បុគ្គលម្នាក់ៗ សុទ្ធតែមានទំនាក់ទំនង គ្រាន់តែមានភាពខុសគ្នាពីមនុស្សម្នាក់ ទៅមនុស្សម្នាក់ទៀត ខ្លះក៏មានភាពរឹកមាំ ឯខ្លះទៀត ក៏មានភាពរអាក់រអួល។ ខណៈមនុស្សជាច្រើន បានផ្តោតទៅលើតម្រូវការប្រចាំថ្ងៃ ដែលជាហេតុធ្វើឱ្យមនុស្សមួយចំនួន មានភាពលំបាកនៅក្នុងការស្វែងរកឱ្យឃើញនូវដំណោះស្រាយ នៃបញ្ហាដែលកើតមាននៅក្នុងទំនាក់ទំនង ឬការរក្សាយ៉ាងណាឱ្យមានផាសុកភាព។ យ៉ាងណាមិញ ប្រសិនបើមនុស្សម្នាក់ៗ បានយល់អំពីស្ថានភាពខ្លួនឯង និងអ្នកដទៃ វាជំរុញទៅដល់ ផលវិជ្ជមានដូចជាទទួលបានផាសុកភាព និងទំនាក់ទំនងមួយដែលស្របតាមក្ដីប្រាថ្នា។ តាមរយៈគេហទំព័រ Inc បានបង្ហាញគន្លឹះ៧ចំណុច ដើម្បីស្វែងយល់អំពី ទំនាក់ទំនងបែបវិជ្ជមាន និងការស្គាល់សមត្ថភាពជាក់ស្ដែងរបស់ខ្លួនឯង និងអ្នកដទៃ។

១. ការស្វែងរកខ្លួនឯង ៖ ចាប់ផ្តើមពីខ្លួនឯងដោយការ​មើលមកបច្ចុប្បន្នភាពរបស់ខ្លួន ដោយការរុករក​ និងសាកល្បងថ្មីៗ តាមរយៈការធ្វើសកម្មភាពថ្មីៗ ជួយឱ្យរកឃើញចំណុចខ្លាំង និងចំណុចខ្សោយ ក្នុងការបន្តអភិវឌ្ឍន៍បន្ថែមអំពីរបៀបរក្សាទំនាក់ទំនងដែលមានផាសុកភាព។​

២. ការយល់ចិត្ត ៖ សមត្ថភាពនៃការយល់ចិត្ត គឺអាចវាស់ស្ទង់ស្ថានភាពផ្លូវចិត្ត ឬក៏ទុក្ខលំបាករបស់អ្នកទៃ ហើយការយល់ពីអ្នកដទៃបានច្រើន​ ជាកត្តានាំឱ្យកិច្ចសន្ទនា ឬការកសាងទំនាក់ទំនង។ ការស្វែងយល់អំពីអ្នកដទៃ មិនត្រឹមតែពង្រឹងសមត្ថភាពខ្លួនឯងដាក់ក្នុងស្ថានការណ៍នីមួយៗប៉ុណ្ណោះទេ ប៉ុន្តែអាចបញ្ចៀសការធ្វើបុរេវិនិច្ឆ័យទៅកាន់អ្នកដទៃ។​

៣. ស្តាប់ដ៏សកម្ម ៖ និយមន័យ នៃការស្តាប់ដ៏សកម្ម គេជជែកអំពី ផ្តល់ការយកចិត្តទុកដាក់ចំពោះបុគ្គលដែលកំពុងនិយាយ រួមទាំងដឹងថា ត្រូវឆ្លើយតបដោយរបៀបណា? ឬប្រើប្រាស់ភាសាបែបណា ក្នុងការឆ្លើយតបជាដើម។ ជំនាញនៃការស្តាប់ ដើរតួយ៉ាងសំខាន់ក្នុងកិច្ចសន្ទនា និងបង្ហាញពីការគោរព និងពង្រឹងទំនាក់ទំនងឱ្យកាន់តែរឹងមាំ បន្ថែមពីនោះ ស្តាប់ដ៏សកម្ម នាំឱ្យកិច្ចសន្ទនាកាន់តែមានប្រសិទ្ធភាពបន្ថែមមួយកម្រិតទៀត។

៤. ប្រសិទ្ធភាពនៃការជជែក ៖ ទំនាក់ទំនងផាសុកភាព ត្រូវការរបៀបបែបបទ ឬជំនាញក្នុងការប្រាស្រ័យទាក់ទង ហើយការនិយាយទាក់ទងគ្នាដែលមានគុណភាព គឺមានបង្កប់បរិយាកាសល្អ សម្រាប់ភាគីនីមួយៗ ក្នុងការហ៊ានបញ្ចេញគំនិត និងតម្រូវការ។ ក្រៅពីនោះ ការផ្តោតលើទំនាក់ទំនង ជាការកាត់បន្ថយជម្លោះ ឬការដោះស្រាយបញ្ហាដោយសន្តិវិធី។

៥. ការដាក់ដែនកំណត់ ​៖ ការមានដែនកំណត់ជាក់លាក់ ជាមួយមនុស្សដែលត្រូវប្រាស្រ័យទាក់ទង បានជំរុញទៅដល់ការកសាងសុខភាពផ្លូវចិត្ត និងទំនាក់ទំនងទ្វេភាគី។ គួរជំរាបជូនដែរថា ការដាក់ដែនកំណត់ត្រង់ចំណុចនេះ មិនមែនជាការកាត់ផ្តាច់ ឬការរំពឹងទុកខ្ពស់ ជាមួយមនុស្ស​ដែលត្រូវប្រាស្រ័យទាក់ទងនោះទេ ប៉ុន្តែជាការគិតគូរ អំពីការគោរពចំពោះខ្លួនឯង និងអ្នកដទៃ។​

៦. ការលើកលែងទោស ៖ ការផ្ទុកនូវអារម្មណ៍ហ្មងសៅក្នុងរយៈពេលយូរ ជះឥទ្ធិពល ទៅកាន់សុខភាពខ្លួនឯងមុនគេបង្អស់។ ដូច្នេះ ការលើកលែងទោស ចំពោះហេតុការណ៍អ្វីមួយ គឺជាការដោះទោស និងបន្ថយភាពតានតឹងចំពោះខ្លួនឯង។

៧. ការស្វែងរកជំនួយ ៖ ទទួលយកជំនួយពីខាងក្រៅ ជាការកសាងបណ្តាញនៃដំណោះស្រាយ និងការយកចិត្តទុកដាក់ថែទាំគ្នា ទៅវិញទៅមក។ ប្រភពមនុស្សដែលអាចផ្តល់ការគាំទ្រ ជាពិសេសនោះគឺ អ្នកជំនាញសុខភាពផ្លូវចិត្ត ហើយពេលខ្លះក៏អាចពឹងមិត្តជិតស្និត សមាជិកគ្រួសារ និងមនុស្សជាទីស្រឡាញ់ណាម្នាក់។ មិនថា លោកអ្នកទទួលបានការគាំទ្រ កម្រិតណានោះទេ សូមកុំរំពឹងភាពស្រាកស្រាន្តក្នុងរយៈពេលខ្លីៗ ព្រោះមុននឹងឈានទៅរក​ភាពសះស្បើយ គឺត្រូវការពេលវេលា បន្តិចម្តងៗ៕