ជាបទពិសោធន៍មួយ ដែលសិស្សទូទៅបានជួប គឺការចំណាយពេលច្រើនម៉ោងក្នុងការអាន ប៉ុន្តែមិនយូរប៉ុន្មាន បែរជាភ្លេចភ្លាំង នូវអ្វីដែលបានរៀន។ ការប្រឹងប្រែងរៀនច្រើន មិនប្រាកដថាទទួលបានប្រសិទ្ធភាព មានតែការជ្រើសរើសវិធីសាស្រ្ត ឬក៏បច្ចេកទេសរៀនទេ ទើបជាការឆ្លើយតបនឹងភាពឈ្លាសវៃនៃការសិក្សា។

គេហទំព័រ Scholarship Region បានប្រាប់អំពីបច្ចេកទេស នៃការរៀនដោយប្រើប្រាស់កម្មវិធីជំនួយក្នុងការបង្កើនប្រសិទ្ធភាពនៃដំណើរជាសិស្ស ឬនិស្សិត​ ដូចជាកម្មវីធី Google Calendar សម្រាប់ការបែងចែងពេលរៀន និងការរំលឹកអំពីភារកិច្ចនីមួយៗ, Audiobooks & Podcasts សម្រាប់អ្នកចាប់មិនសូវបានពេលអាន, YouTube សម្រាប់អ្នករៀនដោយប្រើរូបភាព, Grammarly សម្រាប់ផ្ទៀងផ្ទាត់ការសរសេរ និងសន្សំពេលជាដើម។

Google Calendar ៖ សម្រាប់សិស្ស ដែលត្រូវរៀនមុខវិជ្ជាច្រើនក្នុងពេលតែមួយ ឬក៏និស្សិតដែលត្រូវធ្វើការផង និងរៀនផង ធ្វើឱ្យសិស្សស្រ្តេសនឹងការកំណត់អាទិភាពការងារសំខាន់ និងការបែងចែកពេលវេលា រហូតបាត់បង់តុល្យភាពរវាងជីវិតនៃការសិក្សា ការងារ និងការថែទាំសុខភាព ជារឿយៗកត្តាទាំងនេះបណ្តាលឱ្យមានអារម្មណ៍លើសលប់ ហើយរុញច្រានឱ្យសិស្សបោះបង់ ឬផ្អាកការសិក្សា រួមទាំងបាត់បង់ទំនុកចិត្តចំពោះខ្លួនឯង។

ការប្រើប្រាស់កម្មវីធី Google Calendar បានរួមចំណែកយ៉ាងសំខាន់ក្នុងការសម្រួលដល់ការងារសាលា ជាការរំលឹក និងការកំណត់អាទិភាពការងារ ការរៀបចំផែនការសកម្មភាព ការរៀបចំមុខវិជ្ជាសិក្សា ការបង្កើតភាពជាប់លាប់ក្នុងការសិក្សា ដែលកត្តាទាំងនេះហើយមិនត្រឹមតែរួមចំណែកដល់ការសិក្សាប្រកបដោយមានប្រសិទ្ធភាពប៉ុណ្ណោះទេ ប៉ុន្តែជាការបន្ធូរបន្ថយនូវភាពតានតឹងផងដែរ។

Spotify Audiobooks & Podcasts ៖ អានជាចំណែកមួយ នៃការសិក្សាដែលពុំអាចខ្វះបាន ប៉ុន្តែមិនមែនរាល់សិស្សទាំងអស់សុទ្ធតែទទួលបានព័ត៌មានពេញលេញទាំងស្រុងតាមរយៈការអានជាច្រើនម៉ោងនោះទេ! ដូច្នេះចាំបាច់ត្រូវការវិធីសាស្រ្តផ្សេងមកជំនួយ ហើយកម្មវីធីមួយជួយពន្លឿន នៃការសិក្សាដែលពោរពេញដោយភាពមមាញឹកនោះ គឺ Spotify Audiobooks & Podcasts ព្រោះវាមិនមែនគ្រាន់តែបច្ចេកទេសមួយ ក្នុងការស្តាប់ដើម្បីស្រូបយកព័ត៌មានល្អៗបន្ថែមនោះទេ ប៉ុន្តែក៏ប្រើប្រាស់នៅពេលចង់ធ្វើសកម្មភាពពីរក្នុងពេលតែមួយផងដែរ។ តួយ៉ាងដូចជា ដើរបណ្តើរស្តាប់បណ្តើរ។ បន្ថែមពីនោះកម្មវិធីនេះ ក៏បង្កើនប្រសិទ្ធភាពទៅកាន់អ្នកដែលរៀនតាមរយៈរូបភាពដូចគ្នា ក្រៅពីការស្តាប់ចាប់សម្លេងហើយ គឺនៅមានរូបភាពក្នុងការពន្យល់បង្ហាញទៀតផង។

Grammarly ៖ សម្រាប់សិស្សដែលត្រូវសរសេរសំណេរជាភាសាអង់គ្លេស កម្មវីធី Grammarly បានជួយសម្រួលដល់ការពិនិត្យពាក្យ ឬក៏វេយ្យាករណ៍បានខ្លះ និងបង្ហាញផ្លូវក្នុងការសរសេរ ហើយរឹងរឹតតែសំខាន់ក្នុងការប្រើប្រាស់ឱ្យពិនិត្យបន្ថែមនៅពេលសរសេរពាក្យដាក់អាហាររូបករណ៍នានា។ ដូច្នេះពេលដែលដល់ដំណាក់កាលសរសេរ សិស្សពុំគួរមើលរំលងកម្មវិធីនេះទេ ព្រោះវាអាចសន្សំពេលវេលា និងរក្សាថាមពលក្នុងការសិក្សាបន្ថែមលើមុខវិជ្ជាដទៃៗទៀត៕