ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សេចក្ដីគោរព ការឱ្យតម្លៃ និងការផ្ដល់កិត្តិយសពីសំណាក់មនុស្សជុំវិញខ្លួន គឺជាគុណតម្លៃមួយដ៏ថ្លៃថ្លា ដែលមនុស្សគ្រប់គ្នាតែងប្រាថ្នាចង់បាន។ ដើម្បីទទួលបានគុណតម្លៃទាំងនេះ គឺមិនពិបាកនោះទេ ប៉ុន្តែក៏មិនមែនជារឿងងាយនោះដែរ ព្រោះវាអាស្រ័យលើអត្តចរិតរបស់យើងម្នាក់ៗ។
យោងតាមគេហទំព័រ Hack Spirit ខាងក្រោមនេះ គឺជាសញ្ញាទាំង ៦ដែលបញ្ហាញថា អ្នកជាមនុស្សដែលមានអត្តចរិតគួរឱ្យគោរព៖
១. គោរពពាក្យសន្យា៖ ការគោរពពាក្យសន្យាពិតជាមានសារៈសំខាន់ណាស់ ព្រោះវាជាផ្នែកមួយដែលធ្វើឱ្យយើងក្លាយជាមនុស្សមានតម្លៃ។ សូម្បីសុភាសិតខ្មែរយើងក៏បានលើកឡើងផងដែរថា «មនុស្សគេយកសម្ដី ដំរីគេយកភ្លុក» ហេតុនេះពាក្យសម្ដី ឬពាក្យសន្យារបស់យើងគឺពិតជាមានតម្លៃខ្លាំងណាស់។ ដូច្នេះហើយ ទើបមនុស្សដែលនិយាយហើយធ្វើ តែងតែទទួលបានការគោរព និងឱ្យតម្លៃពីអ្នកដទៃ។
២. គួរឱ្យទុកចិត្ត ៖ ក្រៅពីគោរពពាក្យសន្យាអ្នកក៏ជាមនុស្សដែលគួរឱ្យទុកចិត្តបានផងដែរ ព្រោះអ្នកជាមនុស្សមានភាពស្មោះត្រង់ ដែលតែងតែនិយាយពាក្យពិត។ លើសពីនេះ នៅពេលដឹងអាថ៌កំបាំងអ្នកដទៃ អ្នកមិនយកទៅនិយាយផ្ដេសផ្ដាសនោះទេ ព្រោះអ្នកដឹងថា វាមិនមែនជារឿងគួរនិយាយ។ ជាពិសេស អ្នកក៏មិនដែលចេះផិតក្បត់ ឬបោកប្រាស់នៅពេលមានទំនាក់ទំនងជាមួយនរណាម្នាក់នោះដែរ។
៣. ចេះគោរព និងឱ្យតម្លៃអ្នកដទៃ ៖ អ្នកជាមនុស្សដែលមិនចេះប្រកាន់ខ្លួន ចេះគោរព និងឱ្យតម្លៃអ្នកដទៃដូចៗគ្នា មិនថាគេជាជនជាតិអ្វី ភេទអ្វី កាន់សាសនា ឬមានទស្សនៈនយោបាយបែបណានោះទេ។ អ្នកចេះសម្របខ្លួនទៅនឹងភាពចម្រុះ និងមានគោលគំនិតចូលចិត្តស្វែងយល់ពីវប្បធម៌របស់អ្នកដទៃ។
៤. ចេះយកអាសារអ្នកដទៃ ៖ នៅពេលឃើញអ្នកដទៃមានទុក្ខលំបាក ឬជួបបញ្ហា អ្នកមិនអាចឈរនៅស្ងៀមមិនជួយនោះទេ ព្រោះមានអារម្មណ៍ថាមិនគប្បី។ ប្រសិនបើអ្នកអាចជួបគេបាន អ្នកនឹងធ្វើភ្លាម ដោយសារអ្នកយល់ថា ពិភពលោកនឹងក្លាយជាទីកន្លែងដែលគួរឱ្យចង់រស់នៅ ពេលដែលមនុស្សគ្រប់គ្នាចេះជួយគ្នាទៅវិញទៅមក។
៥. ចេះដាក់ខ្លួន ៖ ជានិច្ចជាកាល អ្នកមិនដែលគិតថា ខ្លួនឯងជាមនុស្សមានសមត្ថភាពខ្ពស់ជាងអ្នកដទៃនោះទេ ទោះជាអ្នកជាមនុស្សពូកែយ៉ាងណាក៏ដោយ។ អ្នកតែងតែមានស្មារតីរៀនសូត្រពីភាពខ្លាំងរបស់អ្នកដទៃ ហើយចំណុចនេះបានធ្វើឱ្យមនុស្សជុំវិញខ្លួនគោរពស្រឡាញ់អ្នកដោយគ្មានលក្ខខណ្ឌ។
៦. មិនស្ទាក់ស្ទើរទទួលកំហុស ៖ គ្មាននរណាម្នាក់ល្អឥតខ្ចោះ ឬពូកែគ្រប់រឿងនោះទេ គ្រប់គ្នាតែងតែបង្កើតកំហុស។ ប៉ុន្តែមិនមែនជារឿងងាយស្រួលទេ ក្នុងការទទួលកំហុសខ្លួនឯង ព្រោះទង្វើនេះធ្វើឱ្យយើងមានអារម្មណ៍ថា ខ្លួនឯងជាមនុស្សមិនឆ្លាត ឬក៏ខ្លាចមានបញ្ហា។ យ៉ាងណាមិញ អ្នកហ៊ានប្រឈមមុខនឹងការពិត និងមិនស្ទាក់ស្ទើរក្នុងការទទួលកំហុសនោះទេ ហើយចំណុចនេះក៏ធ្វើឱ្យអ្នកដទៃកោតសរសើរអ្នកផងដែរ។
សរុបមក អត្តចរិតគឺពិតជាសំខាន់ណាស់ក្នុងការរស់នៅ និងបំពេញការងារ ព្រោះវាអាចធ្វើឱ្យអ្នកក្លាយជាមនុស្សមានតម្លៃ និងទទួលបានការគោរពពីអ្នកដទៃ ប៉ុន្តែក៏អាចធ្វើឱ្យអ្នកបាត់បង់តម្លៃដូចគ្នា ។ យ៉ាងណាមិញ ប្រសិនបើអ្នកជាមនុស្សដែលមានទាំង ៦ចំណុចខាងលើក្នុងខ្លួន មានន័យថា អ្នកបានបង្កើតគុណតម្លៃ កិត្តិយស និងកេរ្តិ៍ឈ្មោះសម្រាប់ខ្លួនឯងរួចទៅហើយ៕
