តាមរបាយការណ៍របស់ World Happiness Report នៅឆ្នាំ២០២៣ បានបង្ហាញថា ប្រទេស​ហ្វាំងឡង់ គឺជាប្រទេសដែលមានប្រជាជនសម្បូរភាពសប្បាយរីករាយជាងគេ ។ បើតាមការ​សិក្សា វិធីសាស្រ្តដែលជំរុញសុភមង្គលនិងភាពស្រស់ស្រាយគឺគេអាចអនុវត្តបានគ្រប់ទីកន្លែង ហើយវាមិនសំខាន់ថា អ្នករស់នៅទីណា ឬប្រទេសណានោះទេ។ សុភមង្គល ឬភាពស្រស់ស្រាយ គឺកើតមកពីទម្លាប់ ឬសកម្មភាពដែលោកអ្នកជ្រើសរើសក្នុងការប្រព្រឹត្ត។

យោងតាមគេហទំព័រ Fortune Well បានបង្ហាញថា មានមនុស្សច្រើនណាស់ដែលគិតថា ភាពរីករាយហាក់មិនមានភាពប្រាកដនិយម ឬគ្មានភាពទៀងទាត់ទាល់តែសោះ ហើយថែមទាំងពិបាកក្នុងការស្វែងរក ប៉ុន្តែមានអ្នកជំនាញនិងអ្នកស្រាវជ្រាវ មួយចំនួនបានឱ្យដឹងពីគន្លឹះខ្លះៗ ដែលអាចជួយឱ្យអ្នកសម្រេចបាននូវសេចក្ដីសុខពិតដែលមានភាពជាក់លាក់នៅក្នុងដំណើរជីវិត និងមានរៀបរាប់លម្អិតដូចតទៅ៖

១. បណ្តុះផ្នត់គំនិតវិជ្ជមាន ៖ បទពិសោធន៍នៃសំណើច ឬក៏ភាពរីករាយ ក៏ដូចជាការពេញចិត្តជាមួយនឹងខ្លួនឯង ឬក៏ការរួមបញ្ចូលនៅសុខុមាលភាពក្នុងការរស់នៅក្នុងស្ថានភាពជីវិតពិត វាបានបង្កើនអត្ថន័យឱ្យជីវិត ថែមទាំងធ្វើឱ្យកើននូវរឿងរ៉ាវដែលមានតម្លៃជាច្រើនទៀត។ សកម្មភាពបណ្តុះផ្នត់គំនិតវិជ្ជមាន ជាប្រភពនាំទៅរកសេចក្ដីសុខ ឬក៏សុភមង្គលក្នុងជីវិត។ វាជារឿងពិតដែរថា ដើម្បីទទួលបានសេចក្ដីសុខសប្បាយ គឺចាំបាច់ណាស់ដែលត្រូវមានសកម្មភាព ឬវិធីសាស្រ្តក្នុងការពង្រឹង មិនមែនអង្គុយបង្អង់ចាំឱ្យកើតឡើងដោយឯងៗបាននោះទេ។ វិធីដែលលោកអ្នកគួរចាប់ផ្តើមដំបូង គឺការសរសេរកំណត់ទុកនូវសេចក្ដីល្អៗ ទាក់ទងនឹងការពេញចិត្តចំពោះខ្លួនឯង ឬសរសេរគម្រោងសកម្មភាពនានា ដែលជួយឱ្យមានអារម្មណ៍ល្អជាមួយខ្លួនឯង មួយវិញទៀតរំឮកអំពីសមិទ្ធផលផ្ទាល់ខ្លួនទាំងឡាយផងដែរ ដើម្បីបង្កើនការជំរុញចិត្ត និងភាពរីករាយ។ ដោយឡែក អ្នកជំនាញក៏បានឱ្យដឹងដែរថា ការហាត់ធ្វើសមាធិ ឬក៏ធ្វើយូហ្កា គឺជាចំណុចសំខាន់ដែលនាំឱ្យមានសេចក្ដីរីករាយក្នុងការរស់នៅ ត្រូវអនុវត្តរឿយៗ ទោះតិចក្ដី ច្រើនក្ដី។

