ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សិក្សាឈ្វេងយល់អំពីអំណាច នៃការផ្តោត ជាជំនាញសំខាន់ដែលអាចជួយអភិវឌ្ឍន៍ផលិភាព កាត់បន្ថយស្រ្តេស និងជំរុញគុណភាពការងារ រួមទាំងការសិក្សា។
ប្រសិនបើយើងគិតទៅដល់រូបភាពមួយដែលស្ថិតក្នុងសភាពអ៊ូអរ ឈូឆរដោយការរំខានគ្រប់ទម្រង់ ច្បាស់ណាស់ថា វានឹងធ្វើឱ្យពិបាកសម្រេចនូវលទ្ធផលអ្វីមួយដែលគ្រោងនឹងបញ្ចប់។ ស្ថានការណ៍បែបនេះ រឿងដែលត្រូវការបំផុតនោះ គឺជំនាញក្នុងការផ្តោត។ ផ្តោតអារម្មណ៍ ត្រូវមានសមត្ថភាពគ្រប់គ្រងស្មារតីខ្លួនឯងឱ្យយកចិត្តទុកដាក់ចំពោះកិច្ចការណាមួយ ឬក៏គោលដៅសំខាន់ៗអ្វីមួយ បើទោះបីជាមានការកាត់ចង្វាក់យ៉ាងណាក្ដី។ យោងតាមគេហទំព័រ Geeky Gadgets បានបង្ហាញថា ការផ្តោត ប្រៀបដូចជាកូនសោរមួយដែលចាក់ចូលទៅគាស់យកផលិតភាពឱ្យចេញមកក្រៅ ដើម្បីបង្កើនផលិតភាពការងារប្រកបដោយគុណភាព និងប្រសិទ្ធភាពក្នុងកម្រិតមួយដែលប្រសើរជាងសព្វមួយដង។
មានសមត្ថភាពខ្ពស់ក្នុងការផ្តោតស្មារតី ជាវិថីនាំទៅរុករកសក្តានុពលដែលបង្កប់ក្នុងខ្លួន និងពង្រឹងឱ្យមានលទ្ធភាពក្នុងការផលិត និងផ្សាយថ្វីដៃបន្ថែមថ្មីៗ។ ផ្តោតស្មារតីមិនមែនសំដៅតែលើការខិតខំប្រឹងប្រែងធ្វើការតែមួយមុខនោះទេ តែការផ្តោត ជាចំណែកនាំឱ្យការអនុវត្តកិច្ចការប្រកបដោយភាពវាងវៃផងដែរ ដោយហេតុថា អ្នកដែលមានសមត្ថភាពផ្តោត បានប្រើប្រាស់ថាមពលតិច តែបង្កើនសមិទ្ធផលច្រើន ប្រើថាមពលចំគោលដៅ និងជាកត្តាជំរុញដល់ការចេះសម្រេចចិត្តប្រកបដោយវិចារណញ្ញាណ។ ការផ្តោតជួយឱ្យយល់អំពីខ្លឹមសារនៃនិយមន័យរបស់ប្រភេទការងារនីមួយៗបានស៊ីជម្រៅ រួមទាំងការបញ្ចេញថាមពលដ៏ពេលលេញក្នុងការសម្រេចការងារ។
យ៉ាងណាមិញ ពង្រឹងនិងរក្សាស្មារតីឱ្យមានការផ្តោតជាប្រចាំ វាមិនមែនជារឿងងាយស្រួលក្នុងការអនុវត្តន៍ប៉ុន្មានឡើយ គឺទាមទារនូវវិន័យមួយដ៏តឹងរឹង និងការអនុវត្តឱ្យបានខ្ជាប់ខ្ជួន។ នៅក្នុងបរិបទមួយដែលសម្បូរទៅដោយកិច្ចការចម្រុះរាប់មិនអស់ វាពិតជាចាំបាច់ដែលត្រូវមានសមត្ថភាពជ្រើសការងារដែលសំខាន់មកធ្វើឱ្យចប់មុនគេ សឹមបន្តទៅធ្វើកិច្ចការបន្ទាប់ទៀត។
ម្យ៉ាងវិញទៀត គុណសម្បត្តិនៃការប្តេជ្ញាចិត្តធ្វើកិច្ចការតែមួយក្នុងពេលតែមួយ ជួយឱ្យមនុស្សបន្ថយនូវអាការៈស្រ្តេស មានមោទកភាពចំពោះអ្វីដែលកំពុងធ្វើ ហើយស្តង់ដារការងារ ឬផលិតភាពក៏កើនជាងមុន។ ដូច្នេះការដែលមិនបានផ្តល់តម្លៃលើការយកចិត្តទុកដាក់ចំពោះរឿងតែមួយ នឹងបង្កឱ្យមានផលប៉ះពាល់ដល់ថាមពលចុះខ្សោយ ហើយអ្វីដែលអាចឆ្លើយតបនឹងចំណុចនេះបាន គឺរៀនបន្ថែមនិងអនុវត្តអំពីសិល្បៈនៃការកំណត់អាទិភាពចំពោះកិច្ចការនីមួយៗ៕
