ភ្នំពេញ – ក្រសួងអប់រំ យុវជន និងកីឡា ប្រកាសប្រឡងជ្រើសរើសគ្រូបង្រៀនកម្រិតឧត្តម (បរិញ្ញាបត្រ+២) ជំនាន់ទី២ ចំនួន៧៣៥ កន្លែងសម្រាប់បម្រើការងារក្នុងក្របខ័ណ្ឌរដ្ឋ នៅតាមគ្រឹះស្ថានសិក្សា និងអង្គភាពនានា ចំនួន៧៣៥នាក់ ចូលរៀននៅថ្ងៃទី០៩ ខែតុលា ឆ្នាំ២០២៣ នៅវិទ្យាស្ថានជាតិអប់រំ។

លក្ខខណ្ឌនៃការជ្រើសរើសក្នុងចំណោមបេក្ខជនទាំងពីរភេទ រួមមាន ជានិស្សិតដែលពុំទាន់មានការងារក្នុងក្របខ័ណ្ឌមន្ត្រីរាជការ ជាបុគ្គលិកអប់រំកំពុងបម្រើការនៅក្រសួងអប់រំ យុវជន និងកីឡា មានសញ្ជាតិខ្មែរ មានជីវប្រវត្តិច្បាស់លាស់ មានសុខភាពល្អ មានសញ្ញាបត្រចាប់ពីបរិញ្ញាបត្រ ឬសញ្ញាបត្រដែលមានតម្លៃសមមូលឡើងទៅ។

លើសពីនេះ ត្រូវមានលក្ខខណ្ឌអាយុគិតដល់ថ្ងៃប្រឡង ដូចជា បេក្ខជនដែលមានសញ្ញាបត្របណ្ឌិតត្រូវបានលើកលែងលក្ខខណ្ឌអាយុ បេក្ខជនដែលមានសញ្ញាបត្របរិញ្ញាបត្រជាន់ខ្ពស់ ឬសញ្ញាបត្រសមមូល ត្រូវមានអាយុច្រើនបំផុត៤០ឆ្នាំ គិតត្រឹមថ្ងៃទី០៩ ខែកញ្ញា ឆ្នាំ២០២៣។ បេក្ខជនដែលមានសញ្ញាបត្របរិញ្ញាបត្រ ឬសញ្ញាបត្រសមមូល ត្រូវមានអាយុច្រើនបំផុត៣៥ឆ្នាំ គិតត្រឹមថ្ងៃទី០៩ ខែកញ្ញា ឆ្នាំ២០២៣។ សម្រាប់បេក្ខជនជាបុគ្គលិកអប់រំ មិនកំណត់លក្ខខណ្ឌអាយុឡើយ។

ជាមួយគ្នានេះ បេក្ខជនត្រូវជ្រើសរើសប៉ុស្តិ៍ មុនការប្រឡងជ្រើសរើសទៅតាមតារាងកំណត់ប៉ុស្តិ៍របស់ក្រសួង និងតាមតម្រូវការរបស់អង្គភាព/វិទ្យាល័យ។ បេក្ខជនជាបុគ្គលិក មានសិទ្ធិជ្រើសរើសវិទ្យាល័យណាមួយ ក្នុងរាជធានី ខេត្ត ដែលខ្លួនកំពុងបម្រើការងារ ។ ដោយឡែកបុគ្គលិកដែលស្ថិតក្រោមឱវាទទីស្ដីការក្រសួង មានសិទ្ធិជ្រើសរើសតែប៉ុស្តិ៍នៅតាមគ្រឹះស្ថានឧត្តមសិក្សាវិទ្យាស្ថាន និងគ្រឹះស្ថានបណ្តុះបណ្តាលគ្រូ ក្រោមឱវាទក្រសួងអប់រំ យុវជន និងកីឡា ប៉ុណ្ណោះ។

បេក្ខជនម្នាក់ៗត្រូវប្រឡងចំនួន ២វិញ្ញាសា រួមមាន ទី១. វិញ្ញាសា វប្បធម៌ទូទៅ រយៈពេល១ម៉ោង៣០នាទី មេគុណ១ (ជាវិញ្ញាសារួមសម្រាប់គ្រប់មុខវិជ្ជាឯកទេស) ទី២. វិញ្ញាសា ឯកទេស រយៈពេល៣ម៉ោង មេគុណ៣។

បេក្ខជនទាំងពីរភេទដែលចាប់អារម្មណ៍ចង់ចូលរួមអាចទាញយកសំណុំលិខិតសុំចុះឈ្មោះប្រឡងជ្រើសរើសតាមគេហទំព័រ www.nie.edu.kh  ។ កាលបរិច្ឆេទនៃការទទួលពាក្យសុំចុះឈ្មោះប្រឡង ចាប់ពីថ្ងៃប្រកាសផ្សាយដំណឹងនេះ ផុតកំណត់រហូតដល់ថ្ងៃទី១១ ខែ សីហា ឆ្នាំ២០២៣ វេលាម៉ោង ១៧:០០នាទី នៅវិទ្យាស្ថានជាតិអប់រំ។ សម័យប្រឡង៖ ថ្ងៃទី០៩ ខែកញ្ញា ឆ្នាំ២០២៣។ ចំពោះព័ត៌មានលម្អិតបន្ថែមផ្សេងទៀត អាចទំនាក់ទំនងតាមទូរស័ព្ទលេខ៖ ០៨៨ ៩៨៩៩ ១៦២ / ០៨៩ ៩៣៨៣ ៤៩ /០៨៨ ៩៨៩៩ ១៦២ ៕