២. កាត់បន្ថយស្រ្តេស ៖ យកចិត្តទុកដាក់ ក្នុងការកាត់បន្ថយស្រ្តេស គឺជាចំណែកយ៉ាងសំខាន់ក្នុងការបង្កើនកម្រិតនៃសុភមង្គល ឬភាពរីករាយរបស់អ្នក។ តាមរយៈការចំណាយពេលជាមួយនឹងធម្មជាតិក៏ចាត់ទុកថា ជាការកាត់បន្ថយភាពតានតឹង ឬស្រ្តេស បានមួយផ្នែកដែរ។ យ៉ាងណាក៏ដោយ ទោះបីជាលោកអ្នក មិនមានពេលច្រើនក្នុងការចំណាយទៅកាន់កន្លែងល្អៗក៏ដោយ ប៉ុន្តែអ្នកនៅតែអាចស្វែងរកវិធីសាស្រ្តមួយបាន តាមរយៈការស្ដាប់ភ្លេងធម្មជាតិដែលផ្តល់នូវការកម្សាន្តអារម្មណ៍ ។

សូមរំលេចបន្តិចថា ស្រ្តេសក៏បណ្តាលមកពី ថា តើអ្នកយកចិត្តទុកដាក់តាមដានខ្លួនឯងដែរឬទេ? បើសិនជាអ្នករកឃើញថា បច្ចុប្បន្នហាក់មិនមានពេលដើម្បីផ្តល់ឱ្យខ្លួនឯងនោះ  គឺវាអាចប៉ះពាល់ដល់សុខភាព និងបង្អាក់ភាពស្រស់ស្រាយ។ បើធៀបគ្នាមើលទៅឃើញថា ជារឿយៗ បុគ្គលដែលមានពេលវេលាសម្រាប់ខ្លួនឯង ពួកគាត់តែងគិតថា មានពេលគ្រប់គ្រាន់ក្នុងការសម្រេចនូវអ្វីដែលពួកគាត់ចង់ធ្វើ។ ដោយឡែក អ្នកដែលមានអារម្មណ៍ថាគ្មានពេលសម្រាប់ខ្លួនឯង គឺពួកគាត់តែងតែគិតថា មិនមានពេលគ្រប់គ្រាន់ដើម្បីធ្វើរឿងដែលត្រូវនឹងគោលបំណង ហើយបង្កបានទៅជាសម្ពាធ និងភាពស្រ្តេស ថែមទាំងមានអារម្មណ៍ពិបាកទប់ទល់ក្នុងការស់នៅ ហើយជារឿយៗ អ្នកដែលយល់ថា គ្មានពេលចំពោះខ្លួនឯង តែងមានអាការប្រញាប់ប្រញាល់ស្ទើរគ្រប់រឿង ឯកត្តាប្រឈមគឺ ពិបាកផ្តោតអំពីបច្ចុប្បន្នភាព អាចនឹងកើតមានភាពតឹង ឬក៏ការបាក់ទឹកចិត្ត ជារួមគឺប៉ះពាល់ទៅដល់សុខុមាលភាពក្នុងការរស់នៅ។ តាមរយៈការប្រៀបធៀបនេះ បង្ហាញថា ការផ្តល់ពេលវេលាយកចិត្តទុកដាក់ជាមួយខ្លួនឯង ក៏ជាកត្តានាំឱ្យមានភាពរីករាយមួយផ្នែកដែរ។

មិនតែប៉ុណ្ណោះទេ កត្តាហិរញ្ញវត្ថុ ឬសេដ្ឋកិច្ចមិនល្អ ក៏ជាកត្តាប្រឈមនាំឱ្យមនុស្សស្រ្តេស និងបង្អាក់នូវភាពស្រស់ស្រាយបានដែរ ដូច្នេះហើយ បើសិនជាបច្ចុប្បន្នលោកអ្នកកំពុងប្រទះវិបត្តិហិរញ្ញវត្ថុ ដែលខ្វះខាតសូម្បីទៅលើការចំណាយចំពោះតម្រូវការចាំបាច់ដូចជាគ្រឿងចិញ្ចឹមជីវិតរួមមានចំណី ម្ហូបអាហារ ឬមានបន្ទុកច្រើនដែលត្រូវទទួលខុសត្រូវ ក្នុងករណីនេះចំណេះដឹងផ្នែកហិរញ្ញវត្ថុតែមួយមុខមិនទាន់ឆ្លើយតបនៅឡើយទេ គឺចាំបាច់ត្រូវរកគន្លឹះបង្កើនចំណូលបន្ថែម ទើបជួយស្រោចស្រង់ស្ថានភាពឱ្យល្អប្រសើរបាន។

