ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានគូសបញ្ជាក់ថា «ព្រះរាជក្រឹត្យស្តីពីលក្ខន្តិកៈ នៃអង្គគ្រូបង្រៀន» ថ្មី គឺជាសមិទ្ធផលដ៏សំខាន់ដែលបានឆ្លើយតបយ៉ាងប្រសើរទៅនឹងវិធានការគន្លឹះរបស់រាជរដ្ឋាភិបាល ក្នុងការកសាងសមត្ថភាព និងពង្រឹងយន្តការស្ថាប័នឱ្យកាន់តែរឹងមាំ សំដៅលើកកម្ពស់គុណភាពនៃការអប់រំ និងផ្តល់អត្ថប្រយោជន៍ជាច្រើនដល់បុគ្គលិកសិក្សានៅទូទាំងប្រទេស។
ក្នុងសិក្ខាសាលាផ្សព្វផ្សាយ «ព្រះរាជក្រឹត្យស្តីពីលក្ខន្តិកៈ នៃអង្គគ្រូបង្រៀន» កាលពីដើមសប្តាហ៍នេះ នៅវិទ្យាស្ថានជាតិអប់រំ ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកឡើងថា ព្រះរាជក្រឹត្យនេះបានឆ្លើយតបយ៉ាងចំទិសដៅទៅនឹងវិធានការគន្លឹះទាំង៥ ដែលដាក់ចេញដោយសម្ដេចមហាបវរធិបតី នាយករដ្ឋមន្ត្រី ដើម្បីបង្កើនល្បឿននៃការធ្វើកំណែទម្រង់រដ្ឋបាលសាធារណៈ រួមមាន ៖១.ប្រព័ន្ធជ្រើសរើសមន្ត្រី ដោយអនុវត្តតាមអភិក្រម «រើសឱ្យចំ ប្រើឱ្យត្រូវ រក្សាឱ្យនៅ» ប្រកបដោយគុណាធិបតេយ្យ តម្លាភាព និងយុត្តិធម៌, ២. ពង្រឹងសមត្ថភាព និងសមិទ្ធកម្ម ដើម្បីលើកកម្ពស់គុណភាពការងារដោយផ្អែកលើវិន័យ សីលធម៌ និងវិជ្ជាជីវៈ និង ៣.ប្រព័ន្ធលើកទឹកចិត្ត គាំទ្រសមិទ្ធកម្មការងារក្នុងរដ្ឋបាលសាធារណៈប្រកបដោយសមធម៌ និងចីរភាព។
ឯកឧត្តមឧបនាយករដ្ឋមន្ត្រី ក៏បានរំលេចពីចំណុចស្នូល និងគុណតម្លៃជាច្រើននៃការផ្លាស់ប្តូរតាមរយៈព្រះរាជក្រឹត្យថ្មីនេះ រួមមាន៖
- ព្រះរាជក្រឹត្យនេះជាចំណុចរបត់ថ្មីមួយក្នុងអភិបាលកិច្ចវិស័យអប់រំ ដោយផ្លាស់ប្តូរពីការគ្រប់គ្រង បែកខ្ញែក មកជាប្រព័ន្ធ គ្រប់គ្រងរួមមួយ ដើម្បីកសាងធនធានមនុស្សដ៏រឹងមាំសម្រាប់អនាគតកម្ពុជា
- ប្រមូលផ្តុំនិងគ្រប់គ្រងបុគ្គលិកអប់រំ ទាំងបុគ្គលិកអប់រំក្នុងក្របខ័ណ្ឌមន្ត្រីរាជការ និងបុគ្គលិកអប់រំក្រៅក្របខ័ណ្ឌមន្ត្រី រាជការ ដើម្បីធានាសង្គតិភាព និងគុណភាពទាំងនៅថ្នាក់ជាតិនិងរដ្ឋបាលថ្នាក់ក្រោមជាតិ
- កំណត់និងពង្រឹងការទទួលខុសត្រូវរបស់ក្រសួងអប់រំ យុវជន និងកីឡា លើសមត្ថកិច្ចគ្រប់គ្រងអង្គគ្រូបង្រៀន
- កំណត់អំពីមុខតំណែងក្នុងអង្គគ្រូបង្រៀនជា២ ប្រភេទគឺ មុខតំណែងវិជ្ជាជីវៈ និងមុខតំណែងគ្រប់គ្រង ព្រមទាំងបើកផ្លូវ ដល់ការរៀបចំការពិពណ៌នាអំពីមុខតំណែង និងគុណវុឌ្ឍិសម្រាប់មុខតំណែងនីមួយៗបានច្បាស់លាស់
