អាជីពជាគ្រូពេទ្យ ជាអាជីពដែលមានការពេញនិយម ដែលយុវជន និងប្រជាជនកម្ពុជាមួយចំនួនធំចាប់អារម្មណ៍។ ជារៀងរាល់ឆ្នាំ ក្រោយពីបញ្ចប់ថ្នាក់បាក់ឌុប មានយុវជនកម្ពុជាជាច្រើនបានសម្រេចចិត្តប្រឡងចូលរៀននៅសាកលវិទ្យាល័យសុខាភិបាល (សាលាពេទ្យ)។ យ៉ាងណាក៏ដោយ មិនមែនបេក្ខជនដែលបានចូលរួមប្រឡងទាំងអស់ សុទ្ធតែមានឱកាសបានចូលរៀនជំនាញសុខាភិបាលនោះទេ ព្រោះដើម្បីប្រឡងជាប់ និងចូលបាន គឺទាមទារឱ្យមានការត្រៀមខ្លួនបានល្អបំផុត។

លោក ស៊ឺន រក្សា ជានិស្សិតដែលបានប្រឡងជាប់អាហារូបករណ៍ ជំនាញទន្តសាស្ត្រ នៅសាលាវិទ្យាល័យសុខាភិបាល កាលពីឆ្នាំ២០១៧ លោកបានចែករំលែកបទពិសោធន៍ផ្ទាល់ខ្លួន ទៅកាន់យុវជនដែលទើបតែចប់បាក់ឌុប និងចូលរៀនជំនាញសុខាភិបាលថា ក្រោយប្រឡងជាប់បាក់ឌុប ប្អូនៗសិស្សានុសិស្ស គួររៀនត្រៀមលើមុខវិជ្ជាចំនួនបីសំខាន់ៗដូចជា គណិតវិទ្យា គីមីវិទ្យា និងជីវ:វិទ្យា ហើយមេរៀនទាំងអស់ គឺមាននៅក្នុងសៀវភៅពុម្ពថ្នាក់ទី១២ របស់ក្រសួងអប់រំ។

និស្សិតរូបនេះបន្តថា ចំពោះវិញាសាប្រឡងថ្នាក់ជាតិលើជំនាញសុខាភិបាល សំណួរ និងលំហាត់ទាំងអស់គឺចេញកម្រិតថ្នាក់ទី១២ ដែលប្អូនបានរៀននៅវិទ្យាល័យ លើកលែងតែការប្រឡងក្នុងឆ្នាំ២០២១ ដែលការប្រឡងធ្វើឡើងជាលក្ខណអនឡាញ ដោយការប្រឡងសហការគ្នា និងវិទ្យាស្ថានបច្ចេកវិទ្យាកម្ពុជា ដូច្នេះ លំហាត់មានលក្ខណ:ជា MCQ ខុសពីសៀវភៅក្រសួង។ ដោយឡែក បេក្ខជនដែលចូលរួមប្រឡងក៏អាចទទួលបានអាហារូបករណ៍ផងដែរ ក្នុងករណីដែលទទួលបានពិន្ទុខ្ពស់ជាងគេ និងស្របតាមលក្ខខណ្ឌរបស់សាកលវិទ្យាល័យនីមួយៗ ដែលសិស្សបានជ្រើសរើសអំឡុងពេលដាក់ពាក្យ។

ជាមួយគ្នានេះ លោក រក្សា បានក្រើនរំលឹកដល់ប្អូនៗ ដែលកំពុងរៀននៅថ្នាក់អនុវិទ្យាល័យ និងវិទ្យាល័យ ដែលមានក្ដីបំណងចង់ប្រឡងចូលរៀនសាលាសុខាភិបាលថា គួរពង្រឹងសមត្ថភាពគណិតវិទ្យា ជីវវីទ្យា គីមីវិទ្យា ភាសាអង់គ្លេស ឬបារាំង។