៣. ធ្វើលំហាត់ប្រាណ ៖ ការហាត់ប្រាណ គឺមិនចាំបាច់ទាល់តែក្លាយជាអ្នកហាត់អាជីពអ្វីនោះទេ គឺអនុវត្តទៅតាមកម្លាំងដែលមាន និងស្ទិលដែលផ្តល់ផាសុកភាពចំពោះរាងកាយរបស់ខ្លួនឯង។ លំហាត់ប្រាណ ផ្តល់ផលវិជ្ជមានយ៉ាងច្រើនទៅកាន់រាងកាយ ក៏ដូចជាប្រព័ន្ធដំណើរការខួរក្បាល និងសុភមង្គលផ្នែករាងកាយ ហើយបើបានហាត់ប្រាណនៅបរិវេណខាងក្រៅ គឺកាន់តែផ្តល់ភាពរីករាយទ្វេគុណ។

៤. ភ្ជាប់ទំនាក់ទំនងនឹងបរិយាកាសសង្គម ៖ កាលដែលមានមិត្ត សមាជិកគ្រួសារ ឬក៏សង្គមមនុស្សដទៃទៀត សម្រាប់ប្រាស្រ័យទាក់ទង ឬបង្កើតទំនាក់ទំនងថ្មីៗតាមរយៈសង្គមការងារ និងស្ម័គ្រចិត្តចូលជួយបំពេញភារកិច្ចក្នុងសមាគមណាមួយ សុទ្ធសឹងតែ ជាបុព្វហេតុនាំឱ្យមានទំនាក់ទំនងក្នុងសង្គម។ ពីព្រោះភ្ជាប់ទំនាក់ទំនងនឹងបរិយាកាសសង្គម ចាំបាច់ណាស់ក្នុងការបង្កើនសុភមង្គល ឬក៏ភាពរីករាយបន្ថែម។

មានការសិក្សាជាច្រើនបង្ហាញថា មនុស្សដែលរីករាយ តែងតែមានការភ្ជាប់ទំនាក់ទំនងក្នុងសង្គម ដោយពួកគាត់បានចំណាយពេលជារឿយៗជាមួយមិត្ត ក៏ដូចជាសមាជិកគ្រួសារ ដែលទំនាក់ទំនងទាំងនោះបង្កមានភាពស្និតស្នាល និងភាពច្បាស់លាស់ ថែមទាំងធ្វើឱ្យរីករាយជាងមុន។ វិធីក្នុងការពង្រឹងទំនាក់ទំនងមួយបែបទៀតគឺ ចេញទៅក្រៅពិសាអាហារជាមួយមិត្តរួមការងារ ឬក៏ផ្ញើសារទៅកាន់មិត្តចាស់ៗ។ ដែលសកម្មភាពទាំងនេះ មិនមែនធ្វើឡើងគ្រាន់តែដើម្បីបង្កើនចំនួនមនុស្សដែលទាក់ទងនោះទេ ប៉ុន្តែគឺដើម្បីរក្សាទំនាក់ទំនងឱ្យមានគុណភាពផងដែរ។  ទោះបីជាមានមនុស្សត្រឹមពីរ ឬក៏បីនាក់ សម្រាប់ទំនាក់ទំនងក៏ដោយ អ្វីដែលសំខាន់ គឺជាក្រុមមនុស្សអាចជួយឱ្យអ្នកមានអារម្មណ៍រីករាយ និងទទួលបានការគាំទ្រផ្នែកផ្លូវចិត្ត៕