- លើកកម្ពស់គុណតម្លៃបុគ្គលិកអប់រំ តាមរយៈការរៀបចំឱ្យមានតែ១ប្រភេទក្របខ័ណ្ឌ គឺក្របខ័ណ្ឌ ប្រភេទ”ក”(សញ្ញាបត្រ បរិញ្ញាបត្រឬសមមូលឡើងទៅ) ដែលមាន៣(បី)កម្រិត ដូចជា ក្របខ័ណ្ឌគ្រូបង្រៀនកម្រិតឧត្តម ក្របខ័ណ្ឌគ្រូបង្រៀន កម្រិតមូលដ្ឋាន និងក្របខ័ណ្ឌគ្រូបង្រៀនកម្រិតបឋម។ កម្រិតក្របខ័ណ្ឌនីមួយៗ មាន ៣ឋានន្តរសក្តិ និង១៤ថ្នាក់
- កំណត់អំពីការជ្រើសរើសចូលក្នុងអង្គគ្រូបង្រៀន ដែលត្រូវធ្វើឡើងតាម ២របៀប គឺ (១)ការជ្រើសរើសបណ្តុះបណ្តាល ចូលក្នុងអង្គគ្រូបង្រៀន និង (២)ការជ្រើសរើសបញ្ចូលក្នុងអង្គគ្រូបង្រៀន ដើម្បីឱ្យស្របនឹងស្ថានភាពជាក់ស្តែង
- លើកទឹកចិត្តនិងទាក់ទាញបេក្ខជនដែលមានសមត្ថភាពឱ្យចូលបម្រើការងារជាមន្ត្រីរាជការនៃអង្គគ្រូបង្រៀន តាមរយៈ ការផ្តល់ការតាំងស៊ប់ទៅក្នុងក្របខ័ណ្ឌ និងឋានន្តរសក្តិទៅតាមកម្រិតសញ្ញាបត្រ ដូចជា៖ ក.៣.៣ (បរិញ្ញាបត្រ) ក.៣.២ (បរិញ្ញាបត្រជាន់ខ្ពស់) និង ក.២.២ (បណ្ឌិត)
- ពន្លឿននីតិវិធីនៃការតាំងស៊ប់មន្ត្រីរាជការនៃអង្គគ្រូបង្រៀនទាំងនៅក្រសួង ស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ ត្រូវសម្រេចដោយប្រកាសរបស់រដ្ឋមន្ត្រីក្រសួងអប់រំ យុវជន និងកីឡា
- កំណត់អំពីការអភិវឌ្ឍសមត្ថភាពជាប្រចាំរបស់បុគ្គលិកអប់រំនៃអង្គគ្រូបង្រៀន ដោយតម្រូវឱ្យមានវិញ្ញាបនបត្រគរុសម្បទាវិជ្ជាជីវៈដែលមានសុពលភាព ព្រមទាំងត្រូវចូលរួមវគ្គតម្រង់ទិសវិជ្ជាជីវៈ តាមរយៈការបណ្តុះបណ្តាលគរុកោសល្យ និងការបណ្តុះបណ្តាលតម្រង់ទិសជាចាំបាច់
- កំណត់អំពីការផ្លាស់ប្តូរកន្លែងធ្វើការ និងអនុញ្ញាតឱ្យការផ្លាស់ប្តូរប្រភេទក្របខ័ណ្ឌក្នុងអង្គគ្រូបង្រៀន (រវាងគ្រូបង្រៀន កម្រិតឧត្តម គ្រូបង្រៀនកម្រិតមូលដ្ឋាន និងគ្រូបង្រៀនកម្រិតបឋម) បានច្បាស់លាស់
- កំណត់អំពីលក្ខខណ្ឌនៃការផ្ទេរមន្ត្រីរាជការនៃអង្គគ្រូបង្រៀនទៅអង្គវិជ្ជាជីវៈផ្សេងទៀត និងការផ្ទេរមន្ត្រីរាជការនៃអង្គវិជ្ជាជីវៈផ្សេងទៀតចូលក្នុងអង្គគ្រូបង្រៀន មានលក្ខណៈច្បាស់លាស់ និងសមស្រប
- កំណត់អំពីការដំឡើងឋានន្តរសក្តិនិង/ឬថ្នាក់ ឱ្យស្របតាមការអនុវត្ត និងគម្រោងថវិកាប្រចាំឆ្នាំ ច្បាប់ថវិកាប្រចាំឆ្នាំ សម្រាប់ចំណាយបន្ទុកបុគ្គលិក ព្រមទាំងលើកទឹកចិត្តតាមរយៈការដំឡើងឋានន្តរសក្តិ និង/ឬថ្នាក់ ជូនមន្ត្រីរាជការនៃអង្គគ្រូបង្រៀនដែលស្ម័គ្រចិត្តអនុវត្តតាមគោលការណ៍ពង្រាយមន្ត្រី បំពេញការងារនៅតំបន់ឆ្ងាយដាច់ស្រយាល តំបន់ប៉ះពាល់សុខភាព ឬគ្រោះថ្នាក់
