​ក្រសួងអប់រំ យុវជន និងកីឡា មានប្រសាសន៍ថា មុខវិជ្ជាបំណិនជីវិតតាមមូលដ្ឋាន ជាមុខវិជ្ជាមួយដែលបានរៀបចំឡើងក្នុងទិសដៅដើម្បីជំរុញឱ្យសិស្សានុសិស្សមានបំណិនសតវត្សរ៍ទី២១ ដែលកំពុងរីកចម្រើនខ្លាំងផ្នែកបច្ចេកវិទ្យាឌីជីថល។ លោកជំទាវបន្តថា ក្នុងសម័យ​បច្ចេកវិទ្យាឌីជីថល មិនត្រឹមតែទាមទារឱ្យប្អូនៗចេះប្រើប្រព័ន្ធឌីជីថលប៉ុណ្ណោះទេ ប៉ុន្តែក៏​ត្រូវយល់ដឹងពីហានិភ័យ ចេះការពារខ្លួន មានបំណិនធ្វើការងារជាក្រុម ចេះដោះស្រាយបញ្ហា អាចសម្របខ្លួន និងអាចបំពេញការងារក្នុងសតវត្សរ៍ទី២១។

អ្នកនាំពាក្យក្រសួងអប់រំ បន្ថែមថា ខ្លឹមសារមេរៀនដែល​មាន​នៅក្នុងឯកសារសុវត្ថិភាព​កុមារ​តាម​ប្រព័ន្ធអនឡាញ នឹងជួយដល់លោកគ្រូអ្នកគ្រូ សិស្សានុសិស្ស មាតាបិតា និងអ្នក​ពាក់ព័ន្ធផ្សេងៗបានយល់ដឹងកាន់តែច្បាស់អំពីការកេងប្រវ័ញ្ចកុមារគ្រប់ទម្រង់លើប្រព័ន្ធអនឡាញ (សុវត្ថិភាពតាមប្រព័ន្ធអ៊ីនធឺណិត) ហានិភ័យដែលអាចកើតមានលើកុមារនៅពេលប្រើប្រាស់ ការរាយការណ៍ពីសកម្មភាពរំលោភបំពាន និងវិធីការពារប្រកបដោយសុវត្ថិភាព សុខុមាលភាពនៅពេលប្រើប្រាស់អ៊ីនធឺណិត។

“អ្នកប្រើប្រាស់អ៊ីនធឺណិត ចាំបាច់ត្រូវមានចំណេះដឹង និងឥរិយាបថប្រកបដោយសុវត្ថិភាព ព្រមទាំងសុខុមាលភាព ដើម្បីបញ្ចៀសបាននូវគ្រោះថ្នាក់ ព្រមទាំងហានិភ័យផ្សេងៗដែលអាចកើតមានលើកុមារ”

បើតាមលោកជំទាវ ឃួន វិច្ឆិកា សុវត្ថិភាពកុមារតាមប្រព័ន្ធអនឡាញ ជាប្រធានបទមួយក្នុងប្រធានបទជាច្រើនទៀត ដែលលោកគ្រូ អ្នកគ្រូ អាចជ្រើសរើសយកទៅប្រើប្រាស់នៅក្នុងសាលារៀនរបស់ខ្លួន ដើម្បីធ្វើឱ្យសិស្សមានបំណិនសតវត្សរ៍ទី២១។ ប្រធានបទសុវត្ថិភាពកុមារតាមប្រព័ន្ធអនឡាញ ត្រូវបង្រៀន និងរៀននៅកម្រិតមធ្យមសិក្សាបឋមភូមិ ស្របតាមកម្មវិធីសិក្សាជាតិមុខវិជ្ជាបំណិនជីវិតតាមមូលដ្ឋាន។

គួរជម្រាបជូនថា សៀវភៅណែនាំបង្រៀនស្តីពីសុវត្ថិភាពកុមារលើប្រព័ន្ធអនឡាញ កម្រិតមធ្យមសិក្សា បឋមភូមិ អនុវត្តតាមគំរូសង្គម ដែលមាន ៥មេរៀន បានផ្សព្វផ្សាយដាក់ឱ្យដំណើរការ នៅដើមឆ្នាំ២០២៥ និងបានបែងចែកឯកសារដល់មន្ទីរអប់រំ យុវជន និងកីឡា សម្រាប់យកទៅបង្រៀននៅកម្រិតថ្នាក់ទី៧ នៃមុខវិជ្ជាបំណិនជីវិតតាមមូលដ្ឋាន៕