កាលពីថ្ងៃព្រហស្បត្តិ៍ (៥ ធ្នូ) ក្រសួងអប់រំ យុវជន និងកីឡា បានរៀបចំពិធី​អបអរ​ទិវា​អន្តរជាតិ​អ្នកស្ម័គ្រចិត្ត ក្រោម​ប្រធានបទ “ទាំងអស់គ្នាស្ម័គ្រចិត្តដើម្បីការសាមគ្គី បរិយាបន្ន និងចីរភាពសហគមន៍” ។ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា គោលដៅនៃការងារស្ម័គ្រចិត្ត គឺដើម្បីបណ្តុះស្មារតីការលះបង់ចំពោះការជួយអ្នកដទៃ និងសហគមន៍ ដោយឈរលើផលប្រយោជន៍រួមជាមូលដ្ឋាន ហើយក៏បង្ហាញពីទឹកចិត្តដ៏ទូលំទូលាយ ដែលជាសកម្មភាពបំពេញបន្ថែមដល់យុវជនក្នុងការពង្រឹងបំណិនសតវត្សទី២១។

បើតាម​ប្រសាសន៍​របស់ ឯកឧត្តម ហង់ជួន ណារ៉ុន កម្មវិធីអភិវឌ្ឍយុវជន ជាពិសេសការងារស្ម័គ្រចិត្ត បានក្លាយជាកម្មវិធីគន្លឹះមួយនៅក្នុងការអនុវត្តស្តង់ដាសាលារៀនគំរូ តាមរយៈការរៀបចំកម្មវិធីក្រៅម៉ោងសិក្សា ឆ្ពោះទៅលើកកម្ពស់ សីលធម៌ និងចរិយាធម៌របស់សិស្សានុសិស្ស ដោយក្រសួងបានដាក់ចេញវិធានការ ដូចជា ៖ (១). «ការអភិវឌ្ឍផ្នែកទន់» ក្រសួងបានបញ្ជ្រាប និងបញ្ចូលកម្មវិធីអភិវឌ្ឍយុវជនទូទៅនៅក្នុងសាលារៀន ដូចជា ការអប់រំបរិស្ថាន អនាម័យស្អាត សីលធម៌ ការងារសហគមន៍។ល។ ដើម្បីកាត់បន្ថយពេលទំនេរ និងបង្កើតទម្លាប់ល្អរបស់សិស្ស។ (២). ការរៀបចំ «កម្មវិធីអប់រំចរិយាធម៌» ដោយផ្តោតជាសំខាន់លើការចេះគោរពចាស់ទុំ តាមរយៈការសំពះ ការស្លៀកពាក់ស្អាតបាត និងអនាម័យល្អ ។ (៣). ការរៀបចំ «សេចក្តីណែនាំស្តីពីការអប់រំចរិយាសម្បទា» ដោយដកស្រង់ពីមុខវិជ្ជាសីលធម៌ និងពលរដ្ឋវិទ្យា។ ការរៀបចំវិធានការដើម្បីលើកកម្ពស់ការយល់ដឹងពីគុណតម្លៃវប្បធម៌ និងអារ្យធម៌ខ្មែរ ដូចជា ការសំពះ និងឥរិយាបថល្អៗសម្រាប់បណ្តុះទម្លាប់កុមារ និងយុវជន។

