ក្នុងពិធីបើកការដ្ឋានសាងសង់មន្ទីរពេទ្យសាកលវិទ្យាល័យសុខាភិបាល នាព្រឹកថ្ងៃទី១០ ធ្នូ ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ណែនាំដល់ក្រសួងអប់រំ ក៏​ដូចជាក្រសួងសុខាភិបាលពិនិត្យតាមដានការលក់ចំណីអាហារនៅតាមសាលារៀន ពិសេស ប្រភេទចំណីអាហារ និងភេសជ្ជៈផ្អែម។

សម្ដេចនាយករដ្ឋមន្រ្តី បានមានប្រសាសន៍​ឱ្យ​ក្រសួងអប់រំ និងក្រសួងសុខាភិបាល ត្រូវធ្វើការអប់រំ ត្រួតពិនិត្យ ណែនាំ ទៅដល់អ្នកលក់ចំណីអាហារនៅតាមសាលារៀនសម្រាប់ក្មេងតូចៗ ក្រោយ​សម្ដេចសង្កេតឃើញថា កម្ពុជាមានកំណើននៃអ្នកកើតជំងឺទឹកនោមផ្អែមច្រើន ជាពិសេសអ្នកកើតជំងឺទឹកនោមផ្អែមនៅអាយុចន្លោះ ៣០ឆ្នាំ ទៅ៤០ឆ្នាំ។

សម្តេចធិបតីបន្ថែមថា ការកើតទឹកនោមផ្អែម មិនមែនកើតត្រឹមមនុស្សធំនោះទេ ជួនកាលអាចកើតតាំងពីក្មេងផងដែរ ដោយសារក្មេងៗមួយចំនួនផឹកភេសជ្ជៈប៉ូវកម្លាំងមួយថ្ងៃ៣កំប៉ុង ហើយឪពុកម្ដាយមិនសូវបានដឹងពីបញ្ហាប្រឈមនៃភេសជ្ជៈផ្អែម។

របាយការណ៍ថ្មីៗចេញផ្សាយ​ដោយ​ក្រសួងសុខាភិបាលបានបង្ហាញថា គិត​ពីខែសីហា ឆ្នាំ​២០២៣ ដល់ខែកក្កដា ឆ្នាំ​២០២៤ ករណីពិគ្រោះជំងឺក្រៅ​ទឹកនោមផ្អែមគឺមានចំនួន ១៩០ ៩៥៧ករណី ចំនួននេះមានការកើនឡើង ៥៧,២% បើធៀបនឹងឆ្នាំ២០២២ ដែលមានចំនួន ១២១ ៤៤០ករណី ។ សម្រាប់ករណីអ្នក​ជំងឺទឹកនោមផ្អែមដែល​ត្រូវ​សម្រាកនៅមន្ទីរពេទ្យវិញ ក៏​​បាន​កើន​ឡើង​ចំនួន ៣៤,៦% ឬពី ១១ ០២០នាក់ ទៅ ១៤ ៨៣៧នាក់ ក្នុងរយៈពេល​ដូចគ្នានេះដែរ។ ដោយឡែកករណី​ជំងឺទឹកនោមផ្អែមទៅលើកុមារវិញ ក្នុងរយៈពេល​ជាង​២​០​ឆ្នាំ​កន្លងមកនេះ ពោលគឺចាប់តាំងពីឆ្នាំ១៩៩៧មក គេ​បានរកឃើញ​កុមារ​នៅ​កម្ពុជា​អាយុ​ចន្លោះ​ពី​៤​ ​ដល់​១​៤​ឆ្នាំ​ ​ជិត​៧​០​០​នាក់​ ​កើតជំងឺ​ទឹកនោម​ផ្អែម​​ប្រភេទ១​ ​ដែល​រក​ឃើញ​នៅ​មន្ទីរពេទ្យ​គន្ធបុប្ឆាភ្នំពេញ​ ​និង​ខេត្ត​សៀមរាប​។​

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ក្រសួងអប់រំ​តែងតែជំរុញឱ្យគ្រឹះស្ថានសាធាណៈត្រូវត្រួតពិនិត្យ ណែនាំ ហាមឃាត់ រាល់ការលក់ចំណីអាហារដែលធ្វើឱ្យប៉ះពាល់សុខភាពអ្នកសិក្សា។ ក្នុងនោះ​ចំពោះចំណីអាហារដែលហាមមិនឱ្យលក់នៅតាមគ្រឹះស្ថានសិក្សាមានចំនួន ៦ប្រភេទ រួមមាន ទី១. ចំណីអាហារគ្រប់ប្រភេទដែលហួសកំណត់កាលបរិច្ឆេទប្រើប្រាស់, ទី២. គ្រឿងស្រវឹង និងផលិតផលថ្នាំជក់គ្រប់ប្រភេទ, ទី៣. ចំណីអាហារដែលមិនមានប្រភពច្បាស់លាស់, ទី៤. ភេសជ្ជៈប៉ូវកម្លាំង ភេសជ្ជៈផ្អែម កាហ្វេ ការ៉េម ទឹកស៊ីរ៉ូ គ្រប់ប្រភេទ, ទី៥. ស្ករសូកូឡា ស្ករគ្រាប់និងស្ករកៅស៊ូគ្រប់ប្រភេទ និងទី៦. ចាហួយគ្រប់ប្រភេទ នំដូណាត់ នំផ្អែម តំណាប់ផ្អែមគ្រប់ប្រភេទ។

អ្នកនាំពាក្យក្រសួងអប់រំបញ្ជាក់ថា ដើម្បីអនុវត្តវិធានការសុវត្ថិភាពចំណីអាហារតាមសាលារៀន ក្រសួងអប់រំ បានធ្វើការផ្សព្វផ្សាយយ៉ាងទូលំទូលាយនៅតាមសាលារៀន ក៏ដូចជាជំរុញសាលារៀន ធ្វើការជិតស្និទ្ធជាមួយអ្នកលក់ចំណីអាហារក្នុងសាលារៀន ក៏ដូចជាពិនិត្យប្រភេទអាហារដែលដាក់លក់ផងដែរ។ ជាមួយគ្នានេះ ក្រសួងអប់រំ បានបញ្ចូលព័ត៌មាន និងការពន្យល់លម្អិតទាក់ទងទៅនឹងផលប៉ះពាល់របស់អាហារក្នុងមុខវិជ្ជាអប់រំសុខភាពសិក្សា ហើយគណៈគ្រប់គ្រងសាលាតែងធ្វើការងារជិតស្និទ្ធជាមួយឪពុកម្ដាយសិស្ស ឬអាណាព្យាបាលសិស្សឱ្យមានការចូលរួម៕