សម្រាប់ឆ្នាំ​សិក្សា​២០២៥-២០២៦ រដ្ឋាភិបាល នៃសហព័ន្ធ​រុស្ស៊ី ផ្តល់​អាហារូបករណ៍​ចំនួន ៤០កន្លែង ដល់​សិស្ស និស្សិត និង​មន្រ្តីរាជការ​កម្ពុជា ដើម្បី​ទៅបន្ត​ការ​សិក្សា​ថ្នាក់បរិញ្ញាបត្រ បរិញ្ញាបត្រ​ជាន់ខ្ពស់ បណ្ឌិត និងថ្នាក់​ឯកទេស (Specialist) នៅ​សហព័ន្ធរុស្ស៊ី។

មុខវិជ្ជា​ដែលអាហារូបករណ៍ផ្តល់ជូន​រួមមាន៖ ១កន្លែង​សម្រាប់​ជំនាញ​សិល្បៈ វប្បធម៌ តូយ៍តន្រ្តី ចម្រៀង ភាពយន្ត, ៣កន្លែង សម្រាប់​ការ​សិក្សា​ជំនាញ​នុយ​ក្លេអ៊ែរ​ស៊ីវិល និង​ជំនាញ​ពាក់ព័ន្ធ និង ៣៦កន្លែង​សម្រាប់​ការ​សិក្សា​ជំនាញ​ទូទៅ​ជាង ៥០០មុខ​ដូចជា វេជ្ជសាស្រ្ត វិស្វកម្ម​យន្តហោះ វិស្វកម្មមេកានិច សំណង់ស៊ីវិល ស្ថាបត្យកម្ម ព័ត៌មាន​វិទ្យា ទំនាក់ទំនង​អន្តរជាតិ វិទ្យាសាស្រ្ត​នយោបាយ សេដ្ឋកិច្ច គ្រប់គ្រង ច្បាប់ បរិស្ថាន កសិកម្ម ទេសចរណ៍ វិទ្យាសាស្រ្ត​អាហារូបត្ថម្ភ។ល។

ឯកសារ​ដែលបេក្ខជន​ត្រូវ​បំពេញ​រួមមាន ៖ លិខិតឆ្លង​ដែន​ (មានសុពលភាព​ ១ឆ្នាំ៦ខែ គិតត្រឹម​ថ្ងៃដាក់ពាក្យ), លិខិតពិនិត្យសុខភាព​ទូទៅបញ្ជាក់ថា គ្មាន​ជំងឺអេដស៍ ជំងឺថ្លើម និង​ជំងឺរបេង ដែលចេញដោយនាយកដ្ឋាន​សុខភាពសិក្សា នៃក្រសួងអប់រំ យុវជន និងកីឡា ឬដោយមន្ទីរពេទ្យរដ្ឋ, សញ្ញាបត្រមធ្យមសិក្សា​ទុតិយភូមិ ឬសញ្ញាបត្រ​ដែលមានតម្លៃស្មើ (ភ្ជាប់​ជាមួយ​ព្រឹត្តិបត្រ​ពិន្ទុ​ការសិក្សា​ប្រចាំឆ្នាំសម្រាប់​សញ្ញាបត្រ​ដែល​គ្មាន​បញ្ជាក់និទ្ទេស) សម្រាប់បេក្ខជន​ស្នើ​សុំបន្ត​ការ​សិក្សា​ថ្នាក់បរិញ្ញាបត្រ ឬថ្នាក់ឯកទេស, សញ្ញាបត្របរិញ្ញាបត្រ និង​ព្រឹត្តិបត្រ​ពិន្ទុការសិក្សា សម្រាប់បេក្ខជន ស្នើ​សុំ​បន្ត​ការ​សិក្សា​ថ្នាក់បរិញ្ញាបត្រ​ជាន់ខ្ពស់, សញ្ញាបត្រ​បរិញ្ញាបត្រ​ជាន់ខ្ពស់ និង​ព្រឹត្តិបត្រ​ពិន្ទុ​ការ​សិក្សា សម្រាប់​បេក្ខជន ស្នើ​សុំ​បន្ត​ការ​សិក្សា​ថ្នាក់បណ្ឌិត និង ឯកសារជំនួយ​ផ្សេងៗ (ប័ណ្ណសរសើរ មេដាយប្រឡង សញ្ញាបត្រ​ភាសាបរទេស លិខិតថ្លែង​អំណរគុណ។ល។) ប្រសិនបើមាន។ បញ្ជាក់ ៖ ការបកប្រែ​សញ្ញាបត្រ ព្រឹត្តិបត្រ​ពិន្ទុ ត្រូវ​ធ្វើ​ឡើង​នៅ​ក្រសួងការបរទេស និង​សហប្រតិបត្តិការ​អន្តរជាតិ នៃព្រះរាជាណាចក្រ​កម្ពុជា។

ការចុះឈ្មោះ​ស្នើ​សុំ​អាហារូបករណ៍​ធ្វើ​ឡើង​តាមរយៈ​គេហទំព័រ ៖ https://education-in-russia.com ។ កាលបរិច្ឆេទនៃការ​ដាក់ពាក្យ គឺចាប់ពីថ្ងៃជូនដំណឹង​នេះតទៅ រហូត​ដល់ថ្ងៃទី១៥ ខែមករា ឆ្នាំ២០២៥។

សម្រាប់ព័ត៌មានលម្អិត សិស្ស និស្សិត សាធារណៈជន​អាច​ទំនាក់ទំនង​មក​ផ្ទាល់​ជាមួយ​មជ្ឈមណ្ឌល​វិទ្យាសាស្រ្ត និង​វប្បធម៌​រុស្ស៊ី ដែលមានអាសយដ្ឋាន ផ្ទះលេខ១០៣ មហាវិថីព្រះនរោត្តម (ទល់មុខ​ក្រសួងអប់រំ យុវជន និងកីឡា) ឬទំនាក់ទំនង​តាមទូរស័ព្ទលេខ ០២៣ ២១៣ ៥០៨៕