បច្ចុប្បន្នមានការធ្វើដំណើរជាច្រើន ហើយមានទម្រង់ខុសៗគ្នា មិនថាជាប្រភេទដំណើរកម្សាន្ត​ វិស្សមកាលខ្លីឬវែង ដំណើរសម្រាប់អាជីវកម្ម និងធុរៈផ្ទាល់ខ្លួនជាដើម ​ដែលត្រូវការប្រើប្រាស់មធ្យោបាយលឿន និងងាយស្រួល។​​​ ពិតណាស់​ ចំពោះការបំពេញបេសកកម្ម គឺត្រូវការទៅឱ្យដល់ទីតាំងឱ្យបានឆាប់រហ័សតាមដែលអាចធ្វើបាន តែយ៉ាងណាមិញ ដំណើរកម្សាន្តគួរតែមានលក្ខណៈខុសពីសព្វមួយដង បើប្រៀបធៀបទៅនឹងការងារ ឬក៏ការរៀនសូត្រ និងធុរៈបន្ទាន់ៗជាដើម។​

រៀងរាល់ពេលមានឱកាសក្នុងការធ្វើដំណើរកម្សាន្ត ឬវិស្សមកាល គួរតែបន្ថយល្បឿនក្នុងការ គ្រាន់តែចង់ទៅឱ្យតែដល់គោលដៅ គួរធ្វើដំណើរមួយៗ​ តាមសម្រួល​។ ឆ្លើយតបទៅនឹងចំណុចនេះ ការជ្រើសរើសមធ្យោបាយធ្វើដំណើរតាមរយៈរថភ្លើងមិនត្រឹមតែងាយស្រួលប៉ុណ្ណោះទេ ប៉ុន្តែបានផ្តល់នូវបទពិសោធន៍វិជ្ជមាន​ សុវត្ថិភាព ផាសុកភាព ភាពរីករាយ ក៏ដូចជាការរួមចំណែកដល់ការកាត់បន្ថយបម្រែបម្រួលអាកាសធាតុ និងកត្តាវិជ្ជមានជាច្រើនទៀតស្របតាមតំបន់នីមួយៗ។ តាមរយៈគេហទំព័រ Cluballiance បានបង្ហាញមូលហេតុដែលគួរបន្តធ្វើដំណើរតាមរថភ្លើងអំឡុងពេលវិស្សមកាល។

១. ការសង្កេតទេសភាព ៖ ល្បឿននៃរថភ្លើងមានលឿន និងយឺតទៅតាមតំបន់ ឬប្រទេសនីមួយៗ ក្រឡេកមកមើល៍បរិបទកម្ពុជា ល្បឿននៃរថភ្លើងសមល្មមដែលអាចឱ្យអ្នកធ្វើដំណើរមានឱកាសគយគន់ទេសភាពតាមផ្លូវបាន។ ជាងនេះទៅទៀត ប្រសិនបើមានពេលគ្រប់គ្រាប់ក្នុងការកម្សាន្ត ការជ្រើសរើសរថភ្លើងជិះក៏បង្កើតបាននូវភាពរីករាយមួយផ្នែកដែរ រួមទាំងមានពេលគ្រប់គ្រាន់ក្នុងការសម្រួចចិត្ត​ និងសង្កេតបរិយាកាសជុំវិញខ្លួន ជាការពង្រឹងសុខភាពផ្លូវចិត្តបានមួយផ្នែក។

២. សុវត្ថិភាព និងសន្តិភាពផ្លូវចិត្ត ៖ ចំពោះអ្នកដែលចូលចិត្តធ្វើដំណើរ យ៉ាងហោចណាស់ក៏មានបទពិសោធន៍ជិះឡាន ជិះទូក និងយានជំនិះដទៃទៀតដែរ ហើយប្រសិនបើបានជិះរថភ្លើងថែមទៀត នោះនឹងដឹងថា មធ្យោបាយប្រភេទនេះផ្តល់អារម្មណ៍សុវត្ថិភាព និងសន្តិភាពផ្លូវចិត្ត។ រថភ្លើងមិនពិបាកក្នុងការតទល់នឹងអារម្មណ៍ស្ទះចររាចរណ៍ និងអារម្មណ៍ស្មុគស្មាញដទៃទៀត។

៣. ឱកាសផ្សារភ្ជាប់ទំនាក់ទំនងគ្នា ៖ ដោយសារតែបរិយាកាសរថភ្លើងមិនយឺតពេក មនុស្សដែលជិះរថភ្លើងក៏មកពីមជ្ឈដ្ឋានខុសៗគ្នា និងជាឱកាសមនុស្សបានសួរឆ្លើយឆ្លងគ្នា ស្វែងយល់ពីគ្នា និងរៀនសូត្របានមេរៀនថ្មីៗបន្ថែម។ ជារួមការជិះរថភ្លើង មិនត្រឹមតែផ្តល់នូវបទពិសោធន៍ល្អប៉ុណ្ណោះទេ ប៉ុន្តែជាឱកាសក្នុងការរៀនសូត្រ និងការពង្រឹងសុខភាពផ្លូវចិត្ត៕