- កំណត់អំពីវិន័យនិងសីលធម៌ បទប្បញ្ញត្តិដែលពាក់ព័ន្ធជាធរមាននានា ដែលបុគ្គលិកអប់រំនៃអង្គគ្រូបង្រៀន ត្រូវគោរព និងអនុវត្ត បានច្បាស់លាស់
- កែសម្រួលយន្តការមន្ត្រីរាជការនៃអង្គគ្រូបង្រៀនឱ្យចូលនិវត្តន៍ ឬបាត់បង់សម្បទាវិជ្ជាជីវៈ ត្រូវសម្រេចដោយ ព្រះរាជក្រឹត្យ ឬអនុក្រឹត្យ ឬប្រកាសរបស់រដ្ឋមន្ត្រីក្រសួងមុខងារសាធារណៈ ឬដីការបស់រដ្ឋបាលថ្នាក់ក្រោមជាតិ អាស្រ័យទៅតាមកម្រិតនៃមុខតំណែង
- លើកទឹកចិត្តមន្ត្រីរាជការនៃអង្គគ្រូបង្រៀនបច្ចុប្បន្ន ដែលកំពុងបំពេញការងារផ្នែកបង្រៀន ឬស្រាវជ្រាវ ឬក៏គ្រប់គ្រង នៅតាម គ្រឹះស្ថានសិក្សា និងអង្គភាពសាធារណៈ ក្នុងវិស័យអប់រំនិងបណ្តុះបណ្តាល និងដែលបានបំពេញលក្ខខណ្ឌគុណវុឌ្ឍិ សមស្រប អាចធ្វើសមាហរណកម្មទៅក្នុងក្របខ័ណ្ឌឋានន្តរសក្តិ និងថ្នាក់ថ្មីស្របតាមបទប្បញ្ញត្តិនៃព្រះរាជក្រឹត្យនេះ។
ពាក់ព័ន្ធនឹងការអនុវត្តជាក់ស្តែង ឯកឧត្តមបានបញ្ជាក់ថា ការធ្វើសមាហរណកម្មចូលក្នុងព្រះរាជក្រឹត្យថ្មី គឺធ្វើតាមដំណាក់កាល ស្របតាមផែនការប្រចាំឆ្នាំ ដែលសម្រេចដោយ ប្រមុខរាជរដ្ឋាភិបាល យោងតាមសំណើរបស់រដ្ឋមន្ត្រីក្រសួងអប់រំ យុវជន និងកីឡា រដ្ឋមន្ត្រីក្រសួងមុខងារសាធារណៈ និងរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក្នុងនោះ(១)មន្ត្រីរាជការ ដែលអាចសមាហរណកម្មចូលក្នុងព្រះរាជក្រឹត្យថ្មីនេះបានលុះត្រាតែ ជាមន្ត្រីរាជការកំពុងបំពេញការងារផ្នែកបង្រៀន ឬស្រាវជ្រាវ ឬក៏គ្រប់គ្រងនៅតាមគ្រឹះស្ថានសិក្សា និងអង្គភាពសាធារណៈ ក្នុងវិស័យអប់រំ និងបណ្តុះបណ្តាល និងមានគុណវុឌ្ឍិនិងបំពេញលក្ខខណ្ឌគ្រប់គ្រាន់ដែលតម្រូវតាមប្រភេទក្របខ័ណ្ឌនៃអង្គគ្រូបង្រៀនដែលកំណត់ដោយព្រះរាជក្រឹត្យនេះ (២)ដោយឡែកមន្ត្រីរាជការ ដែលមិនមានគុណវុឌ្ឍិគ្រប់គ្រាន់ ត្រូវបន្តស្ថិតក្រោមព្រះរាជក្រឹត្យចាស់ទាំង៣ រហូតដល់ចូលនិវត្តន៍។
ជាមួយគ្នានេះ ឯកឧត្តមរដ្ឋមន្ត្រីក្រសួងអប់រំ ក៏បានបញ្ជាក់ដែរថា ព្រះរាជក្រឹត្យស្តីពីលក្ខន្តិកៈនៃអង្គគ្រូបង្រៀននេះ នឹងមិនទៅនិរាករណ៍ព្រះរាជក្រឹត្យចាស់ទាំង៣ រួមមាន (១) ព្រះរាជក្រឹត្យ ស្តីពីលក្ខន្តិកៈដោយឡែកនៃក្របខ័ណ្ឌគ្រូបង្រៀនកម្រិតឧត្តម (២)ព្រះរាជក្រឹត្យស្តីពីលក្ខន្តិកៈដោយឡែកនៃក្របខ័ណ្ឌ គ្រូបង្រៀនកម្រិតមូលដ្ឋាន និង (៣)ព្រះរាជក្រឹត្យស្តីពីលក្ខន្តិកៈដោយឡែកនៃក្របខ័ណ្ឌគ្រូបង្រៀនកម្រិតបឋម នោះទេ៕
