ភ្នំពេញ – ការបណ្តុះបណ្តាលជំនាញវិជ្ជាជីវៈ «មរតកដូនតា» នឹង​ត្រូវ​រាជរដ្ឋាភិបាលដាក់បញ្ចូលទៅ​ក្នុង​ក្របខណ្ឌបណ្តុះបណ្តាល​វិជ្ជាជីវៈ​នៅ​ឆ្នាំ​២០២៤ខាងមុខ ។ សម្រាប់​លោកបណ្ឌិត ឈត ប៊ុនថង ប្រធានវិទ្យាស្ថាន​ទំនាក់ទំនងវប្បធម៌ អប់រំ និង​ទេសចរណ៍ នៃរាជបណ្ឌិត្យសភាកម្ពុជា យល់ឃើញថា ការបណ្តុះបណ្តាលជំនាញវិជ្ជាជីវៈ «មរតកដូនតា» គឺជារឿងសំខាន់ ក្នុងការ​រក្សា​អភិរក្ស​នូវ​អត្តសញ្ញាណវប្បធម៌ និង​អរិយធម៌ខ្មែរ។

លោកបណ្ឌិត ឈត ប៊ុនថង មានប្រសាសន៍ថា ការបណ្តុះបណ្តាលជំនាញវិជ្ជាជីវៈ «មរតកដូនតា» មិនមែនមានន័យថា យើងទប់ស្កាត់មិនឱ្យមានការបង្កើតថ្មី ឬគំនិតច្នៃប្រឌិតនោះទេ ប៉ុន្តែត្រូវធ្វើឱ្យមានជម្រើសច្រើន។ លោកបណ្ឌិតបន្តថា ប្រសិនបើទាក់ទងនឹងចម្លាក់ សិល្បៈ គំនូរ ម្ហូបអាហារ ការស្លៀកពាក់ ត្រូវបង្ហាញទាំងសម័យបុរាណ សម័យកណ្ដាល និងសម័យទំនើប កុំឱ្យមានតែសម័យទំនើបប៉ុន្តែមិនមានបង្ហាញពីវប្បធម៌ពីសម័យបុរាណ និងសម័យកណ្ដាលឱ្យប្រជាជនបានស្គាល់។

លោកបណ្ឌិត ឈត ប៊ុនថង ប្រធានវិទ្យាស្ថានទំនាក់ទំនងវប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា

“ខ្ញុំគិតថាទាក់ទងនឹងការបណ្តុះបណ្តាលជំនាញវិជ្ជាជីវៈ «មរតកដូនតា» ដូចជា ការឆ្លាក់ ការសូន្យរូប ជំនាញវិជ្ជាជីវៈផ្សេងៗដែលបុព្វបុរសបង្កើតមក គឺគួរតែមានការបណ្តុះបណ្តាលដើម្បីឱ្យមានការបន្តវេន ព្រមទាំងជំរុញឱ្យមាននិរន្តរភាពនូវអ្វីដែលជាមរតកវប្បធម៌ ចំណេះដឹង និងពុទ្ធិផ្សេងៗរបស់បុព្វបុរសខ្មែរ”

ប្រធានវិទ្យាស្ថានទំនាក់ទំនងវប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា បន្ថែមថា ប្រសិនបើយើងមិនបានបង្រៀន ឬបណ្ដុះបណ្ដាលវិជ្ជាជីវៈដែលជា «មរតកដូនតា» រួមមាន នៅក្នុងសិល្បៈ វប្បធម៌ ម្ហូបអាហារ សម្លៀកបំពាក់ ឬអ្វីផ្សេងទៀតរបស់ខ្មែរនោះទេ មានន័យថា យើងបានលុបនូវប្រភពឬសគល់ ឬអត្តសញ្ញាណនៃវប្បធម៌ខ្មែរ អរិយធម៌ខ្មែរ ដែលនាំឱ្យបាត់បង់វប្បធម៌ បាត់បង់អត្តសញ្ញាណខ្មែរមួយផ្នែក។ ដូច្នេះ គួរបន្តបណ្ដុះបណ្ដាលជំនាញវិជ្ជាជីវៈ «មរតកដូនតា» ហើយបើកចិត្តទទួលយកការអភិវឌ្ឍគំនិតថ្មីៗ បូកផ្សំអ្វីដែលជាមរតកដូនតា ដើម្បីធ្វើឱ្យការរីកចម្រើនរបស់យើងកាន់តែមានវិសាលភាពធំធេង និងជាសេចក្ដីត្រូវការរបស់មនុស្សក្នុងសង្គមបច្ចុប្បន្នផងដែរ។

លោកបណ្ឌិត ឈត ប៊ុនថង ប្រធានវិទ្យាស្ថានទំនាក់ទំនងវប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា

“ប្រសិនកូនខ្មែរមិនចេះជំនាញវិជ្ជាជីវៈមរតកដូនតាខ្លួន នៅពេលមានជាតិសាសន៍ណាមួយគេចង់សរសេរប្រវត្តិសាស្រ្ត ឬគេចង់បន្លំរឿងវប្បធម៌ គេចង់បកស្រាយបែបណាមួយនោះ យើងមិនមានមូលដ្ឋានអ្វីមួយក្នុងការពន្យល់ បង្ហាញ និងបកស្រាយនោះឡើយ”

តាមការបញ្ជាក់របស់ លោកបណ្ឌិត ឈត ប៊ុនថង ដើម្បីអាចរក្សាបាននូវមរតកវប្បធម៌ដូនតាខ្មែរ គឺត្រូវមានការរួមចំណែកពីអ្នកសិក្សាស្រាវជ្រាវ ឬអ្នកជំនាញ ប្រមូលចងក្រងពីអត្តសញ្ញាណវប្បធម៌របស់ខ្មែរ ចាប់តាំងពីសម្លៀកបំពាក់ រចនាបទសាងសង់លំនៅឋាន រចនាបទសាងសង់ប្រាសាទ ឬជាការផលិតជាឧបករណ៍ប្រើប្រាស់ផ្សេងៗ រួមទាំងរចនាបទនៃការចម្លាក់។ លើសពីនេះ សូមអ្នកសិក្សាស្រាវជ្រាវ និងអ្នកជំនាញចងក្រងជាសៀវភៅ ឬវីដេអូ ដើម្បីបង្ហាញប្រជាពលរដ្ឋទូទៅអំពីប្រវត្តិរឿងរ៉ាវនៃអត្តសញ្ញាណខ្មែរ គំរូ ក្បួនខ្នាត ក្នុងការឆ្លាក់ គូរ ឬសូន្យរូបទាំងអស់នោះ៕