ភ្នំពេញ – ក្នុង​ឱកាស​ចូលរួម​ពិព័រណ៌ស្នាដៃ​សិស្ស​ប្រចាំឆ្នាំ​២០២៤ របស់​សិស្សានុសិស្ស​វិទ្យាល័យ​ព្រះយុគន្ធរ និង​វិទ្យាល័យ​ព្រះស៊ីសុវត្ថិ​សាលា​រៀនជំនាន់ថ្មី (NGS) ឯកឧត្តម​បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានលើកឡើងថា សាលារៀនជំនាន់ថ្មី​ ពិតជា​នាំ​មក​នូវ​ការ​អប់រំ​ប្រកប​ដោយគុណភាព និង​ប្រសិទ្ធិ ដែលសិស្សានុសិស្ស នៃសាលារៀនជំនាន់ថ្មី មិន​ត្រឹម​តែរៀននៅ​តែក្នុងថ្នាក់ប៉ុណ្ណោះទេ ប៉ុន្តែ​ក៏បន្ត​រៀន និងស្រាវជ្រាវ​បន្ថែម​នៅ​ក្រៅ​ម៉ោង​សិក្សា​ផងដែរ។

លើសពីនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ក៏​បានកោតសរសើរចំពោះ​សាលា​រៀនជំនាន់ថ្មី ដែល​មានអត្រា​សិស្ស​ប្រឡង​ជាប់សញ្ញាបត្រ​មធ្យមសិក្សា​ទុតិយភូមិ រហូត​ដល់​ជាង ៩៣% និង​សិស្ស​ដែលទទួល​បាន​និទ្ទេស A និង B ជិត ៦០% ច្រើនជាងគេ និង​មួយឆ្នាំសិស្ស​សាលានេះ​ទទួល​បាន​មេដាយ​ពីការ​ប្រកួត​នានា នៅ​អន្តរជាតិសរុបជាង ៦០០គ្រឿង ដែលនេះ​បញ្ជាក់ពី​គុណភាព​អប់រំ នៃសាលា​រៀនជំនាន់ថ្មី ដើម្បី​ឱ្យ​សិស្សានុសិស្ស មានសមត្ថភាពគ្រប់គ្រាន់ និង​ត្រៀមខ្លួន​រួចរាល់​សម្រាប់ការ​សិក្សា​បន្តទាំងក្នុង និងក្រៅ​ប្រទេស។

ឆ្លៀតក្នុង​ឱកាសនោះ ឯកឧត្តមបណ្ឌិតសភាចារ្យ ហង់ជួន ណារ៉ុន ក៏​បានថ្លែង​អំណរគុណ ចំពោះចំពោះគណៈគ្រប់គ្រងសាលារៀនជំនាន់ថ្មី វិទ្យាល័យស៊ីសុវត្ថិ វិទ្យាល័យព្រះយុគន្ធរ លោកគ្រូ អ្នកគ្រូ មាតាបិតា អ្នកអាណាព្យាបាល និងសិស្សានុសិស្ស ដែលបានចូលរួមគាំទ្រចំពោះសាលារៀនជំនាន់ថ្មី ដែលជាការសិក្សាបែបសតវត្សទី២១ ការសិក្សាបែបឌីជីថល និងបច្ចេកវិទ្យា ឆ្លើយតបនឹងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការលើកកម្ពស់ការបណ្ដុះបណ្ដាលធនធានមនុស្ស ឱ្យមានទាំងចំណេះដឹង មានទាំងបំណិន ក៏ដូចជាជំនាញសតវត្សរ៍ទី២១ និងឥរិយាបថល្អ។

សូម​បញ្ជាក់ដែរថា ពិព័រណ៍ស្នាដៃសិស្សប្រចាំឆ្នាំ២០២៤ របស់សិស្សានុសិស្សវិទ្យាល័យព្រះយុគន្ធរ និងវិទ្យាល័យព្រះស៊ីសុវត្ថិសាលារៀនជំនាន់ថ្មី (NGS) បានធ្វើឡើងកាលពីថ្ងៃទី២២ ខែមិថុនា ឆ្នាំ​២០២៤ ដោយ​មានការ​ដាក់តាំង​ស្នាដៃរបស់សិស្សដូចជា ការធ្វើពិសោធន៍អំពីសមិទ្ធផល ការអប់រំស្ទែម ផ្នែកវិទ្យាសាស្ដ្រ រ៉ូបូត ចំណតវៃឆ្លាត រូបវិទ្យា គីមីវិទ្យា ស្រាវជ្រាវបញ្ហាសង្គម និពន្ធសៀវភៅ និងការសម្ដែងសិល្បៈជាដើម ដែលឆ្លុះបញ្ចាំងពីចំណេះដឹង ភាពច្នៃប្រឌិត និងសក្ដានុពលបញ្ញារបស់យុវជនកម្ពុជា។

បើតាម​គណៈគ្រប់គ្រងសាលា ការរៀបចំពិព័រណ៍ស្នាដៃសិស្សនាពេលនេះ ក្នុងគោលបំណងដើម្បីលើកទឹកចិត្តដល់សិស្សានុសិស្ស មាតាបិតា និងអ្នកអាណាព្យាបាល ក៏ដូចជាសហគមន៍ ដើម្បីបង្កើនភាពជឿជាក់ និងទំនុកចិត្តលើគុណភាពអប់រំនៅក្នុងគ្រឹះស្ថានអប់រំសាធារណៈ៕