ក្នុង​ឱកាសនោះ ឯកឧត្តម Jacques PELLET ឯកអគ្គរដ្ឋទូតបារាំងប្រចាំកម្ពុជា បានលើកឡើងពីសារៈសំខាន់នៃការងារស្ម័គ្រចិត្តសម្រាប់យុវជន សហគមន៍ និងសាកលលោកទាំងមូល ដោយគូសបញ្ជាក់ពីការបន្តគាំទ្ររបស់រដ្ឋាភិបាលបារាំងចំពោះសកម្មភាពការងារស្ម័គ្រចិត្តនៅកម្ពុជាតាមរយៈគម្រោងជាច្រើន ដូចជា ការអភិវឌ្ឍជំនាញសម្រាប់យុវជន ការផ្តល់អាហារូបករណ៍ កម្មវិធីស្ម័គ្រចិត្តរយៈពេលខ្លី និងវែង (Volunteer Porgram) កម្មវិធីផ្លាស់ប្តូរអ្នកស្ម័គ្រ (Exchange program) និងការបន្តលើកកម្ពស់ស្តង់ដានៃការងារស្ម័គ្រចិត្តឱ្យកាន់តែល្អប្រសើរ និងសម្បូរបែបក្នុងចំណោមយុវជន ដោយរំពឹងថា កម្មវិធីផ្លាស់ប្តូរអ្នកស្ម័គ្រនឹងមានកាន់តែច្រើនថែមទៀតរវាងកម្ពុជា និងបារាំង។

គួរ​ជំរាបជូនដែរថា ដើម្បីអបអរសាទរ​ទិវាអន្តរជាតិអ្នកស្ម័គ្រចិត្ត ៥ធ្នូ នាយកដ្ឋានអភិវឌ្ឍកម្មវិធីយុវជន នៃក្រសួងអប់រំ យុវជន និងកីឡា ក៏បានរៀបចំធ្វើការ​ប្រកួត​កម្មវិធី​ការស្ម័គ្រចិត្ត​ដើម្បីសហគមន៍ខ្ញុំ ២០២៤ ដោយមានការចូលរួមពីយុវជនស្ម័គ្រចិត្តជាង ៥០០នាក់ មានទាំងយុវជនក្នុងសាលា និងយុវជនក្រៅសាលា មក​ពី​២៥រាជធានីខេត្ត។ យុវជនអ្នកស្ម័គ្រចិត្តទាំងអស់នេះ បានសរេសរ និងអនុវត្តគម្រោងតូចៗដែលផ្តល់អត្ថប្រយោជន៍ដល់សហគមន៍មូលដ្ឋានរបស់ពួកគេ ដែលគ្របដណ្តប់លើវិស័យមួយចំនួនដូចជា៖ វិស័យអប់រំ វិស័យបរិស្ថាន វិស័យកសិកម្ម វិស័យទេសចរណ៍ វិស័យសេវាសាធារណៈ វិស័យសុខភាព វិស័យសហគ្រិនភាព និងបច្ចេកវិទ្យាឧស្សាហកម្ម ៤.០ ជាដើម។ តាមរយៈការចូលរួមរបស់ពួកគេក្នុងការអនុវត្តគម្រោងទាំងនេះ យុវជនបានបង្កើតជំនាញផ្សេងៗរួមទាំងចំណេះដឹងផ្នែកឌីជីថល ការគ្រប់គ្រងគម្រោងតូចៗ ការសរសេរសំណើគម្រោងតូចៗ និងចំណេះដឹងបន្ថែមអំពីគោលដៅនៃការអភិវឌ្ឍន៍ប្រកបដោយចីរភាព ២០៣០(SDGs) ផងដែរ។

យ៉ាងណាក៏ដោយ​ក្នុង​ការប្រកួតផ្តាច់ព្រ័ត្រកាលពី​រសៀលថ្ងៃទី៥ ធ្នូ គេ​បានរកឃើញ​ក្រុមយុវជនស្ម័គ្រ​ចិត្តចំនួន ៣ក្រុម​ម​ក​ពី​ខេត្តកំពង់ស្ពឺ ពោធិ៍សាត់ និង​ឧត្តរមានជ័យ បានឈ្នះ​ពានរង្វាន់ និង​មេដាយ​ក្នុងវគ្គផ្តាច់ព្រ័ត្រ នៃការប្រកួត​កម្មវិធីការស្ម័គ្រចិត្ត​ដើម្បីសហគមន៍​ខ្ញុំ​ប្រចាំ​ឆ្នាំ២០២៤៕