ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ផ្អែកលើការសិក្សារបស់ JAMA Pediatrics បានរកឃើញថា កុមារដែលចំណាយពេលវេលានៅជាមួយអេក្រង់ច្រើនហួសប្រមាណ ធ្វើឱ្យការលូតលាស់ខួរក្បាលរបស់គេយឺត ហើយប៉ះពាល់ដល់សមត្ថភាពអក្ខរកម្ម ភាសា និងមុខងារពុទ្ធិបញ្ញារបស់ខួរក្បាល។
ជំនួសឱ្យការចំណាយពេលជាមួយអេក្រង់ច្រើន អាណាព្យាបាលអាចលើកទឹកចិត្តកុមារ ហ៊ាននិយាយជាមួយអ្នកដទៃ មានទំនាក់ទំនងក្នុងសង្គម និងរត់លេងកម្សាន្ត។ សកម្មភាពទាំងនេះ មានសារៈសំខាន់សម្រាប់ការអភិវឌ្ឍជំនាញគិត ដោះស្រាយបញ្ហា និងអនុវត្តការងារផ្សេងៗ។ ការចូលរួមពីសំណាក់ឪពុកម្ដាយ ដូចជា អានសៀវភៅ ច្រៀង គូរគំនូរ និងជូនកុមារទៅខាងក្រៅ សុទ្ធសឹងតែជាសកម្មភាព ដែលជួយពង្រឹង និងធ្វើឱ្យរចនាសម្ព័ន្ធខួរក្បាលកុមារ មានរបៀបរៀបរយ។
ការណែនាំអំពីការចំណាយពេលជាមួយអេក្រង់របស់កុមារ
ផ្អែកតាមគោលការណ៍ ណែនាំរបស់បណ្ឌិតសភាកុមារអាម៉េរិក (AAP) អំពីការចំណាយពេលជាមួយអេក្រង់ បានណែនាំ សកម្មភាពចំនួន ៤ សំខាន់ ៖
១. មិនអនុញ្ញាតឱ្យកុមារ អាយុក្រោម ១៨ខែ ប្រើប្រាស់បណ្ដាញសង្គម មើលវីដេអូ និងសម្លឹងអេក្រង់។
២. ប្រសិនបើអាណាព្យាបាលអនុញ្ញាតឱ្យកុមារអាយុ ចាប់ពី ១៨ ទៅ២៤ខែ ត្រូវជ្រើសរើសកម្មវិធី ដែលមានគុណភាពខ្ពស់ ដែលជួយដល់ការអភិវឌ្ឍខួរក្បាលកុមារ។
៣. កំណត់ពេលវេលា ត្រឹមមួយម៉ោងក្នុងមួយថ្ងៃ សម្រាប់កុមារ ហើយត្រូវធានាថា កម្មវិធីដែលកុមារអាយុចាប់ពី ២ ទៅ ៥ឆ្នាំ ជាកម្មវិធីដែលផ្ដល់ផលវិជ្ជមាន ដល់ការអភិវឌ្ឍខួរក្បាលកុមារ។
៤. មានពេលវេលាគ្មានប្រព័ន្ធផ្សព្វផ្សាយ និងការសម្លឹងអេក្រង់ក្នុងផ្ទះ ទាំងអាណាព្យាបាល និងកុមារ។
អង្គការសុខភាពពិភពលោក (WHO) និងបណ្ឌិតសភាកុមារអាម៉េរិក (AAP) បានណែនាំឱ្យឪពុកម្ដាយ ឬអាណាព្យាបាល បង្កើតវិន័យសម្រាប់កុមារឱ្យបានត្រឹមត្រូវ ក្នុងការចំណាយពេលវេលាជាមួយអេក្រង់។ ខណៈបច្ចុប្បន្ន បច្ចេកវិទ្យា បានក្លាយជាផ្នែកមួយនៃការរស់នៅរបស់មនុស្សស្ទើរតែគ្រប់គ្នា ហើយការយល់ដឹងអំពីការកំណត់ច្បាប់ និងបង្កើតវិន័យសម្រាប់កុមារបានត្រឹមត្រូវ ជាផ្នែកមួយសំខាន់ក្នុងការជួយកុមារ ឱ្យមានសុខភាព និងអនាគតល្អប្រសើរ៕