ខ្ញុំផ្ទាល់ដែលរៀនថ្នាក់ទន្ដបណ្ឌិត គឺប្រើភាសាអង់គ្លេស សឹងតែ ៩៨ភាគរយទៅហើយ ព្រោះអត្ថបទសិក្សាសុទ្ធតែបោះពុម្ភជាភាសាអង់គ្លេសស្ទើរទាំងអស់។

លោក ស៊ឺន រក្សា និស្សិតអាហារូបករណ៍ ជំនាញទន្តសាស្ត្រ

ម្យ៉ាងវិញទៀត លោកក៏បានផ្ដាំផ្ញើទៅដល់យុវជន ដែលចង់ចូលរៀនជំនាញសុខាភិបាលថា ត្រូវស្វែងយល់ពីមុខជំនាញដែលខ្លួនចង់រៀនឱ្យបានច្បាស់ មុននឹងសម្រេចចិត្តចូលរៀន។ ចំពោះការប្រឡងសុខាភិបាល គឺមិនមានការកំណត់និទ្ទេសបាក់ឌុបនោះឡើយ ឱ្យតែប្រឡងជាប់បាក់ឌុប គឺអាចមកដាក់ពាក្យប្រឡងបាន។

តើមនុស្សដែលមានអត្តចរិតបែបណា ដែលស័ក្តិសមនឹងរៀនជំនាញពេទ្យ?

ទាក់ទងនឹងអត្តចរិតបុគ្គល លោក រក្សា បានបញ្ជាក់ប្រាប់ AMS Education ថា គាត់គួរតែជាមនុស្សដែលដឹងពីតួនាទីនេះច្បាស់ ព្រោះពេទ្យជាមនុស្សដែលមានទំនួលខុសត្រូវខ្ពស់ ហ្មត់ចត់ អត់ធ្មត់ និងមានការព្យាយាមខ្ពស់ ដោយហេតុថា គ្រូពេទ្យត្រូវទទួលខុសត្រូវលើជីវិតមនុស្សរាប់សិបនាក់។

តើអ្វីជាឧបសគ្គ អំឡុងពេលរៀនជំនាញពេទ្យ?

ឧបសគ្គនៃការរៀនជំនាញពេទ្យ សម្រាប់លោកផ្ទាល់គឺត្រូវអានអត្ថបទជាភាសាអង់គ្លេសរាល់ថ្ងៃ ហើយអត្ថបទនោះមានការលំបាក ព្រោះមានពាក្យបច្ចេក​ទេស​ពេទ្យមួយចំនួនធំ។ ប៉ុន្តែសូមកុំបារម្ភ ព្រោះវានឹងក្លាយជារឿងធម្មតា នៅពេលយើងព្យាយាមកត់ចំណាំវាម្ដងបន្តិចៗ។ ដោយឡែក ផលវិបាកអំឡុងពេលហាត់ការ ការងារវិញ ចំពោះអាជីពជាទន្តពេទ្យរបស់លោក គឺការរក្សាអនាម័យ និងប្រយ័ត្នជាប់ជានិច្ច ព្រោះការព្យាបាលប្រឈមនិងអ្នកជំងឺច្រើន ដែលត្រូវប្រយ័ត្នពីការមុតផ្សេងៗ។

តើក្រោយបញ្ចប់ការសិក្សាជំនាញពេទ្យ អាចបម្រើការងារនៅកន្លែងណាខ្លះ?

ចំពោះសំណួរនេះ លោកបានលើកឡើថា ចំពោះជំនាញទន្តបណ្ឌិត ដែលលោកកំពុងសិក្សា ក្រោយពីបញ្ចប់ការសិក្សា អាចបម្រើការងារបាននៅតាមបណ្ដាគ្លីនិកឯកជនផ្សេងៗ ឬប្រឡងចូលបម្រើការងារនៅមន្ទីពេទ្យរដ្ឋ ឬមួយជម្រើសទៀត អាចស្នើរសុំអជ្ញាប័ណ្ណបើកគ្លីនិកឯកជនផ្ទាល់ខ្លួន៕