ដើម្បីចូលរួម​ពង្រឹងគុណភាពសេវាកម្ម និង​ការ​អភិវឌ្ឍ​សមត្ថភាព និង​ជំនាញថ្មី​ដល់យុវជន សិស្ស និស្សិត និង​អ្នក​បម្រើ​ការក្នុងឧស្សាហកម្ម​ទេសចរណ៍ ជាពិសេស​ជំនាញកក់សំបុត្រយន្តហោះ ក្រសួងទេសចរណ៍ បានប្រកាស​ដល់​អ្នក​បម្រើ​ការ​ក្នុងវិស័យទេសចរណ៍ បដិសណ្ឋារកិច្ច និង​ការធ្វើដំណើរ ប្រតិបត្តិករទេសចរណ៍ សហព័ន្ធទេសចរណ៍​កម្ពុជា សមាគម​ឧស្សាហកម្ម​ទេសចរណ៍ យុវជន សិស្ស និស្សិត និងសាធារណៈជន ថា ក្រសួង​សហការជាមួយ​ក្រុមហ៊ុន Travelport Official Partner – Cambodia បើកវគ្គ​បណ្តុះបណ្តាលជំនាញ​កក់សំបុត្រយន្តហោះ (Ticketing) តាម​ប្រព័ន្ធកក់សំបុត្រយន្តហោះ ដោយឥតគិតថ្លៃ។

វគ្គសិក្សា​មានចំនួន ៦វគ្គ ដែល​រួមមាន ៖

• វគ្គទី១ ចាប់ពីថ្ងៃទី១៧ ដល់ថ្ងៃទី២៨ ខែកុម្ភៈ ឆ្នាំ២០២៥
• វគ្គទី២ ចាប់ពីថ្ងៃទី១៧ ដល់ថ្ងៃទី២៨ ខែមីនា ឆ្នាំ២០២៥
• វគ្គទី៣ ចាប់ពីថ្ងៃទី២១ ខែមេសា ដល់ថ្ងៃទី០២ ខែឧសភា ឆ្នាំ២០២៥
• វគ្គទី៤ ចាប់ពីថ្ងៃទី១៩ ដល់ថ្ងៃទី៣០ ខែឧសភា ឆ្នាំ២០២៥
• វគ្គទី៥ ចាប់ពីថ្ងៃទី១៦ ដល់ថ្ងៃទី២៧ ខែមិថុនា ឆ្នាំ២០២៥
• វគ្គទី៦ ចាប់ពីថ្ងៃទី១៤ ដល់ថ្ងៃទី២៥ ខែកក្កដា ឆ្នាំ២០២៥

លក្ខខណ្ឌនៃការជ្រើសរើស ៖ មានចំណេះដឹងភាសាអង់គ្លេស, អាច​ប្រើប្រាស់​កុំព្យូទ័រ​កម្រិតមូលដ្ឋាន។

លក្ខខណ្ឌប្រឡង​បញ្ចប់ការសិក្សា ៖ បេក្ខជន​ត្រូវ​ប្រឡង​បញ្ចប់វគ្គ និង​ទទួលបានពិន្ទុចាប់ពី៨០ពិន្ទុឡើងទៅ (ពិន្ទុ​អតិបរមា១០០ពិន្ទុ)។ សិក្ខាកាម​ដែលបាន​បញ្ចប់​វគ្គបណ្តុះបណ្តាល​ដោយជោគជ័យ នឹងទទួល​បានវិញ្ញាបនបត្រ​បញ្ជាក់​ការ​សិក្សា​លើជំនាញកក់សំបុត្រ​យន្តហោះ​តាមប្រព័ន្ធ Galileo Distribution System។

គួរកត់សម្គាល់ថា វគ្គបណ្តុះបណ្តាលនេះ ក្នុង១វគ្គ​ត្រូវ​បានកំណត់សិក្ខាកាម​តែចំនួន១០នាក់ប៉ុណ្ណោះ ហើយទីតាំង​សម្រាប់វគ្គបណ្តុះបណ្តាល គឺស្ថិត​នៅ​ការិយាល័យ​ក្រុមហ៊ុន Travelport Official Partner Cambodai បន្ទប់លេខ១២២ និង១២៣ នៃមជ្ឈមណ្ឌលភ្នំពេញ ស្ថិត​នៅ​តាម​បណ្តោយមហាវិថីព្រះសីហនុ កែង​មហាវិថីសម្តេចសុធារស។

សម្រាប់អ្នក​បម្រើ​ការ​ក្នុងវិស័យ​ទេសចរណ៍ យុវជន សិស្ស និស្សិត និងសាធារណជន ដែលមានចំណាប់អារម្មណ៍ អាច​ចុះឈ្មោះតាមរយៈ​នាយកដ្ឋានបណ្តុះបណ្តាល​ជំនាញវិជ្ជាជីវៈទេសចរណ៍ នៃ​ក្រសួងទេសចរណ៍ ឬ​តាមរយៈតេឡេក្រាម 078 899 919 និង​តាម​រយៈ​អាសយដ្ឋានគេហទំព័រ www.tptd.org ៕