ក្រោយ​បញ្ចប់ដំណើរការ​សំណេរ នៃការប្រឡង​សញ្ញាបត្រ​មធ្យមសិក្សា​ទុតិយភូមិ (បាក់ឌុប) ពេលនេះ​កំពុង​ស្ថិត​នៅ​ក្នុង​ដំណាក់​កាលកំណែ ដែល​បេក្ខជន​ទាំងអស់​​កំពុង​ស្ថិត​នៅ​ក្នុងភាពទំនេរ ដើម្បីរង់ចាំលទ្ធផលនៃការ​ប្រឡង ដែល​ក្រសួង​​អប់រំ យុវជន និងកីឡា គ្រោ​ង​នឹង​ប្រកាស​នៅ​ថ្ងៃទី២០ ខែកញ្ញាខាងមុខ។ តើកំឡុងពេល​ នៃការ​រង់ចាំ​លទ្ធផលនេះ សិស្សានុសិស្ស​ជាបេក្ខជន គួរធ្វើអ្វីខ្លះ ដើម្បី​កុំ​ឱ្យ​ការរង់ចាំនេះរំកិលទៅមុខ​ដោយ​គ្មានប្រយោជន៍?

លោក គីម ដារ៉ា នាយក និងជាស្ថាបនិកសាលាបង្វឹកស្តាតអាប់ (Startup Community) មានប្រសាសន៍ថា លទ្ធផលបាក់ឌុបពិតជាសំខាន់ក្នុងកម្រិតមួយដែលសិស្សានុសិស្សបានលះបង់ពេលវេលារយៈពេល ១២ឆ្នាំខំប្រឹងរៀន ដើម្បីប្រឡង។ លើសពីនេះ សញ្ញាបត្របាក់ឌុប ជាផ្លូវមួយទៀតឱ្យសិស្សានុសិស្សបន្តដំណើរក្នុងជីវិតទៅថ្នាក់​មហាវិទ្យាល័យ ឬបន្តការសិក្សាក្រៅប្រទេស ដើម្បីសម្រួចចំណេះជំនាញបន្ថែមទៀត។

យ៉ាងណា ប្រសិនបើសិស្សានុសិស្សជាមនុស្សដែលមានគោលដៅច្បាស់លាស់ បើតាមលោក គីម ដារ៉ា ពួកគេអាចយកពេលវេលារង់ចាំលទ្ធផលបាក់ឌុបនេះ សម្រាប់រៀនត្រៀម។ លោក​លើកជាឧទាហរណ៍ថា ប្រសិនបើសិស្សានុសិស្សចង់រៀនពេទ្យ គឺគួរត្រូវរៀនត្រៀមសម្រាប់ប្រឡងពេទ្យ, ប្រសិនចង់ចូលរៀននៅសាលាបច្ចេកវិទ្យាកម្ពុជា (តិចណូ) ត្រូវរៀនត្រៀមសម្រាប់ប្រឡងចូលសាលាតិចណូដែរ ហើយ​ប្រសិនបើសិស្សានុសិស្សចង់ទៅរៀនបន្តនៅក្រៅប្រទេស គឺត្រូវរៀនត្រៀម ដើម្បីប្រឡងអាហារូបករណ៍ទៅក្រៅប្រទេស។

“ជាទូទៅអ្នកដែលពូកែដឹងថា ខ្លួនឯងជាប់ គេតែងរៀនត្រៀមបន្ត”

ស្ថាបនិកសាលាបង្វឹកស្តាតអាប់ បន្ថែមថា ចំណែកអ្នកមិនច្បាស់វិញ មិនដឹងថាខ្លួនឯងជាប់ ឬមិនជាប់ក៏ដោយ ពេលវេលានៅសល់អំឡុងពេលរង់ចាំលទ្ធផល ពួកគេអាចដើរកម្សាន្តខ្លះ រៀនខ្លះ ប៉ុន្តែកុំកម្សាន្តច្រើនពេក, ដូចជាចំណាយពេលមួយថ្ងៃទៅពីរថ្ងៃក្រោយបាក់ឌុប សម្រាកកម្សាន្ត ជួបជុំគ្រួសារ ដើរលេងកម្សាន្តបន្តិចបន្តួច។ ហើយចាប់ផ្ដើមរៀនឡើងវិញ ពង្រឹងសមត្ថភាពខ្លួនឯង ព្រោះអ្វីដែលសំខាន់ជាងគេរបស់យុវជនវ័យក្មេង គឺចំណេះដឹង ព្រោះយើងមិនទាន់មានបទពិសោធន៍អ្វីច្រើននោះទេ ពោលគឺត្រូវយកចំណេះដឹងឱ្យបានច្រើន ដល់ពេលយើងមានចំណេះដឹងច្រើន ពេលប្រឡូកជាមួយការងារជាក់ស្ដែង ប្រឡូកជាមួយបញ្ហាជាក់ស្ដែង គឺយើងប្រើចំណេះទាំងអស់នេះ ដើម្បីដោះស្រាយបញ្ហាជីវិត។

សរុបមកវិញ បើតាម លោក គីម ដារ៉ា អំឡុងពេលរង់ចាំលទ្ធផល ប្រសិន​បើ​សិស្សានុសិស្សមិនដឹងធ្វើអ្វី គឺអាចស្វែងយល់អ្វីដែលខ្លួនឯងចូលចិត្ត ដោយការចូលរួមការតាំងពិព័រណ៍ជំនាញសិក្សា និងការងារឱ្យបានច្រើន ដើម្បីស្វែងយល់ថា តើយើងចូលចិត្តជំនាញមួយណា? យើងចូលចិត្តរៀនអ្វី? កាលណាលយើងដឹងពីខ្លួនឯងច្រើន នឹងធ្វើឱ្យយើងសម្រេចចិត្តចូលរៀនមិនខុស ព្រោះកាលណាយើងរៀនស្របតាមអ្វីដែលខ្លួនចូលចិត្ត នោះ​យើងនឹងរៀនពូកែ រៀនមិនធុញ ហើយ​ពេលយើងចេញធ្វើការ នោះ​ឱកាសការងារក៏ខ្ពស់ដែរ។

ជាមួយ​គ្នានេះ លោក គីម ដារ៉ា ក៏បានលើកទឹកចិត្តដល់យុវជនទាំងអស់ ប្រសិនបើលទ្ធផលប្រឡងចេញមកមិនដូចចិត្ត សូមបន្តទៅមុខទៀត ហើយ​ចាត់ទុកថា នេះជាបទពិសោធន៍ជីវិត ជាអង្គចងចាំមួយ ជាមេរៀនមួយ ហើយបន្តទៅមុខ​ទៀត​ឆ្ពោះទៅ​គោលដៅដែលយើងចង់បាន។ លើសពីនេះ ត្រូវ​រៀនទទួលយកការពិត បើចូលចិត្តអ្វី សូមខំប្រឹងរៀន អត់ធ្មត់ បើចង់បានអ្វីត្រូវព្យាយាមធ្វើឱ្យបាន ព្រោះទីផ្សារការងារត្រូវការអ្នកចេះពិតប្រាកដ៕