បទពិសោធន៍ការងារក្នុងវិស័យស្ថាបត្យកម្មជាង១៣ឆ្នាំបានបង្រៀន ធ្វើឱ្យស្គាល់ និងមានបទពិសោធន៍ជាច្រើនក្នុងនាមជាស្ថាបត្យករ នេះជាការលើកឡើងរបស់លោក ហ៊ុន ចាន់សាន ស្ថាបនិកក្រុមហ៊ុន Re Edge Architecture នៅក្នុងកម្មវិធី Alternative Approaches for Adapting and Thriving in the Creative& Media Industries ក្រោមប្រធានបទ”មេរៀននៃភាពជាអ្នកដឹកនាំក្នុងការធ្វើឱ្យមានតុល្យភាពភាពច្នៃប្រឌិត និងបានផលចំណេញ”កាលពីពេលថ្មីៗនេះ។

លោក ហ៊ុន ចាន់សាន បានយល់ឃើញថា ក្នុងសម័យកាលឌីជីថលកាន់តែជឿនលឿន បានធ្វើឱ្យលោកយល់ឃើញថា នៅក្នុងវិស័យស្ថាបត្យកម្ម ស្ថាបត្យករជាមនុស្សរបស់សង្គមជាតិដែលមានកាតព្វកិច្ចបម្រើផលប្រយោជន៍រួមទៅអ្នកដទៃដោយប្រើវិជ្ជាជីវៈ វិទ្យាសាស្ត្រ សិល្បៈក្នុងខ្លួន ទាំងសិល្បៈជាអ្នកជំនួញដើម្បីផលប្រយោជន៍អ្នកដទៃ។ ដូចនេះលោក ហ៊ុន ចាន់សាន ពិតជារីករាយដែលបានឃើញមានស្ថាបត្យករកម្ពុជាពូកែៗជាច្រើនកំពុងរីកធំធាត់កាន់តែច្រើន លោកកាន់តែសប្បាយចិត្តព្រោះជំនាញស្ថាបត្យកម្មទាមទារឱ្យបានឃើញ បានប៉ះ បានប្រើប្រាស់ និងអនុវត្តន៍ផ្ទាល់ដែលធ្វើឱ្យស្ថាបត្យករកាន់តែមានភាពច្នៃប្រឌិត និងគំនិតថ្មីបន្ថែម។

ស្ថាបនិកក្រុមហ៊ុន Re Edge Architecture រូបនេះបន្តថា គំនិតការងារក្នុងវិស័យស្ថាបត្យកម្ម មិនមាននរណាខុស ឬត្រូវនោះទេ ដូចនេះអ្វីដែលយល់ថាល្អមិនប្រាកដថា មានតែអ្វីដែលជារបស់ខ្លួនឯងនោះទេដែលត្រូវ បើក្រឡេកទៅមើលវត្តមានរបស់សាបត្យករបរទេសដែលមកពីក្រៅប្រទេសគឺជាចំណុចល្អទៅវិញ ព្រោះបានឃើញពីស្នាដៃរបស់ពួកគាត់ និងបានធ្វើឱ្យប្រជាជនខ្មែរយល់កាន់តែច្បាស់អំពីតម្លៃនៃស្ថាបត្យកម្ម។

លោក ហ៊ុន ចាន់សាន បន្ថែមថា ប្រសិនបើងាកមកមើលកត្តាស្នួលរបស់យើងវិញ យើងគួរតែមានកត្តាស្នួលរបស់ខ្លួន គឺគុណតម្លៃគោលរបស់យើង មានចក្ខុវិស័យខ្លួនយើង ជឿជាក់លើខ្លួនឯង និងក្រុមកាងាររបស់យើង និងបង្កើនសមត្ថភាពរបស់យើង ដូចនេះគេនឹងទទួលស្គាល់ពីសមត្ថភាពរបស់យើង។

ក្នុងនាមជាអ្នកដឹកនាំម្នាក់ក្នុងស្ថាបនមួយ លោក ហ៊ុន ចាន់សាន បានគិតគូរជាពិសេសការដាក់ទំនុកចិត្តពីអតិថិជនទទួលសេវាកម្មរបស់យើង ដើម្បីឱ្យការផ្ដល់សេវាកម្ម និងទទួលសេវាកម្មទទួលបានអ្វីដែលល្អបំផុតសម្រាប់ភាគីសងខាង។ លើសពីនេះ ការគិតគូរដល់ក្រុមការងារក្នុងក្រុមហ៊ុនជារឿងចាំបាច់បន្ទាប់ដែលក្នុងនាមជាអ្នកដឹកនាំត្រូវគិតគូរ និងរៀបចំឱ្យបានល្អិតល្អន់ និងដិតដល់៕