ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងប្រៃសណីយ៍និងទូរគមនាគមន៍ (ក.ប.ទ.) បានរកឃើញយុវជន ៣រូប និង៣ក្រុម ជាប់ជ័យលាភីក្នុងការប្រកួតប្រជែងសន្តិសុខសាយប័រ គឺកម្មវិធីប្រកួតប្រជែងផលិតវីដេអូអប់រំខ្លីៗស្តីពីសន្តិសុខសាយប័រសម្រាប់ឆ្នាំ២០២៦ និងការប្រកួតសាយប័រអារីណា ២០២៦។
បើតាមក្រសួងប្រៃសណីយ៍ និងទូរគមនាគមន៍ ឆ្លងតាមការពិនិត្យ ពិភាក្សា និងវាយតម្លៃយ៉ាងហ្មត់ចត់របស់គណៈកម្មការវាយតម្លៃក្រសួង បានជ្រើសរើសស្នាដៃជ័យលាភីចំនួន ៣ ដែលមានសារអប់រំច្បាស់លាស់ មានភាពច្នៃប្រឌិត និងមានគុណភាពបច្ចេកទេសល្អ នៅក្នុងការប្រកួតប្រជែងផលិតវីដេអូអប់រំខ្លីៗស្តីពីសន្តិសុខសាយប័រសម្រាប់ឆ្នាំ២០២៦។ ក្នុងនោះជ័យលាភីលេខ ១ បានទៅលើ លោក ថានី សុភឿនមុនី ទទួលបានប្រាក់រង្វាន់ចំនួន ២លានរៀល, ជ័យលាភីលេខ ២ បានទៅលើ កញ្ញា ស្រី រ័ត្ន ទទួលបានប្រាក់រង្វាន់ចំនួន ១លានរៀល និងជ័យលាភីលេខ ៣ បានទៅលើ កញ្ញា និត សូដានីកា ទទួលបានប្រាក់រង្វាន់ចំនួន ប្រាំមួយសែនរៀល។
ចំពោះ “ការប្រកួតសាយប័រអារីណា ២០២៦” បន្ទាប់ពីការប្រកួតដ៏ស្វិតស្វាញអស់រយៈពេល ៨ម៉ោង កាលពីថ្ងៃទី២៧ ខែមិថុនា ឆ្នាំ២០២៦ ក.ប.ទ. បានរកឃើញក្រុមជ័យលាភីចំនួន ៣ក្រុម រួមមាន ជ័យលាភីលេខ ១ បានទៅលើក្រុម WillHack4Coffee ទទួលបានប្រាក់រង្វាន់ចំនួន ១.០០០ ដុល្លារអាម៉េរិកគត់, ជ័យលាភីលេខ ២ បានទៅលើក្រុម NO NAME ទទួលបានប្រាក់រង្វាន់ចំនួន ៧០០ ដុល្លារអាម៉េរិកគត់ និងជ័យលាភីលេខ ៣ បានទៅលើក្រុម KHMER BLOOD ទទួលបានប្រាក់រង្វាន់ចំនួន ៥០០ ដុល្លារអាម៉េរិកគត់។
យ៉ាងណាក៏ដោយ សម្រាប់បេក្ខភាពជ័យលាភីចំនួន ៣ក្រុម និងបេក្ខភាពឆ្នើមចំនួន ៣០ក្រុម នឹងត្រូវចូលរួមការប្រកួតថ្នាក់ជាតិផ្នែកសន្តិសុខសាយប័រប្រចាំឆ្នាំ២០២៦ នាថ្ងៃទី១៦ ខែសីហា ឆ្នាំ២០២៦ នាពេលខាងមុខ។
កម្មវិធីខាងលើទាំងពីរនេះ បង្ហាញពីការយកចិត្តទុកដាក់យ៉ាងសកម្មរបស់ ក.ប.ទ. ក្នុងការលើកកម្ពស់ការយល់ដឹង អភិវឌ្ឍសមត្ថភាពបច្ចេកទេស ជំរុញភាពច្នៃប្រឌិត និងបង្កើតឱកាសឱ្យមូលធនឌីជីថលកម្ពុជា បានបង្ហាញសមត្ថភាពរបស់ខ្លួនក្នុងវិស័យសន្តិសុខសាយប័រ៕
