ភ្នំពេញ – ក្រសួងអប់រំ យុវជន និងកីឡា នឹងរៀបចំការប្រឡងសិស្សពូកែទូទាំងប្រទេសផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២ ដោយ​គ្រោង​នឹង​ប្រព្រឹត្តទៅនៅថ្ងៃទី១២ ខែមិថុនា ឆ្នាំ២០២៣ ក្នុងបំណង​ដើម្បីពង្រឹងគុណភាពអប់រំ និងអភិវឌ្ឍធនធានមនុស្សប្រកបដោយសីលធម៌។

បើតាមឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និ​ងកីឡា ការប្រឡងសិស្សពូកែទូទាំងប្រទេសផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២ នឹងប្រព្រឹត្តទៅរយៈពេល ៣ថ្ងៃ ចាប់ពីថ្ងៃ១២ ដល់ថ្ងៃទី១៤ ខែមិថុនា ឆ្នាំ២០២៣។

តាមការបញ្ជាក់របស់ឯកឧត្តម រស់ សុវាចា ការប្រឡងជ្រើសរើសសិស្សពូកែទូទាំងប្រទេសឆ្នាំ២០២៣នេះ ក្រសួងអប់រំបានជ្រើសរើសវិទ្យាល័យ នេត យ៉ង់ ស្ថិតក្នុងខេត្តបាត់ដំបងដែលជាមណ្ឌលប្រឡងសិស្សពូកែ ប្រចាំរាជធានី ខេត្ត និងទូទាំងប្រទេស។ ក្រោយដំណើរការប្រឡងសិស្សពូកែទូទាំងប្រទេសរួចរាល់ ប្រតិភូប្រចាំរាជធានីខេត្តនីមួយៗនឹងនាំបេក្ខជនសិស្សពូកែធ្វើដំណើរតាមរម្មណីយដ្ឋានកែច្ឆៃ ធម្មជាតិ និងវប្បធម៌។

យោង​តាមសេចក្ដីណែនាំរបស់ក្រសួងអប់រំ ការប្រឡងជ្រើសរើសសិស្សពូកែទូទាំងប្រទេសបានកំណត់យក ២កម្រិតថ្នាក់ គឺថ្នាក់ទី៩ និងទី១២។ ចំណែកវិញ្ញាសាប្រឡងរួមមានផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា។ ប្រធានវិញ្ញាសាប្រឡងជ្រើសរើសសិស្សពូកែទូទាំងប្រទេស រៀបចំដោយក្រសួងអប់រំ យុវជន និងកីឡា ដោយគិតតាមកម្មវិធីសិក្សាពីថ្នាក់ទី៧ ដល់ថ្នាក់ទី៩ សម្រាប់ការប្រឡងសិស្សពូកែថ្នាក់ទី៩ និងពីថ្នាក់ទី៧ ដល់ថ្នាក់ទី១២ សម្រាប់ការប្រឡងសិស្សពូកែថ្នាក់ទី១២។

ចំពោះជ័យលាភីសិស្សពូកែទូទាំងប្រទេស ត្រូវទទួលបានរង្វាន់ និងការលើកទឹកចិត្តពីរាជរដ្ឋាភិបាលកម្ពុជា រួមមាន ប្រកាសស្តីពីការទទួលស្គាល់សិស្សពូកែដោយរដ្ឋមន្ត្រីក្រសួងអប់រំ យុវជន និងកីឡា មួយច្បាប់,  មេដាយមួយគ្រឿង សម្រាប់បេក្ខជនជ័យលាភី ចំណាត់ថ្នាក់ពីលេខ១ ដល់លេខ៣ និងវិញ្ញាបនបត្របញ្ជាក់សិស្សពូកែទូទាំងប្រទេសមួយច្បាប់ រួមទាំងប្រាក់រង្វាន់តាមចំណាត់ថ្នាក់។ បេក្ខជនជ័យលាភីសិស្សពូកែទូទាំងប្រទេស ក៏អាចមានប្រាក់រង្វាន់ ឬវត្ថុផ្សេងៗបន្ថែមទៀតពីសប្បុរសជន។

គួរជម្រាបជូនថា ការប្រកាសលទ្ធផលប្រឡងសិស្សពូកែទូទាំងប្រទេស ការចែកវិញ្ញាបនបត្រ និងចែករង្វាន់ជ័យលាភីសិស្សពូកែទូទាំងប្រទេស នឹងប្រព្រឹត្ត​ទៅ​នៅថ្ងៃទី១៨ ខែមិថុនា ឆ្នាំ២០២៣ នៅវិទ្យាល័យ នេត យ៉ង់ ខេត្តបាត់ដំបង៕